Read Sayula Popoluca El Apocalipsis 9 Bible Online

El Apocalipsis 9 - Sayula Popoluca bible

El Apocalipsis 9

¹Mit imucincuway ángel i-acya̱s̈ itrompeta, mit tʉn-is̈ ni'c ca'u tu'c ma̱jts desde tsajpni'c hasta na̱s̈ni'c, mit ayé ma̱jts inʉmo'jcʉp tu'c ma̱lway ángel. Mit ayé ángel imoygau ya̱pi itu-awa'tsámpay ayé cʉt jeme jugo'cway.

²Mit i-awa̱ts ayé cʉt, mit pichin wi's̈ic cʉtni'c, mit ayé wi's̈ic as̈am jeme pichimpay en tu'c mʉjway hornu. Mit cuchítimiu s̈ʉjw mit cuchitimigada̱c nu'pʉjʉn ni'c pichino'c wi's̈ic cʉtni'c.

³Mit wi's̈icni'c pichingau pa̱tas̈ ma̱jlatway jeme que̱jcapay, mit imoygau poder as̈am ayé poder ijtʉpay tu'c capin pa nas̈to'gáj.

⁴Mit imanda̱tcau magacayga ma'jts na̱s̈ni'cway, ne s̈us̈ucmʉjy ne cujyat. Solo ma actunas̈ca jayajwat jeme ca-itcʉjʉpay Dios imarca iwimpacni'jcat.

⁵Mit imoygau laj ma actunas̈ca pa cinco po'jat, po maga-ago'jca. Mit i-actunas̈cau as̈am cuandu nas̈to'p tu'c capin.

⁶Mit en ayé s̈ʉjwat jayajwat iche'ngáj i-o'gʉjat, po igapa̱tcáj. Mit iwangáj i-o'jcawa'n, po ca-oyáj i-o'jca.

⁷Mit ayé pa̱tas̈at que's̈cau as̈am cawa̱yujat jeme prepará̱tijcatway pa tsuguini'c. Mit itcʉjʉu icopacni'jcat as̈am coronajat waticway de oro, mit iwindugʉjtat as̈am jayau.

⁸Mit itcʉjʉu icuajyat as̈am to's̈ajyat, mit itʉ̱jtsat as̈am leójnat.

⁹Mit itcʉjʉu ipechuni'jcat as̈am pus̈an. Mit ique̱gajnat mʉgʉgo'c ruidu iguiwátcaj as̈am carrujat jeme iguiju'pcapay cawa̱yujat cuandu inʉs̈ca tsuguini'c.

¹⁰Mit itcʉjʉu itu'jts as̈am cápijnat itu'jtsat, mit jʉpac ayé agu̱s̈a imuyo'ygapay itu'tsni'jcat. Mit itu'tsni'jcat itcʉjʉu poder pa igui-actunas̈cawa'n jayajwat pa cinco po'jat.

¹¹Mit ayé pa̱tas̈at itcʉjʉu ijefejat jeme iguimanda̱tcapay, mit ijefejat tu'c ma̱lway ángel jeme tsʉ̱napay cʉtʉm, mit inʉ'jy hebreo-auni'c Abadón, mit griegu-auni'c Apolión, ayé inʉmo'jcʉp i-actogoypay jayajwat.

¹²Nas̈way primeruway pʉ̱tna̱s̈, po mi'námnaj jamechc.

¹³Mit imuseisway ángel i-acya̱s̈ itrompeta, mit tʉnmarau icojts tambʉnda mam itsʉ̱na ayé lugar mam igui-adora̱tca Dios. Mit ayé lugar watic de oro.

¹⁴Mit inajau imuseisway ángel jeme ijtʉway trompeta: —Quejcʉs̈ ayé mactas̈p ángejlat, ni'c je'jat tsʉ̱ngap cutsumda'guic mam itsʉ̱na ayé mʉjnʉ' Eufrates jeme mʉjo'cway.

¹⁵Mit iquejcau ayé mactas̈p ángejlat, ni'c je'jat tsʉ̱ngau listu ma coja meru hora pa igui-ago'jcawa'n tercera parte jayajwat.

¹⁶Mit tʉnmarau ni'c it doscientos millones cawajni'jcatway, mit je'jat yo'ygap de soldajat.

¹⁷Mit yename tʉs̈-is̈ en visión ayé cawa̱yujat mit jeme iguituyo'ygaway. Ayé cawajni'jcatway iyajcau pus̈an ipechuni'jcat, mit ayé tsabats as̈am jʉjn, mit s̈us̈uc as̈am azufre iwi's̈ic mit pu'tsputs as̈am azufre. Mit icópajcat ayé cawa̱yujat as̈am león icópajcat. Mit pichin i-auni'jcat jʉjn, wi's̈ic mit azufre.

¹⁸Mit o'jcau tercera parte jayajwat por ayé tu̱gup castigujat, ni'c pichingau i-auni'jcat ayé cawa̱yujat jʉjn, wi's̈ic mit azufre.

¹⁹Ni'c ayé cawa̱yujat itcʉjʉu poder i-auni'jcat mit itu'tsni'jcat. Ni'c itu'tsjʉjpat as̈am tsanaycopac mit ayé ituto'gap jayajwat.

²⁰Mit japu̱t jayajwat jeme ca-o'jcaway mit ayé castigujat, igacuyaguigawu ima̱lway to̱jwat. Igacuyaguigawu igui-adora̱tcawa'n demo̱nyujat, mit tiyu̱s̈at watijcatway de oro, plata, bronce, tsa' mit de cujy. Mit ayé tiyu̱s̈at ca-oyap i-e'pca, ca-oyap imarauga, ne ca-oyap iyo'yga.

²¹Ne igacuyaguigawu ayʉ̱́j: i-ago'jcawa'n, itso'jcaygawa'n, ichajyo'ygawa'n mit inu'mgawa'n.