Read Scots Gaelic 1992 – Am Bìoball Gàidhlig 199 Dara Leabhar Shamueil 21 Bible Online

Dara Leabhar Shamueil 21 - Scots Gaelic 1992 – Am Bìoball Gàidhlig 199 bible

Dara Leabhar Shamueil 21

¹Agus bha gorta ann an làithean Dhaibhidh, rè trì bliadhna, bliadhna an dèidh bliadhna. Agus dh’fhiosraich Daibhidh den Tighearna, agus fhreagair an Tighearna, Is ann airson Shauil, agus airson a thaighe fhuileachdaich a tha i, a chionn gun do mharbh e na Gibeonaich.

²Agus ghairm an rìgh air na Gibeonaich, agus thubhairt e riu; (a‑nis cha robh na Gibeonaich de chloinn Israeil, ach de iarmad nan Amorach: agus thug clann Israeil mionnan dhaibh: agus dh’iarr Saul am marbhadh, na eud airson chloinn Israeil agus Iùdah:)

³Uime sin thubhairt Daibhidh ris na Gibeonaich, Ciod a nì mi air ur son? Agus cia leis a nì mi an rèite, a‑chum gum beannaich sibh oighreachd an Tighearna?

⁴Agus thubhairt na Gibeonaich ris, Cha bhi againne airgead no òr o Shaul, no o a thaigh; agus air ar son-ne cha mharbh thu duine sam bith ann an Israel. Agus thubhairt esan, An nì a their sibh, nì mise dhuibh.

⁵Agus fhreagair iad an rìgh, An duine a chuir as dhuinn, agus a smaoinich nar n‑aghaidh sinn a bhith air ar sgrios, air chor is nach fanamaid ann an crìch air bith de Israel;

⁶Thugar dhuinn seachdnar de a mhic-san, agus crochaidh sinn suas iad don Tighearna, ann an Gibeah Shauil, a thagh an Tighearna. Agus thubhairt an rìgh, Bheir mi dhuibh iad.

⁷Ach chaomhain an rìgh Mephiboset mac Ionatain mhic Shauil, airson mionnan an Tighearna, a bha eatorra, eadar Daibhidh agus Ionatan mac Shauil.

⁸Ach ghabh an rìgh dà mhac Rispah nighean Aiah, a rug i do Shaul, Armoni agus Mephiboset; agus còignear mhac Mheroib, nighean Shauil, a rug i do Adriel mac Bharsillai am Meholatach:

⁹Agus thug e thairis iad do làimh nan Gibeonach, agus chroch iad iad anns an t‑sliabh am fianais an Tighearna; agus thuit an t‑seachdnar sin cuideachd, agus chuireadh gu bàs iad ann an ciad làithean an fhogharaidh, ann an toiseach fogharadh an eòrna.

¹⁰Agus ghabh Rispah nighean Aiah sac-aodach, agus sgaoil i dhi fhèin e air a’ charraig, o thoiseach an fhogharaidh gus an do shil uisge orra o nèamh: agus cha do leig i le eunlaith an adhair fois a ghabhail orra anns an là, no do fhiadh-bheathaichean na machrach anns an oidhche.

¹¹Agus dh’innseadh do Dhaibhidh ciod a rinn Rispah, nighean Aiah, coileabach Shauil.

¹²Agus dh’fhalbh Daibhidh, agus thug e o dhaoine Iabeis-ghilead cnàmhan Shauil, agus cnàmhan a mhic, Ionatan, a ghoid iad o shràid Bhet-sain, far an do chroch na Philistich iad, anns an là air an do mharbh na Philistich Saul ann an Gilbòa:

¹³Agus thug e a‑nìos as a sin cnàmhan Shauil, agus cnàmhan Ionatain, a mhac: agus chruinnich iad cnàmhan na muinntir a chrochadh.

¹⁴Agus dh’adhlaic iad cnàmhan Shauil, agus a mhic Ionatan, ann an tìr Bheniàmin ann an Selah, ann an àit-adhlacaidh Chis, a athair. Agus rinn iad gach nì a dh’àithn an rìgh: agus na dhèidh sin bha Dia rèidh ris an tìr.

¹⁵Agus bha cogadh aig na Philistich fhathast ri Israel; agus chaidh Daibhidh sìos agus a sheirbhisich maille ris, agus chog iad ris na Philistich; agus dh’fhàs Daibhidh sgìth.

¹⁶Agus thubhairt Isbi-benob, a bha de shliochd an fhamhair, (agus aig am b’e cudthrom ceann a shleagha trì cheud secel umha, agus e crioslaichte le crios nodha,) gum marbhadh e Daibhidh.

¹⁷Ach rinn Abisai mac Sheruiah còmhnadh ris, agus bhuail e am Philisteach, agus mharbh e e. An sin mhionnaich fir Dhaibhidh dha, ag ràdh, Cha tèid thu a‑mach nas mò maille rinne gu cath, a‑chum nach cuir thu as lòchran Israeil.

¹⁸Agus na dhèidh seo bha cath a‑rìs ann an Gob ris na Philistich: an sin bhuail Sibechai, an Husatach, Saph, a bha de shliochd an fhamhair.

¹⁹Agus bha a‑rìs cath ann an Gob ris na Philistich: agus bhuail Elhanan, mac Iare-oregim, Lahmi, bràthair Gholiath an Giteach; agus bha crann a shleagha mar gharmain figheadair.

²⁰Agus bha fhathast cath ann an Gat, far an robh fear de mheudachd mhòir, agus sia meòir aige air gach làimh, agus sia meòir air gach cois, ceithir-ar‑fhichead an àireamh; agus rugadh esan mar an ceudna don fhamhair.

²¹Agus nuair a thug e dùbhlan do Israel, mharbh Ionatan, mac Shimeah, bràthair Dhaibhidh, e.

²²Rugadh a’ cheathrar sin don fhamhair ann an Gat, agus thuit iad le làimh Dhaibhidh, agus le làimh a sheirbhiseach.