Read Scots Gaelic 1992 – Am Bìoball Gàidhlig 199 Ciad Leabhar nan Rìgh 4 Bible Online

Ciad Leabhar nan Rìgh 4 - Scots Gaelic 1992 – Am Bìoball Gàidhlig 199 bible

Ciad Leabhar nan Rìgh 4

¹Agus bha rìgh Solamh na rìgh air Israel uile.

²Agus is iad seo na h‑uachdarain a bha aige: Asariah mac Shadoic an sagart:

³Elihoreph agus Ahiah mic Shisa, sgrìobhaichean: Iehosaphat mac Ahiluid, an seanchaidh:

⁴Agus Benaiah mac Iehoiada air ceann an t‑slòigh: agus Sadoc agus Abiatar, na sagartan:

⁵Agus Asariah mac Nàtain os cionn an luchd-dreuchd: agus Sabud mac Nàtain, an t‑àrd fhear-dreuchd, na charaid aig an rìgh:

⁶Agus Ahisar os cionn an teaghlaich: agus Adoniram mac Abda os cionn na cìse.

⁷Agus bha aig Solamh dà‑fhear-dheug de luchd-dreuchd os cionn Israeil uile, a bheathaich an rìgh agus a theaghlach: rè a mhìosa fhèin anns a’ bhliadhna bha e mar fhiachan air gach fear dhiubh a bheathachadh.

⁸Agus is iad seo an ainmean: mac Huir ann an sliabh Ephraim:

⁹Mac Dhecair ann am Macas, agus ann an Saalbim, agus ann am Bet-semes, agus ann an Elon, agus ann am Bet-hanan:

¹⁰Mac Heseid ann an Arubot; aigesan bha Sochoh, agus uile thìr Hepheir:

¹¹Mac Abinadaib, aig an robh uile thìr Dhoir; bha Taphat nighean Sholaimh aige na mnaoi:

¹²Baanah mac Ahiluid; aigesan bha Taanach, agus Megido, agus Bet-sean uile, a tha làimh ri Sartanah sìos o Iesreel, o Bhet-sean gu Abel-meholah, gu ruig an taobh thall de Iocneam:

¹³Mac Ghebeir ann an Ramot-gilead; dhàsan bhuineadh bailtean Iair mhic Mhanaseh, a tha ann an Gilead; dhàsan mar an ceudna bhuineadh tìr Argoib, a tha ann am Basan, trì-fichead baile mòr le ballachan agus le crainn umha:

¹⁴Ahinadab mac Ido ann am Mahanaim:

¹⁵Ahimaas ann an Naphtali; ghabh esan mar an ceudna Basmat nighean Sholaimh na mnaoi:

¹⁶Baanah mac Husai ann an Aser, agus ann am Balot:

¹⁷Iehosaphat mac Pharuah ann an Isachar:

¹⁸Simei mac Elah ann am Beniàmin:

¹⁹Geber mac Uri ann an tìr Ghilead, ann an tìr Shihoin rìgh nan Amorach, agus Og rìgh Bhasain; agus b’esan an t‑aon fhear-dreuchd a bha anns an tìr.

²⁰Bha Iùdah agus Israel lìonmhor, mar a’ ghaineamh a tha ri taobh na fairge air lìonmhorachd, ag ithe, agus ag òl, agus a’ dèanamh subhachais.

²¹Agus rìghich Solamh os cionn nan rìoghachdan uile, on abhainn gu tìr nam Philisteach, agus gu ruig crìoch na h‑Eiphit: thug iad leo tìodhlacan, agus rinn iad seirbhis do Sholamh rè uile làithean a bheatha.

²²Agus b’e lòn Sholaimh airson aon là, deich-tomhaisean-fichead de mhin mhìn chruithneachd, agus trì-fichead tomhas mine eile.

²³Deich daimh bhiadhte, agus fichead damh bhàrr an fheòir, agus ceud caora, a thuilleadh air fèidh, agus ruadh-bhuic, agus dathaisean, agus eòin bhiadhte.

²⁴Oir bha uachdaranachd aige os cionn na tìre uile air an taobh seo den abhainn, o Thiphsah eadhon gu Asah, os cionn nan rìgh uile air an taobh seo den abhainn: agus bha sìth aige o gach taobh mun cuairt dha.

²⁵Agus ghabh Iùdah agus Israel còmhnaidh gu tèarainte, gach fear fo a chrann-fìona, agus fo a chrann-fìge fhèin, o Dhan eadhon gu Beersèba, rè uile làithean Sholaimh.

²⁶Agus bha aig Solamh ceithir mìle prasach each airson a charbad, agus dà‑mìle-dheug marcaiche.

²⁷Agus bheathaich an luchd-dreuchd sin rìgh Solamh, agus gach neach a thàinig gu bòrd rìgh Solamh, gach duine na mhìos fhèin: cha d’fhuiling iad nì air bith a bhith a dh’easbhaidh.

²⁸Eòrna mar an ceudna agus connlach do na h‑eich, agus do na dromadairean, thug iad a dh’ionnsaigh an àit anns an robh an luchd-dreuchd, gach fear a rèir a òrdaigh fhèin.

²⁹Agus thug Dia gliocas do Sholamh, agus tuigse ro‑mhòr, agus farsaingeachd cridhe mar a’ ghaineamh a tha air tràigh na mara.

³⁰Agus bu mhò gliocas Sholaimh na gliocas uile chlann na h‑àird an ear, agus na uile ghliocas na h‑Eiphit.

³¹Agus bha e glic thar gach duine, thar Etan an t‑Esrahach, thar Heman, agus Chalcol, agus Darda, mic Mhahoil: agus bha a chliù anns gach dùthaich mun cuairt.

³²Agus labhair e trì mìle gnàth-fhacal; agus b’e àireamh a dhàn mìle agus còig.

³³Agus labhair e air craobhan, on chrann-seudair a tha ann an Lebanon, eadhon gu ruig an hìosop a dh’fhàsas a‑mach as a’ bhalla: labhair e mar an ceudna air ainmhidhean, agus air eunlaith, agus air nithean a shnàigeas, agus air èisg.

³⁴Agus thàinig cuid de na h‑uile chinnich a dh’èisdeachd ri gliocas Sholaimh, o uile rìghrean na talmhainn, a chuala iomradh a ghliocais.