Read Scots Gaelic 1992 – Am Bìoball Gàidhlig 199 Ciad Leabhar nan Rìgh 9 Bible Online

Ciad Leabhar nan Rìgh 9 - Scots Gaelic 1992 – Am Bìoball Gàidhlig 199 bible

Ciad Leabhar nan Rìgh 9

¹Agus nuair a chuir Solamh crìoch air taigh an Tighearna, agus taigh an rìgh a thogail, agus uile mhiann Sholaimh a bu taitneach leis a dhèanamh,

²Dh’fhoillsich an Tighearna e fhèin do Sholamh an dara uair, mar a dh’fhoillsich e e fhèin dha ann an Gibeon.

³Agus thubhairt an Tighearna ris, Chuala mi d’ùrnaigh agus d’athchuinge a chuir thu suas am fhianais: naomhaich mi an taigh seo a thog thu, a chur m’ainme an sin gu bràth; agus bidh mo shùilean agus mo chridhe an sin gach là.

⁴Agus ma ghluaiseas tusa ann am fhianais, mar a ghluais Daibhidh d’athair, ann an iomlanachd cridhe, ann an ionracas, a dhèanamh a rèir nan uile nithean a dh’àithn mise dhut, agus gun glèidh thu mo reachdan agus mo bhreitheanais;

⁵An sin daingnichidh mise cathair do rìoghachd air Israel gu bràth, mar a labhair mi ri Daibhidh d’athair, ag ràdh, Cha bhi thu gun duine air rìgh-chathair Israeil.

⁶Ach ma thionndaidheas sibh da‑rìribh om leantainn-sa, sibh fhèin agus ur clann, agus nach glèidh sibh m’àitheantan agus mo reachdan a chuir mi romhaibh, ach gum falbh sibh agus gun dèan sibh seirbhis do dhiathan eile, agus gun sleuchd sibh dhaibh;

⁷An sin gearraidh mise Israel as bhàrr aghaidh an fhearainn a thug mi dhaibh: agus an taigh seo a naomhaich mi dom ainm fhèin, tilgidh mi as mo shealladh, agus bidh Israel na ghnàth-fhacal agus na leth-fhacal am measg nan uile shluagh:

⁸Agus an taigh seo a bha cho àrd, gach neach a ghabhas seachad air, bidh ioghnadh air, agus nì e sgeig; agus their iad, Carson a rinn an Tighearna mar seo ris an tìr seo, agus ris an taigh seo?

⁹Agus freagraidh iad, A chionn gun do thrèig iad an Tighearna an Dia, a thug a‑mach an athraichean à tìr na h‑Eiphit, agus gun do ghabh iad dan ionnsaigh diathan eile, agus gun do shleuchd iad dhaibh, agus gun do rinn iad seirbhis dhaibh; uime sin thug an Tighearna orra an t‑olc seo uile.

¹⁰Agus an ceann fichead bliadhna, anns an do thog Solamh an dà thaigh, taigh an Tighearna agus taigh an rìgh,

¹¹A chionn gun tug Hiram rìgh Thìruis seachad do Sholamh fiodh seudair agus fiodh giuthais, agus òr gu a uile thoil, an sin thug rìgh Solamh do Hiram fichead baile ann an tìr Ghalile.

¹²Agus thàinig Hiram a‑mach à Tìrus a dh’fhaicinn nam bailtean a thug Solamh dha; ach cha do thaitinn iad ris.

¹³Agus thubhairt e, Ciod iad na bailtean sin a thug thu dhomh, a bhràthair? Agus thugadh fearann Chabuil mar ainm orra gus an là‑an‑diugh.

¹⁴Agus chuir Hiram a dh’ionnsaigh an rìgh sia fichead tàlann òir.

¹⁵Agus is e seo adhbhar na cìse a thog rìgh Solamh a thogail taigh an Tighearna, agus a thaighe fhèin, agus Mhilo, agus balla Ierusaleim, agus Hasoir, agus Mhegido, agus Ghèseir.

¹⁶Chaidh Phàraoh rìgh na h‑Eiphit suas, agus ghlac e Gèser, agus loisg e e le teine, agus mharbh e na Canàanaich a bha a chòmhnaidh anns a’ bhaile, agus thug e e mar thìodhlac da nighinn, bean Sholaimh.

¹⁷Agus thog Solamh Gèser, agus Bet-horon ìochdarach,

¹⁸Agus Bàalat, agus Tadmor anns an fhàsach, anns an tìr,

¹⁹Agus na h‑uile bhailtean ionmhais a bha aig Solamh, agus bailtean a charbad, agus bailtean a mharc-shluaigh, agus miann Sholaimh a mhiannaich e a thogail ann an Ierusalem, agus ann an Lebanon, agus ann an tìr a thighearnais uile.

²⁰Agus an sluagh uile a dh’fhàgadh beò de na h‑Amoraich, de na Hitich, de na Peridsich, de na Hibhich, agus de na h‑Iebusaich, nach robh de chloinn Israeil;

²¹An clann a dh’fhàgadh nan dèidh anns an tìr, nach b’urrainn clann Israeil a sgrios gu tur, dhiùbhsan thog Solamh daor-chìs gus an là‑an‑diugh.

²²Ach de chloinn Israeil, cha do rinn Solamh tràill sam bith: ach bha iad nam fir-chogaidh, agus nan seirbhisich aige, agus nan uachdarain, agus nan ceannardan, agus nan riaghlairean a charbad, agus a mharc-shluaigh.

²³B’iad seo uachdarain an luchd-dreuchd a bha os cionn obair Sholaimh, còig ceud agus lethcheud, a riaghail os cionn an t‑sluaigh a dh’obraich anns an obair.

²⁴Ach chaidh nighean Phàraoh suas à baile Dhaibhidh da taigh fhèin, a thog Solamh dhi: an sin thog e Milo.

²⁵Agus dh’ìobair Solamh trì uairean anns a’ bhliadhna ìobairtean-loisgte, agus ìobairtean-sìthe air an altair a thog e don Tighearna, agus loisg e tùis air an altair a bha am fianais an Tighearna: agus chrìochnaich e an taigh.

²⁶Agus rinn rìgh Solamh luingeas ann an Esion-geber, a tha làimh ri Elot, air tràigh na mara ruaidhe, ann an tìr Edoim.

²⁷Agus chuir Hiram anns an luingeas a òglaich fhèin, maraichean aig an robh eòlas na fairge, maille ri òglaich Sholaimh.

²⁸Agus thàinig iad gu Ophir, agus thug iad as a sin òr, ceithir cheud agus fichead tàlann, agus thug iad gu rìgh Solamh e.