Read Scots Gaelic 1992 – Am Bìoball Gàidhlig 199 Dara Leabhar nan Rìgh 18 Bible Online

Dara Leabhar nan Rìgh 18 - Scots Gaelic 1992 – Am Bìoball Gàidhlig 199 bible

Dara Leabhar nan Rìgh 18

¹Agus anns an treas bliadhna de Hosèah mac Elah, rìgh Israeil, thòisich Heseciah mac Ahais, rìgh Iùdah, air rìoghachadh.

²Còig-bliadhna-fichead a dh’aois bha e nuair a thòisich e air rìoghachadh; agus rìghich e naoi-bliadhna-fichead ann an Ierusalem: agus b’e ainm a mhàthar Abi, nighean Shechariah.

³Agus rinn e an nì a bha ceart ann an sùilean an Tighearna, a rèir nan uile nithean a rinn Daibhidh a athair.

⁴Chuir e air falbh na h‑àitean àrda, agus bhris e na dealbhan, agus gheàrr e sìos na doireachan, agus mhìn-phronn e an nathair umha a rinn Maois; oir gus na làithean sin bha clann Israeil a’ losgadh tùis dhi: agus thugadh Nehustan mar ainm oirre.

⁵As an Tighearna, Dia Israeil, bha a earbsa: agus na dhèidh cha robh neach sam bith cosmhail ris am measg uile rìghrean Iùdah, no aon a bha roimhe.

⁶Oir dhlùth-lean e ris an Tighearna, cha do chlaon e o a leantainn; ach ghlèidh e a àitheantan, a dh’àithn an Tighearna do Mhaois.

⁷Agus bha an Tighearna maille ris: anns gach àite don deachaidh e, shoirbhich e. Agus dh’èirich e an aghaidh rìgh Asiria, agus cha do rinn e seirbhis dha.

⁸Bhuail e na Philistich gu ruig Gàsa agus a chrìochan, o thùr an fhreiceadain gu ruig am baile daingnichte.

⁹Agus anns a’ cheathramh bliadhna de rìgh Heseciah, agus anns an t‑seachdamh bliadhna de Hosèah mac Elah rìgh Israeil, thàinig Salmaneser, rìgh Asiria, a‑nìos an aghaidh Shamaria, agus theannaich e e.

¹⁰Agus ghlac iad e an ceann trì bliadhna: anns an t‑siathamh bliadhna de Heseciah, agus an naoidheamh bliadhna de Hosèah, rìgh Israeil, ghlacadh Samaria.

¹¹Agus thug rìgh Asiria leis Israel do Asiria, agus chuir e iad ann an Halah agus ann an Habor làimh ri abhainn Ghosain, agus ann am bailtean nam Mèdeach:

¹²A chionn nach d’èisd iad ri guth an Tighearna an Dia, ach gun do bhris iad a choicheangal, agus na h‑uile nithean a dh’àithn Maois, òglach an Tighearna, nach d’èisd iad riu, cha mhò a rinn iad iad.

¹³Agus anns a’ cheathramh-bliadhna-deug de rìgh Heseciah thàinig Senacherib rìgh Asiria a‑nìos an aghaidh uile bhailtean daingnichte Iùdah, agus ghlac e iad.

¹⁴Agus chuir Heseciah rìgh Iùdah teachdairean gu rìgh Asiria do Lachis, ag ràdh, Chiontaich mi; till uam: an nì a chuireas tu orm, giùlainidh mi. Agus chuir rìgh Asiria air Heseciah rìgh Iùdah trì cheud tàlann airgid, agus deich-tàlannan-fichead òir.

¹⁵Agus thug Heseciah dha an t‑airgead uile a fhuaireadh ann an taigh an Tighearna, agus ann an ionmhasan taigh an rìgh.

¹⁶Anns an àm sin gheàrr Heseciah air falbh còmhlachan teampall an Tighearna, agus na h‑ursainnean chòmhdaich Heseciah rìgh Iùdah, agus thug e iad do rìgh Asiria.

¹⁷Agus chuir rìgh Asiria Tartan, agus Rabsaris, agus Rab-saceh, o Lachis gu rìgh Heseciah le sluagh mòr an aghaidh Ierusaleim: agus air teachd a‑nìos dhaibh, thàinig iad agus sheas iad aig sruth-chlais na linne as àirde, a tha air slighe achadh an luadhadair.

¹⁸Agus nuair a dh’èigh iad ris an rìgh, thàinig a‑mach dan ionnsaigh Eliacim mac Hilciah, a bha os cionn an teaghlaich, agus Sebna an sgrìobhaiche, agus Iòas mac Asaiph an seanchaidh.

¹⁹Agus thubhairt Rab-saceh riu, Abraibh a‑nis ri Heseciah, Mar seo tha an rìgh mòr, rìgh Asiria, ag ràdh, Ciod an earbsa mhòr seo a tha agad?

²⁰Tha thu ag ràdh (ach is briathran faoin iad), Tha comhairle agus neart agam a‑chum a’ chogaidh: a‑nis, matà, cò as a bheil thu ag earbsa, gun dèanadh tu cogadh am aghaidh-sa?

²¹A‑nis, feuch, tha thu ag earbsa as an luirg bhriste chuilce sin, as an Eiphit, a thèid, ma leigeas duine a chudthrom oirre, a‑steach na làimh, agus a thollas troimhe e. Is ann mar seo a tha Phàraoh rìgh na h‑Eiphit dhaibhsan uile a dh’earbas as.

²²Ach ma their sibh rium, As an Tighearna ar Dia tha ar n‑earbsa: nach e seo esan, a chuir Heseciah air falbh a àitean àrda, agus a altairean, agus a thubhairt ri Iùdah agus ri Ierusalem, fa chomhair na h‑altarach seo sleuchdaidh sibh ann an Ierusalem?

²³A‑nis uime sin, guidheam ort, thoir gill dom thighearna rìgh Asiria, agus bheir mise dhut dà mhìle each, mas urrainn thusa air do thaobh fhèin marcaichean a chur orra.

²⁴Cionnas, matà, a bheir thu air aon cheannard de na seirbhisich as lugha a tha aig mo thighearna-sa a aghaidh a thionndadh uat, agus a dh’earbas tu as an Eiphit airson charbad agus marc-shluaigh?

²⁵Ach a‑nis, an ann as eugmhais an Tighearna a thàinig mise a‑nìos an aghaidh an àite seo ga sgrios? Is e an Tighearna a thubhairt riumsa, Falbh suas an aghaidh na tìre seo, agus sgrios i.

²⁶An sin thubhairt Eliacim mac Hilciah, agus Sebna, agus Ioah, ri Rab-saceh, Labhair, guidheam ort, rid sheirbhisich anns a’ chainnt Shirianaich, oir tuigidh sinn i; agus na labhair rinn anns a’ chainnt Iùdhaich an cluasan an t‑sluaigh a tha air a’ bhalla.

²⁷Ach thubhairt Rab-saceh riu, An ann a dh’ionnsaigh do thighearna-sa agus ad ionnsaigh-sa a chuir mo thighearna mise a labhairt nam briathran seo? Nach ann a dh’ionnsaigh nan daoine a tha nan suidhe air a’ bhalla, a‑chum gun ith iad an salchar fhèin, agus gun òl iad an uisge fhèin maille ribhse?

²⁸An sin sheas Rab-saceh, agus dh’èigh e le guth àrd anns a’ chainnt Iùdhaich, agus labhair e, ag ràdh, Eisdibh ri facal an rìgh mhòir, rìgh Asiria:

²⁹Mar seo tha an rìgh ag ràdh, Na mealladh Heseciah sibh, oir chan urrainn e ur saoradh as mo làimh-sa:

³⁰Agus na tugadh Heseciah oirbh ur dòchas a chur anns an Tighearna, ag ràdh, Gu deimhinn saoraidh an Tighearna sinne, agus cha toirear thairis am baile seo do làimh rìgh Asiria.

³¹Na èisdibh ri Heseciah: oir mar seo tha righ Asiria ag ràdh, Dèanaibh suas càirdeas riumsa, agus thigibh a‑mach am ionnsaigh, agus ithibh, gach fear, de a chrann-fìona, agus gach fear de a chrann-fìge fhèin, agus òlaibh, gach fear, uisge a thobair fhèin;

³²Gus an tig mise, agus gun toir mi air falbh sibh do thìr cosmhail ri ur tìr fhèin, tìr arbhair agus fìona, tìr arain agus fhìonlios, tìr ola a’ chroinn-ola, agus meala, a‑chum gum bi sibh beò, agus nach faigh sibh bàs: agus na èisdibh ri Heseciah, nuair a chuireas e impidh oirbh, ag ràdh, Saoraidh an Tighearna sinn.

³³An do shaor riamh diathan nan cinneach, gach aon a thìr fhèin, à làimh rìgh Asiria?

³⁴Càit a bheil diathan Hamait, agus Arphaid? Càit a bheil diathan Shepharbhaim, Hena, agus Ibhah? An do shaor iad Samaria as mo làimh-sa?

³⁵Cò am measg uile dhiathan nan dùthchannan a shaor an tìr fhèin as mo làimh-sa, gun saoradh an Tighearna Ierusalem as mo làimh?

³⁶Ach bha an sluagh nan tosd, agus cha do fhreagair iad aon fhacal dha: oir b’i àithne an rìgh dhaibh, Na tugaibh freagradh air.

³⁷An sin thàinig Eliacim mac Hilciah, a bha os cionn an teaghlaich, agus Sebna an sgrìobhaiche, agus Ioah mac Asaiph an seanchaidh, gu Heseciah len aodach reubte, agus dh’innis iad dha briathran Rab-saceh.