Read Scots Gaelic 1992 – Am Bìoball Gàidhlig 199 Dara Leabhar nan Rìgh 20 Bible Online

Dara Leabhar nan Rìgh 20 - Scots Gaelic 1992 – Am Bìoball Gàidhlig 199 bible

Dara Leabhar nan Rìgh 20

¹Anns na làithean sin bha Heseciah tinn gu bàs: agus thàinig am fàidh Isaiah mac Amois da ionnsaigh, agus thubhairt e ris, Mar seo tha an Tighearna ag ràdh, Cuir do thaigh an òrdagh, oir gheibh thu bàs, agus cha bhi thu beò.

²An sin thionndaidh e a aghaidh ris a’ bhalla, agus rinn e ùrnaigh ris an Tighearna, ag ràdh,

³Guidheam ort, O Thighearna, cuimhnich a‑nis cionnas a ghluais mi ad làthair ann am fìrinn, agus le cridhe iomlan, agus a rinn mi an nì a tha math ad shùilean. Agus ghuil Heseciah gu goirt.

⁴Agus mun deachaidh Isaiah a‑mach don chùirt mheadhonaich, thàinig facal an Tighearna da ionnsaigh, ag ràdh,

⁵Till, agus abair ri Heseciah, ceannard mo shluaigh, Mar seo tha an Tighearna, Dia Dhaibhidh d’athair, ag ràdh, Chuala mise d’ùrnaigh, chunnaic mi do dheòir: feuch, slànaichidh mi thu; air an treas là thèid thu suas do thaigh an Tighearna.

⁶Agus cuiridh mi rid làithean còig-bliadhna-deug; agus saoraidh mi thusa, agus am baile seo, à làimh rìgh Asiria; agus dìonaidh mi am baile seo air mo shon fhèin, agus airson Dhaibhidh m’òglach.

⁷Agus thubhairt Isaiah, Gabhaibh meall fhìge. Agus ghabh agus chuir iad e air an neasgaid, agus shlànaicheadh e.

⁸Agus thubhairt Heseciah ri Isaiah, Ciod an comharradh gun leighis an Tighearna mi, agus gun tèid mi suas air an treas là do thaigh an Tighearna?

⁹Agus thubhairt Isaiah, Bidh seo na chomharradh dhut on Tighearna gun dèan an Tighearna an nì a labhair e: An tèid an dubhar air aghaidh deich ceumannan, no an tèid e air ais deich ceumannan?

¹⁰Agus fhreagair Heseciah, Is suarach an nì don dubhar dol sìos deich ceumannan; chan eadh, ach tilleadh an dubhar air ais deich ceumannan.

¹¹Agus ghlaodh Isaiah am fàidh ris an Tighearna; agus thug e air ais an dubhar deich ceumannan a chaidh e sìos air uaireadair-grèine Ahais.

¹²Anns an àm sin chuir Merodach-baladan mac Bhaladain, rìgh Bhàbiloin, teachdairean le litrichean agus tìodhlac gu Heseciah: oir chuala e gu robh Heseciah tinn.

¹³Agus rinn Heseciah gàirdeachas os an cionn, agus dh’fheuch e dhaibh uile thaigh-tasgaidh a nithean luachmhor, an t‑airgead, agus an t‑òr, agus na spìosraidh, agus an ola luachmhor, agus a thaigh-armachd, agus na nithean uile a fhuaireadh na ionmhasan: cha robh nì na thaigh, no na rìoghachd uile, nach d’fheuch Heseciah dhaibh.

¹⁴An sin thàinig Isaiah am fàidh gu rìgh Heseciah, agus thubhairt e ris, Ciod a thubhairt na daoine seo? Agus cia as a thàinig iad ad ionnsaigh? Agus thubhairt Heseciah, Thàinig iad o thìr chèin, o Bhàbilon.

¹⁵Agus thubhairt e, Ciod a chunnaic iad ann ad thaigh? Agus fhreagair Heseciah, Na h‑uile nithean a tha am thaigh chunnaic iad: chan eil nì ann am ionmhasan nach d’fheuch mi dhaibh.

¹⁶Agus thubhairt Isaiah ri Heseciah, Eisd ri facal an Tighearna:

¹⁷Feuch, tha na làithean a’ teachd, anns am bi na h‑uile nithean a tha ann ad thaigh, agus na h‑ionmhasan a thaisg d’athraichean suas gus an là‑an‑diugh, air an giùlan gu Bàbilon: chan fhàgar nì air bith, arsa an Tighearna.

¹⁸Agus cuid ded mhic a thig uat, a ghineas tu, bheir iad leo, agus bidh iad nan caillteanaich ann an lùchairt rìgh Bhàbiloin.

¹⁹An sin thubhairt Heseciah ri Isaiah, Is math facal an Tighearna a labhair thu: thubhairt e mar an ceudna, Nach math ma bhios sìth agus fìrinn ann am làithean-sa?

²⁰Agus a’ chuid eile de ghnìomharan Heseciah, agus a thrèine uile, agus mar a rinn e lochan, agus sruth-chlais, agus a thug e uisge a‑steach don bhaile, nach eil iad sgrìobhte ann an leabhar eachdraidh rìghrean Iùdah?

²¹Agus chaidil Heseciah maille ra athraichean: agus rìghich Manaseh a mhac na àite.