Read Scots Gaelic 1992 – Am Bìoball Gàidhlig 199 Ciad Leabhar nan Eachdraidh 14 Bible Online

Ciad Leabhar nan Eachdraidh 14 - Scots Gaelic 1992 – Am Bìoball Gàidhlig 199 bible

Ciad Leabhar nan Eachdraidh 14

¹A‑nis chuir Hiram rìgh Thìruis teachdairean a dh’ionnsaigh Dhaibhidh, agus fiodh seudair, agus clachairean, agus saoir, a thogail taighe dha.

²Agus dh’aithnich Daibhidh gun do dhaingnich an Tighearna e na rìgh air Israel, agus gun d’àrdaicheadh gu mòr a rìoghachd airson a shluaigh Israel.

³Agus ghabh Daibhidh tuilleadh bhan ann an Ierusalem; agus ghin Daibhidh fhathast mic agus nigheanan.

⁴Agus is iad seo ainmean a chloinne a bha aige ann an Ierusalem; Samua, agus Sobab, Nàtan, agas Solamh,

⁵Agus Ibhar, agus Elisua, agus Elphalet,

⁶Agus Nogah, agus Nepheg, agus Iaphia,

⁷Agus Elisama, agus Beeliada, agus Eliphalet.

⁸Agus nuair a chuala na Philistich gun d’ungadh Daibhidh na rìgh air Israel uile, thàinig na Philistich gu lèir a‑nìos a dh’iarraidh Dhaibhidh: agus chuala Daibhidh sin, agus chaidh e a‑mach nan aghaidh.

⁹Agus thàinig na Philistich, agus sgaoil iad iad fhèin ann an gleann Rephaim.

¹⁰Agus dh’fhiosraich Daibhidh de Dhia, ag ràdh, An tèid mi suas an aghaidh nam Philisteach, agus an toir thu thairis iad am làimh? Agus thubhairt an Tighearna ris, Gabh suas, agus bheir mi thairis iad ad làimh.

¹¹Agus thàinig iad gu Bàal-perasim; agus bhuail Daibhidh an sin iad. Agus thubhairt Daibhidh, Bhris Dia mo naimhdean o chèile lem làimh-sa, mar bhriseadh uisgeachan: uime sin thug iad Bàal-perasim mar ainm air an àite sin.

¹²Agus dh’fhàg iad an diathan an sin, agus thug Daibhidh àithne, agus loisgeadh iad le teine.

¹³Agus thàinig na Philistich a‑rìs, agus sgaoil iad iad fhèin anns a’ ghleann.

¹⁴Uime sin dh’fhiosraich Daibhidh a‑rìs de Dhia; agus thubhairt Dia ris, Na gabh suas nan dèidh; tionndaidh air falbh uapa, agus thig orra fa chomhair craobhan nan smeur.

¹⁵Agus nuair a chluinneas tu fuaim siubhail ann am barran craobhan nan smeur, an sin thèid thu a‑mach a‑chum catha; oir thèid Dia a‑mach romhad, a bhualadh feachd nam Philisteach.

¹⁶Agus rinn Daibhidh mar a dh’àithn Dia dha: agus bhuail iad feachd nam Philisteach o Ghibeon eadhon gu Gaser.

¹⁷Agus chaidh ainm Dhaibhidh a‑mach do gach tìr, agus thug an Tighearna a eagal-san air na h‑uile chinnich.