Read Scots Gaelic 1992 – Am Bìoball Gàidhlig 199 Dara Leabhar nan Eachdraidh 11 Bible Online

Dara Leabhar nan Eachdraidh 11 - Scots Gaelic 1992 – Am Bìoball Gàidhlig 199 bible

Dara Leabhar nan Eachdraidh 11

¹Agus nuair a thàinig Rehobòam gu Ierusalem, chruinnich e de thaigh Iùdah agus Bheniàmin ceud agus ceithir-fichead mìle fear taghte, dèante ri cogadh, a chogadh an aghaidh Israeil, a‑chum an rìoghachd a thoirt a‑rìs gu Rehobòam.

²Ach thàinig facal an Tighearna gu Semaiah òglach Dhè, ag ràdh,

³Labhair ri Rehobòam, mac Sholaimh, rìgh Iùdah, agus ri Israel uile ann an Iùdah agus ann am Beniàmin, ag ràdh,

⁴Mar seo tha an Tighearna ag ràdh, Cha tèid sibh suas, agus cha chog sibh ri ur bràithrean: tillibh, gach fear a dh’ionnsaigh a thaighe; oir leamsa rinneadh an nì seo. Agus dh’èisd iad ri briathran an Tighearna, agus thill iad o dhol an aghaidh Ierobòaim.

⁵Agus ghabh Rehobòam còmhnaidh ann an Ierusalem, agus thog e bailtean daingnichte ann an Iùdah:

⁶Thog e eadhon Betlehem, agus Etam, agus Tecòa,

⁷Agus Bet-sur, agus Socho, agus Adullam,

⁸Agus Gat, agus Maresah, agus Siph,

⁹Agus Adoraim, agus Lachis, agus Asecah,

¹⁰Agus Sorah, agus Aialon, agus Hebron, a tha ann an Iùdah, agus ann am Beniàmin, nam bailtean daingnichte.

¹¹Agus neartaich e na daingnichean, agus chuir e ceannardan annta, agus taisgeachan bìdh, agus ola, agus fìona.

¹²Agus anns gach baile fa leth chuir e sgiathan agus sleaghan, agus rinn e ro‑làidir iad; oir bha Iùdah agus Beniàmin aige air a thaobh.

¹³Agus thàinig na sagartan agus na Lèbhithich, a bha ann an Israel uile, da ionnsaigh as an crìochan uile:

¹⁴(Oir dh’fhàg na Lèbhithich am fo‑bhailtean agus an sealbh, agus thàinig iad gu Iùdah agus gu Ierusalem; a chionn gun do chuir Ierobòam agus a mhic iad a fhrithealadh ann an dreuchd nan sagart don Tighearna.

¹⁵Agus rinn e dha fhèin sagartan airson nan àitean àrda, agus airson dhiabhal, agus airson nan laogh a rinn e.)

¹⁶Agus nan dèidh-san thàinig a‑mach a uile threubhan Israeil iadsan a shocraich an cridhe a dh’iarraidh an Tighearna Dia Israeil, gu Ierusalem, a dh’ìobradh don Tighearna Dia an athraichean.

¹⁷Agus dhaingnich iad rìoghachd Iùdah, agus rinn iad Rehobòam mac Sholaimh làidir rè trì bliadhna; oir rè trì bliadhna ghluais iad ann an slighe Dhaibhidh agus Sholaimh.

¹⁸Agus ghabh Rehobòam Mahalat nighean Ierimoit, mhic Dhaibhidh, dha fhèin, na mnaoi; Abihail mar an ceudna, nighean Eliaib, mhic Iese:

¹⁹Agus rug ise dha clann; Ieus, agus Semariah, agus Saham.

²⁰Agus na dèidh-se ghabh e Maachah, nighean Absaloim, a rug dha Abiah, agus Atai, agus Sisa, agus Selomit.

²¹Agus ghràdhaich Rehobòam Maachah, nighean Absaloim, os cionn a bhan agus a choileabach uile; oir ghabh e dha fhèin ochd-mnathan-deug, agus trì-fichead coileabach, agus ghin e ochd-mic-fhichead, agus trì-fichead nighean.

²²Agus rinn Rehobòam na cheannard Abiah, mac Mhaacah, gu bhith na fhear-riaghlaidh am measg a bhràithrean; oir smaoinich e air a dhèanamh na rìgh.

²³Agus rinn e gu glic, agus sgaoil e a’ chuid eile de a mhic uile air feadh uile thìr Iùdah agus Bheniàmin, anns na bailtean daingnichte uile; agus thug e dhaibh pailteas bìdh. Agus dh’iarr e mòran bhan.