Read Scots Gaelic 1992 – Am Bìoball Gàidhlig 199 Dara Leabhar nan Eachdraidh 2 Bible Online

Dara Leabhar nan Eachdraidh 2 - Scots Gaelic 1992 – Am Bìoball Gàidhlig 199 bible

Dara Leabhar nan Eachdraidh 2

¹Agus shònraich Solamh taigh a thogail do ainm an Tighearna, agus taigh da rìoghachd.

²Agus dh’àireamh Solamh a‑mach deich agus trì-fichead mìle fear-iomchair eallach, agus ceithir fichead mìle fear-gearraidh anns a’ bheinn, agus trì mìle agus sia ceud a shealltainn thairis orra.

³Agus chuir Solamh teachdaire gu Huram rìgh Thìruis, ag ràdh, Mar a rinn thu ri Daibhidh m’athair, agus a chuir thu da ionnsaigh craobhan seudair a thogail taighe dha gu còmhnaidh a ghabhail ann, dèan riumsa:

⁴Feuch, tha mi gu taigh a thogail do ainm an Tighearna mo Dhia, a‑chum a choisrigeadh dha, gu tùis chùbhraidh a losgadh na fhianais, agus airson an arain thaisbeanta bhith-bhuain, agus airson ìobairtean-loisgte air madainn agus air feasgar, air na sàbaidean, agus air na gealaichean nodha, agus air àrd-fhèillean an Tighearna ar Dia: gu bràth tha seo ceangailte air Israel.

⁵Agus bidh an taigh a thogas mise mòr: oir is mòr ar Dia-ne os cionn nan uile dhiathan.

⁶Ach cò as urrainn taigh a thogail dha, nuair nach cùm na nèamhan, no nèamhan nan nèamh, e? Agus cò mise gun togainn dha taigh, ach a‑mhàin a losgadh ìobairtean na fhianais?

⁷A‑nis matà cuir am ionnsaigh duine, teòma air obrachadh ann an òr, agus ann an airgead, agus ann an umha, agus ann an iarann, agus ann an corcar, agus ann an dearg, agus ann an gorm, agus a tha eòlach air gearradh gu grinn maille ris na daoine ealanta a tha maille riumsa ann an Iùdah, agus ann an Ierusalem, a sholair Daibhidh m’athair.

⁸Cuir am ionnsaigh mar an ceudna craobhan seudair, craobhan giuthais, agus craobhan alguim o Lebanon: oir tha fhios agam gu bheil do sheirbhisich eòlach air fiodh a ghearradh ann an Lebanon: agus, feuch, bidh mo sheirbhisich-sa maille rid sheirbhisich-sa,

⁹Eadhon a dheasachadh dhomh fiodha ann am pailteas; oir bidh an taigh a tha mise gus a thogail mòr agus iongantach.

¹⁰Agus, feuch, bheir mi dod sheirbhisich, na gearradairean a ghearras fiodh, fichead mìle tomhas de chruithneachd buailte, agus fichead mìle tomhas eòrna, agus fichead mìle bat fìona, agus fichead mìle bat ola.

¹¹Agus fhreagair Huram rìgh Thìruis ann an sgrìobhadh, a chuir e a dh’ionnsaigh Sholaimh, A chionn gu bheil gràdh aig an Tighearna da shluagh, rinn e thusa ad rìgh os an cionn.

¹²Thubhairt Huram mar an ceudna, Beannaichte gu robh an Tighearna Dia Israeil a rinn nèamh agus talamh, a thug do Dhaibhidh an rìgh mac glic, aig a bheil eòlas agus tuigse, a thogadh taigh don Tighearna, agus taigh da rìoghachd.

¹³Agus a‑nis chuir mi ad ionnsaigh duine eòlach, aig a bheil tuigse, a bha aig Huram m’athair;

¹⁴Mac mnà de nigheanan Dhain, agus a athair na dhuine o Thìrus, teòma air obrachadh ann an òr, agus ann an airgead, ann an umha, ann an iarann, ann an cloich, agus ann am fiodh, ann an corcar, ann an gorm, agus ann an anart grinn, agus ann an dearg; agus air gearradh gach gnè gearraidh, agus air dealbhadh gach nì innleachdaich a chuirear fa chomhair, maille rid dhaoine ealanta-sa, agus daoine ealanta mo thighearna, Daibhidh d’athair.

¹⁵A‑nis air an adhbhar sin an cruithneachd, agus an t‑eòrna, an ola, agus am fìon, air an do labhair mo thighearna, cuireadh e iad a dh’ionnsaigh a sheirbhiseach:

¹⁶Agus gearraidh sinne fiodh à Lebanon, a rèir gach feum a bhios agad; agus bheir sinn ad ionnsaigh e na ràthan air muir gu Iopa; agus bheir thusa suas e gu Ierusalem.

¹⁷Agus dh’àireamh Solamh na coigrich uile a bha ann an tìr Israeil, an dèidh an àireamh leis an d’àireamh Daibhidh a athair iad; agus fhuaireadh ann dhiubh ceud agus lethcheud mìle agus trì mìle agus sia ceud.

¹⁸Agus rinn e trì-fichead agus deich mìle dhiubh nan luchd-iomchair eallach, agus ceithir-fichead mìle nan gearradairean anns an t‑sliabh, agus trì mìle agus sia ceud nan luchd-amhairc-thairis a thoirt air an t‑sluagh obair a dhèanamh.