Read Scots Gaelic 1992 – Am Bìoball Gàidhlig 199 Leabhar Esteir 2 Bible Online

Leabhar Esteir 2 - Scots Gaelic 1992 – Am Bìoball Gàidhlig 199 bible

Leabhar Esteir 2

¹An dèidh nan nithean sin, nuair a thraogh fearg an rìgh Ahasueruis, chuimhnich e air Bhasti, agus na rinn i, agus na dh’àithneadh na h‑aghaidh.

²An sin thubhairt òglaich an rìgh a fhritheil dha, Iarrar don rìgh òighean òga sgiamhach:

³Agus òrdaicheadh an rìgh luchd-riaghlaidh ann an uile mhòr-roinnean a rìoghachd, agus cruinnicheadh iad na h‑òighean òga sgiamhach uile gu Susan an lùchairt, gu taigh nam ban, fo làimh Hegai, caillteanach an rìgh, fear-gleidhidh nam ban; agus thugar dhaibh na nithean airson an glanaidh.

⁴Agus biodh an òigh a thaitneas ris an rìgh na bànrighinn an àite Bhasti. Agus thaitinn an nì ris an rìgh, agus rinn e mar sin.

⁵Bha Iùdhach àraidh ann an Susan an lùchairt dom b’ainm Mordecai, mac Iair, mhic Shimei, mhic Chis, duine de Bheniàmin,

⁶A thugadh air falbh o Ierusalem leis a’ bhraighdeanas a thugadh air falbh maille ri Ieconiah rìgh Iùdah, a thug Nebuchadnesar rìgh Bhàbiloin air falbh.

⁷Agus dh’àraich e Hadasah (b’i sin Ester), nighean bràthair a athar, oir cha robh athair no màthair aice; agus bha an òigh maiseach na cruth, agus sgiamhach na gnùis: agus nuair a dh’eug a h‑athair agus a màthair, ghabh Mordecai da ionnsaigh i mar a nighean fhèin.

⁸Agus nuair a chualas àithne an rìgh agus a òrdagh, agus nuair a chruinnicheadh iomadh òigh gu Susan an lùchairt, gu bhith fo làimh Hegai, thugadh Ester mar an ceudna gu taigh an rìgh, gu bhith fo làimh Hegai, fear-gleidhidh nam ban.

⁹Agus thaitinn an òigh ris, agus fhuair i coibhneas na làthair, agus rinn e deifir gus a nithean airson glanaidh, agus na bhuineadh dhi, a thabhairt da h‑ionnsaigh, agus gu seachd maighdeannan iomchaidh a thabhairt dhi à taigh an rìgh; agus chuir e i fhèin agus a maighdeannan don àit a b’fheàrr de thaigh nam ban.

¹⁰Cha d’innis Ester a sluagh no a luchd-dàimh: oir dh’àithn Mordecai dhi gun innse.

¹¹Agus gach là bha Mordecai ag imeachd fa chomhair cùirt taigh nam ban, a dh’fhiosrachadh cionnas a bha Ester, agus ciod a dh’èireadh dhi.

¹²Agus nuair a thàinig àm gach òighe gu dol a‑steach a dh’ionnsaigh an rìgh Ahasueruis, an dèidh dhi a bhith dà‑mhìos-dheug a rèir gnàth nam ban (oir mar sin choileanadh làithean an glanaidh, sia mìosan le ola mirr, agus sia mìosan le luibhean cùbhraidh, agus le nithean eile a‑chum glanadh nam ban),

¹³An sin mar seo thàinig gach òigh a dh’ionnsaigh an rìgh: gach nì a dh’iarr i thugadh dhi gu dol a‑steach leatha à taigh nam ban gu taigh an rìgh.

¹⁴Air feasgar chaidh i a‑steach, agus anns a’ mhadainn thill i gu dara taigh nam ban, fo làimh Shaasgais, caillteanach an rìgh, fear-gleidhidh nan coileabach: cha tàinig i a‑steach tuilleadh a dh’ionnsaigh an rìgh, mura do ghabh an rìgh tlachd dhi, agus gun do ghairmeadh i air a h‑ainm.

¹⁵Agus nuair a thàinig àm Esteir, nighean Abihail, bràthair-athar Mhordecai (a ghabh da ionnsaigh i mar a nighean fhèin) gu dol a‑steach a dh’ionnsaigh an rìgh, cha d’iarr i nì air bith ach na dh’òrdaich Hegai, caillteanach an rìgh, fear-gleidhidh nam ban: agus fhuair Ester gean-math nan sùilean-san uile a dh’amhairc oirre.

¹⁶Agus thugadh Ester a dh’ionnsaigh an rìgh Ahasueruis, a dh’ionnsaigh a thaighe rìoghail, anns an deicheamh mìos (is e sin mìos Thebeit) anns an t‑seachdamh bliadhna de a rìoghachadh.

¹⁷Agus ghràdhaich an rìgh Ester os cionn nam ban uile, agus fhuair i gean-math agus coibhneas na làthair os cionn nan òighean uile; agus chuir e an crùn rìoghail air a ceann, agus rinn e na bànrighinn i an àite Bhasti.

¹⁸An sin rinn an rìgh fleadh mòr da uachdarain uile agus da sheirbhisich, fleadh Esteir: agus thug e saorsa do na mòr-roinnean, agus thug e seachad tìodhlacan, mar a bu chubhaidh don rìgh.

¹⁹Agus nuair a chruinnicheadh na h‑òighean an dara uair, an sin shuidh Mordecai ann an geata an rìgh.

²⁰Cha d’innis Ester fhathast a luchd-dàimh no a sluagh, mar a dh’àithn Mordecai dhi; oir rinn Ester iarrtas Mhordecai, mar a rinn i nuair a dh’àraicheadh i maille ris.

²¹Anns na làithean sin, nuair a bha Mordecai na shuidhe ann an geata an rìgh, bha fearg air Bigtan agus Teres, dithis de chaillteanaich an rìgh, dhiubhsan a bha a’ coimhead an dorais, agus dh’iarr iad làmh a chur anns an rìgh Ahasuerus.

²²Agus fhuair Mordecai fios air an nì sin, agus dh’innis e e do Ester a’ bhànrighinn; agus dh’innis Ester e don rìgh ann an ainm Mhordecai.

²³Agus rannsaicheadh an nì, agus fhuaireadh a‑mach e, agus chrochadh suas iad le chèile air crann: agus sgrìobhadh e ann an leabhar nan eachdraidh am fianais an rìgh.