Read Scots Gaelic 1992 – Am Bìoball Gàidhlig 199 Dara Leabhar Mhaois Don Ainm Ecsodus 38 Bible Online

Dara Leabhar Mhaois Don Ainm Ecsodus 38 - Scots Gaelic 1992 – Am Bìoball Gàidhlig 199 bible

Dara Leabhar Mhaois Don Ainm Ecsodus 38

¹Agus rinn e altair na h‑ìobairt-loisgte de fhiodh sitim: còig làmhan-coille a fad, agus còig làmhan-coille a leud (bha i ceithir-cheàrnach) agus trì làmhan-coille a h‑àirde.

²Agus rinn e a h‑adhaircean air a ceithir oisnean: bha a h‑adhaircean den nì cheudna; agus chòmhdaich e thairis i le umha.

³Agus rinn e uile shoithichean na h‑altarach, na h‑aighnean, agus na sluasaidean, agus na cuachan, agus na greimichean, agus na h‑aighnean teine: a soithichean uile rinn e de umha.

⁴Agus rinn e don altair cliath de lìon-obair umha, fo a cuairt gu h‑ìosal, gu ruig a meadhon.

⁵Agus thilg e ceithir failbheagan do cheithir oisnean na clèith umha, gu bhith nan àitean do na bataichean.

⁶Agus rinn e na bataichean de fhiodh sitim, agus chòmhdaich e thairis iad le umha.

⁷Agus chuir e na bataichean anns na failbheagan air taobhan na h‑altarach, a‑chum a giùlan leo: fàs le bùird rinn e i.

⁸Agus rinn e an soitheach-ionnlaid de umha, agus a chas de umha, de sgàthanan nam ban, a chruinnich nam buidhnean aig doras pàillean a’ choitheanail.

⁹Agus rinn e a’ chùirt air an taobh mu dheas, ris an àird a deas: bha cùirteanan na cùirte de anart grinn toinnte, ceud làmh-choille air fad;

¹⁰Am puist fichead, agus am buinn umha fichead; bha cromagan nam post agus an cuairteagan de airgead.

¹¹Agus air an taobh mu thuath, bha na cùirteanan ceud làmh-choille; am puist fichead, agus am buinn umha fichead: cromagan nam post agus an cuairteagan de airgead.

¹²Agus air an taobh an iar bha cùirteanan lethcheud làmh-choille; am puist deich, agus am buinn deich: cromagan nam post agus an cuairteagan de airgead.

¹³Agus air an taobh an ear ris an àird an ear, lethcheud làmh-choille.

¹⁴Bha cùirteanan aon taoibh den gheata còig làmhan-coille deug; am puist trì, agus am buinn trì.

¹⁵Agus airson an taoibh eile de gheata na cùirte, air an làimh seo agus air an làimh ud, bha cùirteanan chòig làmhan-coille deug; am puist trì agus am buinn trì.

¹⁶Bha cùirteanan na cùirte uile mun cuairt de anart grinn toinnte.

¹⁷Agus bha buinn nam post de umha; cromagan nam post, agus an cuairteagan de airgead, agus còmhdach an ceann de airgead; agus bha uile phuist na cùirte air an ceangal mun cuairt le airgead.

¹⁸Agus bha am brat airson geata na cùirte na obair shnàthaid de ghorm, agus de chorcar, agus de sgàrlaid, agus de anart grinn toinnte: agus b’e fichead làmh-choille a fhad agus b’e a àirde anns an leud còig làmhan-coille, a’ co‑fhreagairt do chùirteanan na cùirte:

¹⁹Agus am puist ceithir, agus am buinn umha ceithir; an cromagan de airgead, agus còmhdach an ceann, agus an cuairteagan de airgead.

²⁰Agus bha uile phinneachan a’ phàillein, agus na cùirte mun cuairt, de umha.

²¹Is e sin àireamh nithean a’ phàillein, pàillean na Fianais, mar a dh’àirmheadh iad, a rèir àithne Mhaois, airson seirbhis nan Lèbhitheach le làimh Itamair mhic Aaroin an sagart.

²²Agus rinn Besalil mac Uri, mhic Shur, de threubh Iùdah, gach nì a dh’àithn an Tighearna do Mhaois;

²³Agus maille ris Aholiab, mac Ahisamaich, de threubh Dhain, gearradair, agus obraiche ealanta, agus fear obrach-grèise ann an gorm, agus ann an corcar, agus ann an sgàrlaid, agus ann an anart grinn.

²⁴B’e an t‑òr uile a chuireadh am feum anns an obair, ann an uile obair an ionaid naoimh, eadhon òr an tabhartais; naoi tàlannan fichead, agus seachd ceud agus deich secel ar fhichead, a rèir secel an ionaid naoimh.

²⁵Agus b’e airgead na muinntir a dh’àirmheadh den choitheanal, ceud tàlann, agus mìle agus seachd ceud agus còig-seceil-dheug agus trì-fichead, a rèir secel an ionaid naoimh.

²⁶Becah airson gach fir, is e sin leth seceil, a rèir secel an ionaid naoimh, airson gach aoin a chaidh gu bhith air àireamh, o fhichead bliadhna a dh’aois agus os a chionn, airson sia ceud mìle agus trì mìle agus còig ceud agus lethcheud fear.

²⁷Agus den cheud tàlann airgid thilgeadh buinn an ionaid naoimh, agus buinn an roinn-bhrait; ceud bonn den cheud tàlann, tàlann do gach bonn.

²⁸Agus den mhìle agus seachd ceud agus còig-seceil-dheug agus trì-fichead, rinn e cromagan do na puist, agus chòmhdaich e an cinn, agus chuir e cuairteagan man timcheall.

²⁹Agus b’e umha an tabhartais deich agus trì-fichead tàlann, agus dà mhìle agus ceithir cheud secel.

³⁰Agus rinn e le sin na buinn do dhoras pàillean a’ choitheanail, agus an altair umha, agus a’ chliath umha aice, agus soithichean na h‑altarach uile,

³¹Agus buinn na cùirte mun cuairt, agus buinn geata na cùirte, agus uile phinneachan a’ phàillein, agus uile phinneachan na cùirte mun cuairt.