Read Scots Gaelic 1992 – Am Bìoball Gàidhlig 199 Leabhar Iob 12 Bible Online

Leabhar Iob 12 - Scots Gaelic 1992 – Am Bìoball Gàidhlig 199 bible

Leabhar Iob 12

¹Agus fhreagair Iob, agus thubhairt e,

²Chan eil teagamh nach sibhse an sluagh, agus maille ribhse bàsaichidh gliocas!

³Ach agamsa tha tuigse, mar a tha agaibhse; chan ìsle mise na sibhse: agus cò aig nach eil fhios air an leithidean sin?

⁴Mar neach a tha na bhall-magaidh aig a charaid tha mise, a ghairmeas air Dia, agus freagraidh e e: na bhall-fochaid tha an duine ceart ionraic.

⁵Mar lòchran fo thàir ann an smuaintean an tì a tha aig fois, bidh esan a bhios ullamh gu sleamhnachadh le a chois.

⁶Sìochail bidh pàilleanan chreachadairean; agus tèarainte bidh iadsan a bhrosnaicheas Dia; don tug Dia nì nan làimh.

⁷Ach feòraich a‑nis de na h‑ainmhidhean, agus teagaisgidh iad thu; agus de eunlaith nan speur, agus innsidh iad dhut:

⁸No labhair ris an talamh, agus teagaisgidh e thu; agus cuiridh iasg na mara an cèill dhut.

⁹Cò aig nach eil fhios a‑thaobh nan nithean seo uile, gur i làmh an Tighearna a rinn seo,

¹⁰Aig a bheil na làimh anam gach nì beò, agus anail gach uile fheòil dhaoine?

¹¹Nach dearbh a’ chluas briathran? Agus nach blais am beul a bhiadh?

¹²Anns na h‑aosda tha gliocas; agus ann am fad làithean tuigse.

¹³Maille ris-san tha gliocas agus neart; aigesan tha comhairle agus tuigse.

¹⁴Feuch, brisidh e sìos, agus cha togar suas: druididh e suas duine, agus chan fhosglar.

¹⁵Feuch, cumaidh e na h‑uisgeachan air an ais, agus tiormaichidh iad suas; agus cuiridh e a‑mach iad, agus tilgidh iad bun-os‑cionn an talamh.

¹⁶Aigesan tha neart agus gliocas: is leis-san esan a mheallar, agus esan a mheallas.

¹⁷Cuiridh e air falbh comhairlich creachte, agus de bhritheamhan nì e amadain.

¹⁸Cuibhreach rìghrean sgaoilidh e, agus crioslaichidh e crios air an leasraidh.

¹⁹Cuiridh e air falbh uachdarain creachte, agus tilgidh e sìos na cumhachdaich.

²⁰Atharraichidh e cainnt nam fìrinneach, agus bheir e air falbh tuigse nan aosmhor.

²¹Taomaidh e tàir air àrd-uaislean agus lagaichidh e neart nan daoine treuna.

²²Taisbeanaidh e nithean doimhne à dorchadas, agus bheir e sgàil a’ bhàis gu solas.

²³Meudaichidh e na cinnich, agus sgriosaidh e iad: farsaingichidh e na cinnich, agus cumhangaichidh e iad.

²⁴Bheir e air falbh cridhe ceannardan sluagh na talmhainn, agus cuiridh e air seachran iad ann am fàsach as eugmhais slighe.

²⁵Smeuraichidh iad anns an dorchadas, agus iad gun solas; agus bheir e orra tuisleachadh mar dhuine air mhisg.