Read Scots Gaelic 1992 – Am Bìoball Gàidhlig 199 Leabhar Iob 27 Bible Online

Leabhar Iob 27 - Scots Gaelic 1992 – Am Bìoball Gàidhlig 199 bible

Leabhar Iob 27

¹Agus bhuanaich Iob na chosamhlachd a labhairt a‑mach, agus thubhairt e,

²Mar as beò Dia a thug air falbh mo bhreitheanas, agus an t‑Uile-chumhachdach a chràidh m’anam,

³Cho fad is a bhios m’anail annam, agus spiorad Dhè ann am chuinneinean,

⁴Cha labhair mo bhilean aingidheachd, agus cha chan mo theanga cealg.

⁵Nar leigeadh Dia gun saorainn sibh: gus am bàsaich mi, chan atharraich mi m’ionracas uam.

⁶Ann am fhìreantachd fanaidh mi, agus cha leig mi uam i; cha mhaslaich mo chridhe mi rè mo làithean.

⁷Mar an t‑aingidh biodh mo nàmhaid; agus esan a dh’èireas suas am aghaidh mar an t‑eucorach.

⁸Oir ciod e dòchas a’ chealgair, ged a bhuanaich e, nuair a bheir Dia air falbh a anam?

⁹An èisd Dia ri a ghlaodh, nuair a thig àmhghar air?

¹⁰Anns an Uile-chumhachdach an gabh e tlachd? An gairm e air Dia gach àm?

¹¹Teagaisgidh mi sibh le làimh Dhè; an nì a tha aig an Uile-chumhachdach, cha cheil mi.

¹²Feuch, chunnaic sibh fhèin uile e; carson, matà, a tha sibh cho ro‑fhaoin?

¹³Is i seo cuibhreann an duine aingidh aig Dia, agus oighreachd luchd-fòirneirt a gheibh iad on Uile-chumhachdach.

¹⁴Ma dh’fhàsas a mhic lìonmhor, is ann airson a’ chlaidheimh; agus cha sàsaichear a shliochd le aran.

¹⁵Adhlaicear iadsan a mhaireas na dhèidh anns a’ bhàs; agus cha ghuil a bhantraichean.

¹⁶Ged chàrn e suas airgead mar an duslach, agus ged dheasaich e aodach mar an làthach;

¹⁷Deasaichidh e e, ach cuiridh an t‑ionracan air e; agus roinnidh an neochiontach an t‑airgead.

¹⁸Togaidh e mar an leòmann a thaigh, agus mar bhothan a nì am fear-coimhead.

¹⁹Laighidh an saoibhir sìos, ach cha chruinnichear e: fosglaidh e a shùilean, agus chan eil e ann.

²⁰Glacaidh uamhasan e mar uisgeachan: anns an oidhche goididh doineann air falbh e.

²¹Bheir a’ ghaoth an ear leatha e, agus siùbhlaidh e; agus le iomaghaoith grad-ghluaisidh i as a àit e.

²²Oir caithidh Dia air, agus cha chaomhain e: bu mhiann leis teicheadh as a làimh.

²³Buailidh daoine am basan ris, agus le sgeig fuadaichidh iad as a àit e.