Read Scots Gaelic 1992 – Am Bìoball Gàidhlig 199 Leabhar Iob 28 Bible Online

Leabhar Iob 28 - Scots Gaelic 1992 – Am Bìoball Gàidhlig 199 bible

Leabhar Iob 28

¹Gu cinnteach tha dol a‑mach aig an airgead, agus àit aig an òr anns an leagh iad e.

²Bheirear iarann as an talamh, agus leaghar a’ chlach na h‑umha.

³Chuir e crìoch air an dorchadas; agus rannsaichidh e a‑mach gach iomlaine, clachan duibhre agus sgàil a’ bhàis.

⁴Brisidh an sruth a‑mach on luchd-àiteachaidh; dearmadar iad leis a’ chois; tiormaichear suas iad; o dhaoine siùbhlaidh iad.

⁵A‑thaobh na talmhainn, aisde thig aran; agus foidhpe tionndaidhear suas amhail teine:

⁶Is iad a clachan àite na saphir; agus tha duslach òir aice:

⁷Ceum nach aithne don eunlaith, agus nach faca sùil na fainge.

⁸Cha do shaltair cuileanan an leòmhainn air, agus cha deachaidh an leòmhann garg seachad air.

⁹Air a’ charraig cuiridh e a‑mach a làmh: tilgidh e bun-os‑cionn na beanntan.

¹⁰Anns na creagan bheir e air aibhnichean briseadh a‑mach; agus chì a shùil gach nì luachmhor.

¹¹Ceanglaidh e na h‑aibhnichean o dhol thairis; agus an nì a tha falaichte bheir e gu solas.

¹²Ach cia as a gheibhear gliocas? Agus càit a bheil ionad na tuigse?

¹³Chan aithne do dhuine a luach; agus chan fhaighear i ann an tìr nam beò.

¹⁴Their an doimhne, Chan eil i annamsa; agus their a’ mhuir, Chan eil i maille riumsa.

¹⁵Cha toirear òr air a son, agus cha tomhaisear airgead mar a luach.

¹⁶Cha mheasar i le òr na h‑Ophir, leis an onics luachmhoir, no leis an t‑saphir.

¹⁷Cha choimeasar òr no leug rithe; agus cha bhi a malairt le seudan den òr fhìorghlan.

¹⁸Air coireal no neamhnaidean cha luaidhear; oir tha luach gliocais os cionn nan clach as uaisle.

¹⁹Cha choimeasar topas na h‑Etiopia rithe: leis an òr fhìorghlan cha mheasar i.

²⁰Cia as, matà, a thig gliocas? Agus càit a bheil ionad na tuigse?

²¹Oir tha i am falach o shùilean nan uile bheò; agus o eunlaith an adhair tha i an cleith.

²²Thubhairt lèirsgrios agus am bàs, Le ar cluasan chuala sinn a cliù.

²³Tuigidh Dia a slighe, agus is aithne dha a h‑àite:

²⁴Oir gu crìochan na talmhainn amhaircidh esan; fo na nèamhan uile chì e:

²⁵A‑chum gun dèan e cudthrom den ghaoith, agus gun tomhais e na h‑uisgeachan le tomhas.

²⁶Nuair a rinn e reachd don uisge, agus slighe do dhealanach na tàirneanaich;

²⁷An sin chunnaic e i, agus dh’fhoillsich e i; dheasaich e i, seadh, agus rannsaich e a‑mach i.

²⁸Agus thubhairt e ris an duine, Feuch, eagal an Tighearna, is e sin gliocas; agus an t‑olc a thrèigsinn, tuigse.