Read Scots Gaelic 1992 – Am Bìoball Gàidhlig 199 Leabhar Iob 37 Bible Online

Leabhar Iob 37 - Scots Gaelic 1992 – Am Bìoball Gàidhlig 199 bible

Leabhar Iob 37

¹Mar an ceudna uime seo chriothnaich mo chridhe, agus charaicheadh as a àit e.

²Eisdibh gu furachair ri fuaim a ghutha, agus an torman a thèid a‑mach as a bheul.

³Fo na nèamhan uile stiùraidh e e, agus a dhealanach gu crìochan na talmhainn.

⁴Na dhèidh sin beucaidh guth: nì e tàirneanach le guth a mhòralachd; agus cha chùm e air an ais iad nuair a chluinnear a ghuth.

⁵Nì Dia tàirneanach le a ghuth gu h‑iongantach; nì e nithean mòra do‑thuigsinn.

⁶Oir ris an t‑sneachd their e, Bi‑sa air an talamh; mar an ceudna ris an uisge mheanbh, agus ri uisge mòr a neirt.

⁷Air làimh gach duine cuiridh e seula, a‑chum gun aithnich na h‑uile dhaoine a obair-san.

⁸Agus thèid na fiadh-bheathaichean a‑steach dan garaidhean, agus nan àitean-tàimh laighidh iad.

⁹As an àird a deas thig an ioma-ghaoth, agus fuachd as an àird a tuath.

¹⁰Le anail Dhè bheirear reodhadh; cumhangaichear leud nan uisgeachan.

¹¹Mar an ceudna le uisgeachadh sgìthichidh e an neul tiugh: sgaoilidh e a neul soillseach.

¹²Agus tionndaidhear mun cuairt e le a chomhairle; a‑chum gun dèan iad ge bè nì a dh’àithneas e dhaibh air aghaidh a’ chruinne-chè.

¹³Bheir e air teachd, mas ann a‑chum smachdachaidh, no airson a fhearainn, no airson tròcair.

¹⁴Eisd ri seo, a Iob; seas, agus tabhair fa‑near obraichean iongantach Dhè.

¹⁵A bheil fhios agad cuin a dh’òrdaich Dia iad, agus a thug e air solas a neòil dealrachadh?

¹⁶A bheil fhios agad air cothromachadh nan neul, air obraichean iongantach an tì a tha iomlan ann an eòlas?

¹⁷Cionnas a tha d’aodach blàth, nuair a chiùinichear an talamh leis a’ ghaoith a deas?

¹⁸An do sgaoil thu a‑mach maille ris-san na speuran, a tha làidir, mar sgàthan leaghte?

¹⁹Nochd dhuinn ciod a their sinn ris: chan urrainn sinn ar cainnt a chur an òrdagh a‑thaobh dorchadais.

²⁰An innsear dha nuair a labhras mi? Ma labhras duine, gu cinnteach sluigear suas e.

²¹Agus a‑nis chan fhaic daoine an solas dealrach a tha anns na neòil: ach siùbhlaidh a’ ghaoth, agus glanaidh i iad.

²²As an àird a tuath thig soineann: aig Dia tha mòrachd uamhasach.

²³An t‑Uile-chumhachdach, chan urrainn sinn fhaghail a‑mach: tha e òirdheirc ann an cumhachd, agus ann am breitheanas, agus ann an làn cheartas: cha sàraich e.

²⁴Uime sin bidh eagal air daoine roimhe: cha bhi meas aige air duine sam bith a bhios glic an cridhe.