Read Scots Gaelic 1992 – Am Bìoball Gàidhlig 199 Leabhar Iob 4 Bible Online

Leabhar Iob 4 - Scots Gaelic 1992 – Am Bìoball Gàidhlig 199 bible

Leabhar Iob 4

¹An sin fhreagair Eliphas an Temanach, agus thubhairt e,

²Ma dh’fheuchas sinn ri labhairt riut, an gabh thu gu h‑olc e? Ach cò as urrainn e fhèin a chumail o labhairt?

³Feuch, theagaisg thusa mòran, agus neartaich thu na làmhan laga.

⁴Esan a bha a’ tuiteam chùm do bhriathran suas, agus na glùinean anfhann neartaich thu.

⁵Ach a‑nis thàinig e ort, agus ghabh thu gu h‑olc e: bhean e riut, agus tha thu fo amhluadh.

⁶Nach e d’eagal diadhaidh d’earbsa, agus ionracas do shlighean do dhòchas?

⁷Cuimhnich, guidheam ort, cò e an neochiontach a sgriosadh? No càit an do ghearradh as na h‑ionracain?

⁸A rèir mar a chunnaic mise, iadsan a threabhas euceart, agus a chuireas aingidheachd, buainidh iad e.

⁹Le sèideadh Dhè sgriosar iad, agus le anail a shròine cuirear as dhaibh.

¹⁰Tha beucaich an leòmhainn, agus guth an leòmhainn ghairg, agus fiaclan nan leòmhann òga, air am briseadh.

¹¹Tha seann leòmhann a’ bàsachadh a dhìth cobhartaich, agus sgarar o chèile cuileanan an leòmhainn bhoirinn.

¹²Ach am ionnsaigh-sa thugadh facal gu h‑uaigneach, agus ghabh mo chluas beagan dheth.

¹³Ann an smuaintean o aislingean na h‑oidhche, nuair a thuiteas cadal trom air daoine,

¹⁴Thàinig eagal orm agus crith, a thug air mo chnàmhan gu lèir criothnachadh:

¹⁵Agus ghabh spiorad seachad ro mo ghnùis; sheas falt mo chuirp:

¹⁶Sheas e, ach cha d’aithnich mi a chruth: dealbh fa chomhair mo shùl-tosd, agus chuala mi guth:

¹⁷Am bi duine nas ceirte na Dia? Am bi fear nas glaine na a Chruithear?

¹⁸Feuch, as a sheirbhisich chan earb e; agus as leth a ainglean cuiridh e amaideachd:

¹⁹Nach lugha na sin asdasan, a tha nan còmhnaidh ann an taighean creadha, aig a bheil am bunait anns an duslach, a bhruthar ron leòmann?

²⁰O mhadainn gu feasgar bruthar iad; gun neach ann ga thoirt fa‑near, thèid as dhaibh gu bràth.

²¹Nach siubhail am feabhas air falbh maille riu? Bàsaichidh iad, agus chan ann le gliocas.