Read Scots Gaelic 1992 – Am Bìoball Gàidhlig 199 Leabhar nan Salm 102 Bible Online

Leabhar nan Salm 102 - Scots Gaelic 1992 – Am Bìoball Gàidhlig 199 bible

Leabhar nan Salm 102

¹Ùrnaigh airson duine truagh nuair a bhios e air a shàrachadh, agus a thaomas e a ghearan an làthair an Tighearna. A Thighearna, èisd rim ùrnaigh, agus thigeadh mo ghlaodh ad ionnsaigh.

²Na falaich do ghnùis uam ann an là mo theinn; aom do chluas rium anns an là air an gairm mi ort; èisd rium gu grad.

³Oir tha mo làithean air teireachdainn mar dheataich, agus tha mo chnàmhan air an losgadh mar theintein.

⁴Tha mo chridhe air a bhualadh agus air seargadh mar fheur, air chor is nach cuimhne leam m’aran ithe.

⁵Le guth m’osnaich, lean mo chnàmhan rim fheòil.

⁶Tha mi cosmhail ri pelican an fhàsaich; tha mi mar chomhachaig nan ionad aonaranach.

⁷Tha mi ri faire, agus tha mi mar eun na aonar air mullach taighe.

⁸Air feadh an là tha mo naimhdean gam mhaslachadh; agus iadsan a tha air bhoile rium, mhionnaich iad am aghaidh.

⁹Oir dh’ith mi luath mar aran, agus mheasg mi mo dheoch lem dheòir,

¹⁰Trìd do chorraich agus d’fheirge, oir thog thu mi suas, agus leag thu mi sìos.

¹¹Tha mo làithean mar sgàil ag aomadh sìos, agus tha mi fhèin mar fheur air seargadh.

¹²Ach mairidh tusa, a Thighearna, gu bràth, agus do chuimhne o linn gu linn.

¹³Eiridh tusa, nì thu tròcair air Sion, oir tha an t‑àm gu deagh-ghean a nochdadh dhi, seadh, an t‑àm suidhichte air teachd;

¹⁴Oir tha do sheirbhisich a’ gabhail tlachd na clachan, agus tha deagh rùn aca da luaithre.

¹⁵Mar sin bidh eagal air na cinnich ro ainm an Tighearna, agus air uile rìghrean na talmhainn ro a ghlòir.

¹⁶Nuair a thogas an Tighearna suas Sion, chìthear e na ghlòir.

¹⁷Bheir e an aire do ùrnaigh nan dìobarach, agus cha dèan e tàir air an athchuinge.

¹⁸Sgrìobhar seo don àl ri teachd, agus molaidh an sluagh a ghinear an Tighearna.

¹⁹Oir dh’amhairc e a‑nuas o àirde a naomhachd fhèin; o na nèamhan sheall an Tighearna air an talamh,

²⁰A chluinntinn osnaich a’ phrìosanaich, a‑chum fuasgladh orrasan a dh’òrdaicheadh a‑chum bàis;

²¹A‑chum ainm an Tighearna a chur an cèill ann an Sion, agus a chliù ann an Ierusalem;

²²Nuair a chruinnichear na slòigh le chèile, agus na rìoghachdan gu seirbhis a dhèanamh don Tighearna.

²³Chlaoidh e anns an t‑slighe mo neart; ghiorraich e mo làithean.

²⁴Thubhairt mi, Mo Dhia, na toir air falbh mi ann am meadhon mo làithean; tha do bhliadhnachan-sa air feadh nan uile linn.

²⁵O chian leag thu bunaitean na talmhainn, agus is iad na nèamhan obair do làmh.

²⁶Thèid as dhaibhsan, ach mairidh tusa; fàsaidh iadsan uile sean mar aodach; mar thrusgan caochlaidh tu iad, agus bidh iad air an caochladh.

²⁷Ach is tusa an Tì ceudna, agus cha chrìochnaichear do bhliadhnachan.

²⁸Mairidh clann do sheirbhiseach, agus daingnichear an sliochd ad fhianais.