Read Scots Gaelic 1992 – Am Bìoball Gàidhlig 199 Leabhar nan Salm 104 Bible Online

Leabhar nan Salm 104 - Scots Gaelic 1992 – Am Bìoball Gàidhlig 199 bible

Leabhar nan Salm 104

¹Beannaich an Tighearna, O m’anam! A Thighearna mo Dhia, tha thusa ro‑mhòr; le urram agus mòralachd tha thusa air do sgeadachadh.

²Tha thu a’ cur solais umad mar thrusgan, a’ sìneadh a‑mach nan nèamh mar chùirtean.

³Tha e a’ leagadh sailthean a sheòmraichean anns na h‑uisgeachan, a’ dèanamh nan neul nan carbad dha fhèin, a’ siubhal air sgiathan na gaoithe;

⁴A’ dèanamh a ainglean nan spioradan, a luchd-frithealaidh nan teine lasrach.

⁵Shuidhich e an talamh air a bhunaitean, a‑chum nach gluaiste e gu bràth.

⁶Leis an doimhneachd, mar le trusgan, chòmhdaich thu e; sheas na h‑uisgeachan os cionn nam beann.

⁷Od achmhasan-sa theich iad, o ghuth do thàirneanaich ghreas iad romhpa.

⁸Chaidh iad suas ri taobh nam beann; chaidh iad sìos air feadh nan gleann don àite a dh’òrdaich thusa dhaibh.

⁹Shuidhich thu crìoch air nach tèid iad thairis, a‑chum nach till iad a‑rìs a chòmhdachadh na talmhainn.

¹⁰Tha e a’ cur thobraichean anns na gleanntan, a tha a’ ruith air feadh nam beann.

¹¹Bheir iad deoch do uile bheathaichean na machrach; caisgidh na h‑asail fhiadhaich an ìotadh.

¹²Am fagas dhaibh còmhnaichidh eunlaith nan speur, a bhios a’ seinn am measg nan geug.

¹³Uisgichidh e na beanntan o a sheòmraichean; le toradh a ghnìomh sàsaichear an talamh.

¹⁴Bheir e air feur fàs don sprèidh, agus air luibh a‑chum seirbhis an duine, a‑chum aran a thabhairt as an talamh,

¹⁵Agus fìon a nì cridhe an duine subhach, ola a nì a ghnùis dealrach, agus aran a neartaicheas cridhe an duine.

¹⁶Tha craobhan an Tighearna làn brìgh, seudair Lebanoin a shuidhich e,

¹⁷Far an dèan na h‑eòin an neadan; aig an storc tha na craobhan giuthais mar ionad-tàimh.

¹⁸Tha na beanntan àrda nan tèarmann do na gobhair fhiadhaich, na creagan do na coineanan.

¹⁹Rinn e a’ ghealach airson aimsirean; is aithne don ghrèin mar a laigheas i.

²⁰Nì thu dorchadas, agus tha an oidhche ann; an sin snàigidh uile bheathaichean na coille a‑mach.

²¹Beucaidh na leòmhainn òga airson cobhartaich, agus ag iarraidh am bìdh air Dia.

²²Eiridh a’ ghrian, cruinnichidh iad le chèile, agus nan àitean-tàimh laighidh iad.

²³Thèid an duine a‑mach gu a obair, agus gu a shaothair gu feasgar.

²⁴Cia lìonmhor d’obraichean, a Thighearna! Ann an gliocas rinn thu iad gu lèir; tha an talamh làn led shaoibhreas.

²⁵Mar an ceudna an cuan seo a tha mòr agus farsaing, anns a bheil creutairean snàigeach gun àireamh, araon beathaichean beaga agus mòra.

²⁶An sin siùbhlaidh na longan, agus an Lebhiatan sin a dhealbh thu gu bhith a’ sùgradh ann.

²⁷Feithidh iad sin uile ortsa, a‑chum gun toir thu dhaibh am biadh na thràth.

²⁸Bheir thusa dhaibh, cruinnichidh iadsan; fosglaidh tu do làmh; sàsaichear iad le math.

²⁹Falaichidh tu do ghnùis, bidh iad fo amhluadh; bheir thu uapa an deò, eugaidh iad, agus tillidh iad rin ùir.

³⁰Cuiridh tu a‑mach do spiorad, cruthaichear iad; agus ath-nuadhaichidh tu aghaidh na talmhainn.

³¹Mairidh glòir an Tighearna gu bràth; nì an Tighearna gàirdeachas na obraichean.

³²Seallaidh e air an talamh, agus criothnaichidh e; beanaidh e ris na beanntan, agus bidh deatach dhiubh.

³³Seinnidh mise don Tighearna an cian as beò mi; canaidh mi moladh dom Dhia fhads a bhios bith agam.

³⁴Bidh mo smuaintean air milis; nì mi gàirdeachas anns an Tighearna.

³⁵Sgriosar peacaich a‑mach as an talamh, agus cha bhi na h‑aingidh ann nas mò. Beannaich an Tighearna, O m’anam. Molaibh-se an Tighearna.