Read Scots Gaelic 1992 – Am Bìoball Gàidhlig 199 Leabhar nan Salm 107 Bible Online

Leabhar nan Salm 107 - Scots Gaelic 1992 – Am Bìoball Gàidhlig 199 bible

Leabhar nan Salm 107

¹O thugaibh buidheachas don Tighearna, oir tha e math, oir gu bràth mairidh a thròcair.

²Mar seo abradh iadsan a shaoradh leis an Tighearna, a shaor e o làimh an nàmhaid;

³Agus a chruinnich e as na tìrean, on àird an ear agus on àird an iar, on àird a tuath agus on àird a deas.

⁴Chaidh iad air seachran anns an fhàsach, ann an ionad uaigneach; slighe gu baile tàimh cha d’fhuair iad.

⁵Acrach agus tartmhor, dh’fhàilnich an anam annta.

⁶An sin ghlaodh iad ris an Tighearna nan airc, agus as an teanntachdan shaor e iad;

⁷Agus threòraich e iad air slighe cheirt, a‑chum gun rachadh iad gu baile tàimh.

⁸O gum moladh daoine Dia airson a mhaitheis, agus airson a bheartan iongantach do chloinn nan daoine!

⁹Oir shàsaich e an t‑anam cìocrach, agus lìon e an t‑anam acrach le math.

¹⁰Iadsan a shuidh ann an dorchadas agus ann an sgàil a’ bhàis, ceangailte ann an truaighe agus ann an iarann,

¹¹A chionn gun do rinn iad ceannairc an aghaidh briathran Dhè, agus gun do rinn iad tàir air comhairle an Tì as àirde,

¹²Aig an do leagadh sìos an cridhe le anshocair; thuit iad, agus cha robh fear-cuideachaidh ann.

¹³An sin ghlaodh iad ris an Tighearna nan airc, agus as an teanntachdan shaor e iad.

¹⁴Thug e iad à dorchadas, agus à sgàil a’ bhàis, agus bhris e o chèile an cuibhreach.

¹⁵O gum moladh daoine an Tighearna airson a mhaitheis, agus airson a bheartan iongantach do chloinn nan daoine!

¹⁶Oir bhris e na geatachan umha, agus gheàrr e sìos na croinn iarainn.

¹⁷Bha amadain, airson an easaontais agus airson an euceartan, fo àmhghar.

¹⁸De gach biadh ghabh an anam gràin, agus thàinig iad dlùth do gheatachan bàis.

¹⁹An sin ghlaodh iad ris an Tighearna nan airc, agus as an teanntachdan shaor e iad.

²⁰Chuir e a fhacal uaithe, agus shlànaich e iad; agus shaor e iad o sgrios.

²¹O gum moladh daoine an Tighearna airson a mhaitheis, agus airson a bheartan iongantach do chloinn nan daoine!

²²Agus gun ìobradh iad ìobairtean buidheachais, agus gun cuireadh iad an cèill a ghnìomharan le luathghaire!

²³Iadsan a thèid sìos don fhairge air longan, a nì obair air uisgeachan mòra,

²⁴Chì iadsan gnìomharan an Tighearna, agus a bheartan iongantach anns an doimhne;

²⁵Oir labhraidh e, agus dùisgidh e a’ ghaoth dhoineannach, agus togaidh i a tonnan.

²⁶Thèid iad suas do na nèamhan, thèid iad sìos do na doimhneachdan; le àmhghar leaghaidh an anam.

²⁷Thèid iad thuige agus uaithe, agus tuislichidh iad mar dhuine air mhisg; agus thèid as dan cèill uile.

²⁸An sin glaodhaidh iad ris an Tighearna nan airc, agus as an teanntachdan bheir e iad.

²⁹Cuiridh e an doineann gu fèith, agus bidh a tonnan nan tàmh.

³⁰An sin bidh iad ait, a chionn gum bi iad sàmhach; agus bheir e iad don chaladh as miannach leo.

³¹O gum moladh daoine an Tighearna airson a mhaitheis, agus airson a bheartan iongantach do chloinn nan daoine!

³²Agus gun àrdaicheadh iad e ann an coitheanal an t‑sluaigh, agus ann a àite-suidhe nan seanairean gum moladh iad e!

³³Nì e aibhnichean nam fàsach, agus tobraichean uisge nan talamh tartmhor.

³⁴Fearann beartach nì e fàs airson aingidheachd a luchd-àiteachaidh.

³⁵Nì e fàsach na linne uisge, agus fearann tioram na thobraichean uisge.

³⁶Agus an sin bheir e air na h‑acraich còmhnaidh a ghabhail, agus deasaichidh iad baile tàimh;

³⁷Agus sìol-chuiridh iad achaidhean, agus suidhichidh iad fìonliosan, agus bheir iad toradh pailt uapa.

³⁸Agus beannaichidh e iad, agus fàsaidh iad ro‑lìonmhor; agus cha lùghdaich e an sprèidh.

³⁹Ach ma pheacaicheas iad, lùghdaichear agus leigear sìos iad le fòirneart, olc agus doilgheas.

⁴⁰Dòirtidh e tarcais air àrd-uaislean, agus cuiridh e air seachran iad ann am fàsach as eugmhais slighe.

⁴¹Agus togaidh e suas am bochd o thruaighe, agus nì e teaghlaichean dha mar threud.

⁴²Chì na fìreanan seo, agus bidh iad ait, agus druididh gach euceart a beul.

⁴³Cò a tha glic, agus a bheir fa‑near na nithean sin? Tuigidh esan coibhneas gràdhach an Tighearna.