Read Scots Gaelic 1992 – Am Bìoball Gàidhlig 199 Leabhar nan Salm 111 Bible Online

Leabhar nan Salm 111 - Scots Gaelic 1992 – Am Bìoball Gàidhlig 199 bible

Leabhar nan Salm 111

¹Molaibh-se an Tighearna. Bheir mise cliù don Tighearna lem uile chridhe, ann an coinneamh nam fìrean agus anns a’ choitheanal.

²Tha gnìomharan an Tighearna mòr; rannsaichear iad leòsan uile aig a bheil tlachd annta.

³Urramach agus glòrmhor tha a obair-san; mairidh a fhìreantachd gu bràth.

⁴Chuir e a ghnìomharan iongantach air chuimhne; gràsmhor agus truacanta tha an Tighearna.

⁵Thug e lòn dhaibhsan don eagal e; cuimhnichidh e gu bràth a choicheangal.

⁶Chuir e neart a obrach an cèill da shluagh, le oighreachd nan cinneach a thabhairt dhaibh.

⁷Is iad fìrinn agus ceartas gnìomharan a làmh; tha a àitheantan-san uile fìor.

⁸Seasmhach tha iad gu saoghal nan saoghal, dèante ann am fìrinn agus ann an ceartas.

⁹Chuir e saorsa a dh’ionnsaigh a shluaigh; dh’àithn e a choicheangal gu bràth; is naomh agus urramach a ainm-san.

¹⁰Is e eagal an Tighearna toiseach a’ ghliocais; tha deagh thuigse acasan uile a nì a àitheantan-san; mairidh a chliù gu bràth.