Read Scots Gaelic 1992 – Am Bìoball Gàidhlig 199 Leabhar nan Salm 112 Bible Online

Leabhar nan Salm 112 - Scots Gaelic 1992 – Am Bìoball Gàidhlig 199 bible

Leabhar nan Salm 112

¹Molaibh-se an Tighearna. Is beannaichte an duine air am bi eagal an Tighearna, a ghabhas tlachd mòr da àitheantan.

²Làidir anns an tìr bidh a shliochd; beannaichear ginealach nam fìrean.

³Bidh maoin agus saoibhreas na thaigh, agus mairidh a fhìreantachd gu bràth.

⁴Ann an dorchadas èiridh solas do na fìreanan; gràsmhor agus làn truacantais, agus cothromach tha an Tighearna.

⁵Is math don duine a bhios truacanta agus coingheallach, a riaghlas a ghnothaichean gu ceart,

⁶Oir gu bràth cha ghluaisear e; air chuimhne gu bràth bidh am fìrean.

⁷Ro dhroch sgeul cha bhi eagal air; tha a chridhe suidhichte, ag earbsa as an Tighearna.

⁸Tha a chridhe air a shocrachadh; cha bhi eagal air, gus am faic e crìoch a naimhdean.

⁹Sgaoil e, thug e do na bochdan; mairidh a fhìreantachd gu bràth; mairidh a adharc le urram.

¹⁰Chì an droch dhuine, agus bidh fearg air; casaidh e a fhiaclan, agus seargaidh e as; sgriosar miann nan aingidh.