Read Scots Gaelic 1992 – Am Bìoball Gàidhlig 199 Leabhar nan Salm 115 Bible Online

Leabhar nan Salm 115 - Scots Gaelic 1992 – Am Bìoball Gàidhlig 199 bible

Leabhar nan Salm 115

¹Tabhair glòir, a Thighearna, chan ann dhuinne, chan ann dhuinne, ach dod ainm fhèin, airson do thròcair agus airson d’fhìrinn.

²Carson a theireadh na cinnich, Càit a‑nis a bheil an Dia?

³Ach tha ar Dia-ne anns na nèamhan, agus rinn e gach nì a b’àill leis.

⁴Is airgead agus òr an iodhalan-san, obair làmhan dhaoine!

⁵Tha beòil aca, ach cha labhair iad; sùilean aca, ach chan fhaic iad.

⁶Tha cluasan aca, ach cha chluinn iad; srònan aca, ach cha ghabh iad fàile.

⁷Tha làmhan aca, ach cha làimhsich iad; casan aca, ach chan imich iad; agus cha labhair iad tro an sgòrnan.

⁸Cosmhail riu fhèin tha iadsan a nì iad, agus gach neach a dh’earbas asda.

⁹Earbaidh taigh Israeil as an Tighearna; is esan an còmhnadh agus an sgiath.

¹⁰Earbaidh taigh Aaroin as an Tighearna; is esan an còmhnaidh agus an sgiath.

¹¹Iadsan air am bi eagal an Tighearna, earbadh iad as an Tighearna; is esan an còmhnaidh agus an sgiath.

¹²Bha an Tighearna cuimhneachail oirnn; beannaichidh e sinn; beannaichidh e taigh Israeil; beannaichidh e taigh Aaroin.

¹³Beannaichidh e iadsan air am bi eagal an Tighearna, na big agus na mòir.

¹⁴Cuiridh an Tighearna sibh ann an lìonmhorachd, sibh fhèin agus ur clann.

¹⁵Is beannaichte sibhse on Tighearna, a rinn na nèamhan agus an talamh.

¹⁶Is leis an Tighearna na nèamhan, eadhon na nèamhan; ach an talamh thug e do chloinn nan daoine.

¹⁷Cha mhol na mairbh an Tighearna, no iadsan uile a thèid sìos tosdach don uaigh.

¹⁸Ach beannaichidh sinne an Tighearna, on àm seo agus gu bràth. Molaibh-se an Tighearna.