Read Scots Gaelic 1992 – Am Bìoball Gàidhlig 199 Leabhar nan Salm 136 Bible Online

Leabhar nan Salm 136 - Scots Gaelic 1992 – Am Bìoball Gàidhlig 199 bible

Leabhar nan Salm 136

¹O thugaibh buidheachas don Tighearna, oir tha e math, oir gu bràth mairidh a thròcair.

²Thugaibh buidheachas do Dhia nan diathan, oir gu bràth mairidh a thròcair.

³Thugaibh buidheachas do Thighearna nan tighearnan, oir gu bràth mairidh a thròcair;

⁴Dhàsan na aonar a nì iongantasan mòra, oir gu bràth mairidh a thròcair;

⁵Dhàsan a rinn na nèamhan le gliocas, oir gu bràth mairidh a thròcair;

⁶Dhàsan a shìn an talamh os cionn nan uisgeachan, oir gu bràth mairidh a thròcair;

⁷Dhàsan a rinn solais mhòra, oir gu bràth mairidh a thròcair;

⁸A’ ghrian a riaghladh an là, oir gu bràth mairidh a thròcair;

⁹A’ ghealach agus na reultan a riaghladh na h‑oidhche, oir gu bràth mairidh a thròcair;

¹⁰Dhàsan a bhuail na h‑Eiphitich nan ciad-ghinean, oir gu bràth mairidh a thròcair;

¹¹Agus a thug a‑mach Israel as am meadhon, oir gu bràth mairidh a thròcair;

¹²Le làimh thrèin, agus le gàirdean sìnte a‑mach, oir gu bràth mairidh a thròcair;

¹³Dhàsan a roinn a’ mhuir ruadh na roinnean, oir gu bràth mairidh a thròcair;

¹⁴Agus a thug air Israel dol tro a meadhon, oir gu bràth mairidh a thròcair;

¹⁵Ach a thilg Phàraoh agus a armailt bun-os‑cionn anns a’ mhuir ruaidh, oir gu bràth mairidh a thròcair.

¹⁶Dhàsan a threòraich a shluagh tron fhàsach, oir gu bràth mairidh a thròcair;

¹⁷Dhàsan a bhuail rìghrean mòra, oir gu bràth mairidh a thròcair;

¹⁸Agus a mharbh rìghrean treuna, oir gu bràth mairidh a thròcair;

¹⁹Sihon rìgh nan Amorach, oir gu bràth mairidh a thròcair;

²⁰Agus Og rìgh Bhasain, oir gu bràth mairidh a thròcair;

²¹Agus a thug am fearann mar oighreachd, oir gu bràth mairidh a thròcair;

²²Mar oighreachd do Israel, a òglach fhèin, oir gu bràth mairidh a thròcair;

²³A chuimhnich oirnn nar staid ìosail, oir gu bràth mairidh a thròcair;

²⁴Agus a shaor sinn o ar naimhdean, oir gu bràth mairidh a thròcair;

²⁵A tha a’ tabhairt bìdh do gach feòil, oir gu bràth mairidh a thròcair.

²⁶O thugaibh buidheachas do Dhia nan nèamh, oir gu bràth mairidh a thròcair.