Read Scots Gaelic 1992 – Am Bìoball Gàidhlig 199 Leabhar nan Salm 146 Bible Online

Leabhar nan Salm 146 - Scots Gaelic 1992 – Am Bìoball Gàidhlig 199 bible

Leabhar nan Salm 146

¹Molaibh-se an Tighearna; mol an Tighearna, O m’anam.

²Molaidh mi an Tighearna an cian as beò mi; seinnidh mi cliù dom Dhia am feadh a bhios bith agam.

³Na earbaibh à uachdarain, à mac duine sam bith, anns nach eil furtachd.

⁴Thèid a anail as, tillidh e ga ùir; anns an là sin fhèin thèid as da smuaintean.

⁵Is sona an tì aig a bheil Dia Iàcoib mar a chobhair, aig a bheil a dhòchas anns an Tighearna a Dhia,

⁶A rinn nèamh agus talamh, a’ mhuir agus gach nì a tha annta; a ghleidheas fìrinn gu bràth;

⁷A chumas còir riùsan a tha fo fhòirneart, a bheir biadh do na h‑acraich. Cuiridh an Tighearna na prìosanaich fa sgaoil.

⁸Fosglaidh an Tighearna sùilean nan dall; togaidh an Tighearna suas iadsan a tha air an cromadh sìos; is ionmhainn leis an Tighearna na fìreanan.

⁹Gleidhidh an Tighearna na coigrich; togaidh e suas an dìlleachdan agus a’ bhantrach, ach tilgidh e slighe nan aingidh bun-os‑cionn.

¹⁰Rìoghaichidh an Tighearna gu bràth, do Dhia-sa, a Shion, o linn gu linn. Molaibh-se an Tighearna.