Read Scots Gaelic 1992 – Am Bìoball Gàidhlig 199 Leabhar nan Salm 149 Bible Online

Leabhar nan Salm 149 - Scots Gaelic 1992 – Am Bìoball Gàidhlig 199 bible

Leabhar nan Salm 149

¹Molaibh-se an Tighearna. Seinnibh don Tighearna òran nuadh, seinnibh a mholadh ann an coitheanal nan naomh.

²Biodh Israel aoibhneach na Chruithear; dèanadh clann Shioin gàirdeachas nan Rìgh.

³Moladh iad a ainm anns an dannsa; le tiompan agus le clàrsaich seinneadh iad dha.

⁴Oir gabhaidh an Tighearna tlachd na shluagh; nì e na daoine sèimhe sgiamhach le slàinte.

⁵Dèanadh na naoimh gàirdeachas ann an glòir; dèanadh iad iolach air an leapaichean.

⁶Biodh àrd-chliù Dhè nam beul, agus claidheamh dà fhaobhair nan làimh,

⁷A‑chum dìoghaltas a dhèanamh air na cinnich, smachdachadh goirt air na slòigh;

⁸A‑chum an rìghrean a cheangal le slabhraidhean, agus an àrd-uaislean le geimhlean iarainn;

⁹A‑chum am breitheanas a tha sgrìobhte a chur an gnìomh orra; tha an t‑urram seo aig a naoimh uile. Molaibh-se an Tighearna.