Read Scots Gaelic 1992 – Am Bìoball Gàidhlig 199 Leabhar nan Salm 21 Bible Online

Leabhar nan Salm 21 - Scots Gaelic 1992 – Am Bìoball Gàidhlig 199 bible

Leabhar nan Salm 21

¹Don àrd-fhear-ciùil. Salm le Daibhidh. Ann ad neart, a Thighearna, nì an rìgh aoibhneas; agus ann ad shlàinte cia mòr an gàirdeachas a nì e!

²Miann a chridhe thug thu dha, agus athchuinge a bhilean cha do dhiùlt thu dha. Selah.

³Oir ghabh thu roimhe le beannachadh do mhaitheis; chuir thu ma cheann coron de òr fìorghlan.

⁴Dh’iarr e beatha ort; thug thu dha fad làithean gu saoghal nan saoghal.

⁵Is mòr a ghlòir trìd do shlàinte-sa; urram agus mòralachd chuir thu air.

⁶Oir rinn thu e ro‑bheannaichte gu bràth; rinn thu e ro‑aoibhneach led ghnùis.

⁷Oir earbaidh an rìgh as an Tighearna, agus trìd tròcair an Tì as àirde, cha ghluaisear e.

⁸Gheibh do làmh a‑mach do naimhdean uile; gheibh do dheaslàmh a‑mach iadsan lem fuathach thu.

⁹Nì thu iad mar àmhainn theinntich ann an àm d’fheirge; sluigidh an Tighearna sìos iad na chorraich, agus caithidh an teine iad.

¹⁰An toradh sgriosaidh tu on talamh, agus an sliochd o chloinn nan daoine.

¹¹Oir dhealbh iad olc ad aghaidh; smaoinich iad droch smuaintean, nach b’urrainn iad a choileanadh.

¹²Uime sin bheir thu orra an cùl a thionndadh; air sreangan do bhogha gleusaidh tu do shaighdean nan aghaidh.

¹³Bi air d’àrdachadh, a Thighearna, ann ad neart; seinnidh sinne agus molaidh sinn do chumhachd.