Read Scots Gaelic 1992 – Am Bìoball Gàidhlig 199 Leabhar nan Salm 24 Bible Online

Leabhar nan Salm 24 - Scots Gaelic 1992 – Am Bìoball Gàidhlig 199 bible

Leabhar nan Salm 24

¹Salm le Daibhidh. Is leis an Tighearna an talamh agus a làn, an domhan agus iadsan a tha nan còmhnaidh ann.

²Oir shuidhich e air na cuantan e, agus shocraich e air na sruthan e.

³Cò a thèid suas gu sliabh an Tighearna, agus cò a sheasas na ionad naomh-san?

⁴Esan aig a bheil làmhan neochiontach agus cridhe glan, nach do thog a anam ri dìomhanas, agus nach do mhionnaich a‑chum ceilge.

⁵Gheibh esan beannachadh on Tighearna, agus fìreantachd o Dhia a shlàinte.

⁶Is e seo ginealach na dream a dh’iarras e, a dh’iarras do ghnùis, a Dhia Iàcoib. Selah.

⁷Togaibh, a gheatachan, ur cinn, agus bithibh air ur togail suas, a dhorsan sìorraidh, agus thig Rìgh na glòire a‑steach.

⁸Cò e seo Rìgh na glòire? An Tighearna làidir agus treun, an Tighearna treun ann an cath.

⁹Togaibh suas ur cinn, a gheatachan, agus bithibh air ur togail suas, a dhorsan sìorraidh, agus thig Rìgh na glòire a‑steach.

¹⁰Cò e seo Rìgh na glòire? Tighearna nan slògh, is esan Rìgh na glòire. Selah.