Read Scots Gaelic 1992 – Am Bìoball Gàidhlig 199 Leabhar nan Salm 33 Bible Online

Leabhar nan Salm 33 - Scots Gaelic 1992 – Am Bìoball Gàidhlig 199 bible

Leabhar nan Salm 33

¹Dèanaibh gàirdeachas anns an Tighearna, sibhse a fhìreanan; do na h‑ionraic tha cliù ciatach.

²Molaibh an Tighearna air clàrsaich; air an t‑saltair, inneal-ciùil nan deich teud, seinnibh dha.

³Canaibh dha òran nuadh; seinnibh fonn gu h‑ealanta, le fuaim àrd.

⁴Oir tha facal an Tighearna ceart, agus tha a obraichean uile dèante ann am fìrinn.

⁵Is ionmhainn leis ceartas agus breitheanas; de mhaitheas an Tighearna tha an talamh làn.

⁶Le facal an Tighearna rinneadh na nèamhan, agus le anail a bheòil an slòigh uile.

⁷Càrnaidh e suas mar thòrr uisgeachan na fairge; cuiridh e an doimhne suas na thaighean-tasgaidh.

⁸Ron Tighearna biodh eagal air an talamh uile; roimhesan biodh fiamh air luchd-àiteachaidh an domhain;

⁹Oir labhair e agus bha e ann; dh’àithn e, agus sheas e.

¹⁰Rinn an Tighearna comhairle nan cinneach faoin; thug e innleachdan an t‑sluaigh gu neoni.

¹¹Seasaidh comhairle an Tighearna gu sìorraidh, smuaintean a chridhe o linn gu linn.

¹²Is beannaichte an cinneach sin aig a bheil an Tighearna na Dhia dhaibh, an sluagh a roghnaich e mar oighreachd dha fhèin.

¹³O na nèamhan amhaircidh an Tighearna a‑nuas; chì e uile chlann nan daoine.

¹⁴O ionad seasmhach a chòmhnaidh beachdaichidh e air uile luchd-àiteachaidh na talmhainn.

¹⁵Chùm esan an cridhe air aon dòigh; bheir e fa‑near an gnìomharan uile.

¹⁶Cha tèarnar rìgh le meud a fheachd; cha saorar laoch le meud a neirt.

¹⁷Is dìomhain an t‑each a‑chum tèarainteachd, agus le meud a neirt cha saor e.

¹⁸Feuch, tha sùil an Tighearna orrasan don eagal e, orrasan a chuireas an dòchas na thròcair,

¹⁹A‑chum an anam a theasairginn on bhàs, agus an cumail beò anns a’ ghorta.

²⁰Feithidh ar n‑anam air an Tighearna; is esan ar cobhair agus ar sgiath.

²¹Oir annsan nì ar cridhe gàirdeachas, a chionn na ainm naomh-san gun do chuir sinn ar dòigh.

²²Gu robh do thròcair, a Thighearna, oirnn, a rèir mar a chuir sinn ar dòchas annad.