Read Scots Gaelic 1992 – Am Bìoball Gàidhlig 199 Leabhar nan Salm 34 Bible Online

Leabhar nan Salm 34 - Scots Gaelic 1992 – Am Bìoball Gàidhlig 199 bible

Leabhar nan Salm 34

¹Le Daibhidh, nuair a dh’atharraich e a ghiùlan an làthair Abimeleich, agus a chuir esan uaithe e, agus a dh’imich e. Beannaichidh mi an Tighearna gach àm; an còmhnaidh bidh a mholadh ann am bheul.

²Anns an Tighearna nì m’anam uaill; cluinnidh na daoine sèimhe, agus nì iad aoibhneas.

³Molaibh an Tighearna leamsa, agus àrdaicheamaid a ainm le chèile.

⁴Dh’iarr mi an Tighearna, agus dh’èisd e rium, agus shaor e mi o gach adhbhar eagail a bha agam.

⁵Dh’amhairc iad air, agus shoillsicheadh iad, agus cha robh nàire air an gnùis.

⁶Ghlaodh an duine bochd seo, agus dh’èisd an Tighearna ris, agus as a theanntachdan gu lèir shaor e e.

⁷Campaichidh aingeal an Tighearna man timcheall-san don eagal e, agus teasairgidh e iad.

⁸O blaisibh agus faicibh gur math an Tighearna; is beannaichte an duine sin a dh’earbas as.

⁹Biodh eagal an Tighearna oirbh, a naoimh-san, oir cha bhi dìth air a luchd-eagail-san.

¹⁰Bidh easbhaidh air na leòmhainn òga, agus bidh acras orra, ach orrasan a dh’iarras an Tighearna cha bhi math air bith a dhìth.

¹¹Thigibh, a chlann, agus èisdibh rium; teagaisgidh mi dhuibh eagal an Tighearna.

¹²Cò e am fear a mhiannaicheas beatha, a ghràdhaicheas làithean a dh’fhaicinn maith?

¹³Glèidh do theanga o olc, agus do bhilean o labhairt ceilg.

¹⁴Seachainn an t‑olc, agus dèan am math; iarr sìochaint, agus lean i.

¹⁵Tha sùilean an Tighearna air na fìreanan, agus a chluas rin glaodh.

¹⁶Tha gnùis an Tighearna an aghaidh luchd-dèanamh uilc, a‑chum an cuimhne a ghearradh as on talamh.

¹⁷Ghlaodh na fìreanan, agus dh’èisd an Tighearna, agus as an teanntachdan gu lèir shaor e iad.

¹⁸Is dlùth an Tighearna dhaibhsan a tha briste nan cridhe, agus saoraidh e iadsan a tha brùite nan spiorad.

¹⁹Is lìonmhor àmhgharan an fhìrein, ach asda air fad saoraidh an Tighearna e.

²⁰Gleidhidh an Tighearna a chnàmhan uile; cha bhi aon dhiubh briste.

²¹Marbhaidh olc na h‑aingidh; agus iadsan a tha a’ toirt fuath don fhìrean, lom-sgriosar iad.

²²Saoraidh an Tighearna anam a sheirbhiseach, agus cha sgriosar aon air bith dhiubhsan a chuireas an dòigh ann.