Read Scots Gaelic 1992 – Am Bìoball Gàidhlig 199 Leabhar nan Salm 39 Bible Online

Leabhar nan Salm 39 - Scots Gaelic 1992 – Am Bìoball Gàidhlig 199 bible

Leabhar nan Salm 39

¹Don àrd-fhear-ciùil, do Iedutun. Salm le Daibhidh. Thubhairt mi, Bheir mi an aire dom shlighean, nach peacaich mi lem theangaidh; gleidhidh mi srian air mo bheul, nuair a bhios an duine aingidh am fhianais.

²Bha mi balbh, tosdach; dh’fhan mi o labhairt maith fhèin; ach dhùisgeadh mo dhoilgheas.

³Dh’fhàs mo chridhe teth an taobh a‑staigh dhìom; nuair a bha mi a’ beachd-smaoineachadh, las an teine; labhair mi lem theangaidh.

⁴Thoir fios dhomh, a Thighearna, air mo chrìch, agus tomhas mo làithean ciod e, a‑chum gum bi fhios agam cia geàrr mo rè.

⁵Feuch, mar leud boise rinn thu mo làithean, agus tha m’aois mar neoni ad fhianais: gu deimhinn, is dìomhanas gach duine da fheabhas. Selah.

⁶Gu deimhinn, tha gach duine a’ siubhal ann an samhladh dìomhain; gu deimhinn, cuirear mì‑shuaimhneas orra gu faoin; càrnaidh neach suas beartas, gun fhios aige cò a mhealas e.

⁷Agus a‑nis ciod ris am feith mi, a Thighearna? Tha mo dhòchas annadsa.

⁸Saor mi o m’easaontasan uile; na dèan ball-maslaidh an amadain dhìom.

⁹Bha mi am thosd, cha d’fhosgail mi mo bheul, a chionn gur tusa a rinn e.

¹⁰Tog dhìom do bhuille; le beum do làimhe chlaoidheadh mi.

¹¹Le achmhasain airson euceirt nuair a chronaicheas tu duine, bheir thu air a shnuadh caitheamh mar leòmann; gu deimhinn, is dìomhanas gach duine. Selah.

¹²Cluinn m’ùrnaigh, a Thighearna, agus èisd rim ghlaodh; rim dheòir na bi ad thosd; oir is coigreach mi maille riut, agus fear-cuairt, mar m’athraichean uile.

¹³O caomhainn mi a‑chum gum faigh mi neart mun siubhail mi, agus nach bi mi ann nas mò!