Read Scots Gaelic 1992 – Am Bìoball Gàidhlig 199 Leabhar nan Salm 44 Bible Online

Leabhar nan Salm 44 - Scots Gaelic 1992 – Am Bìoball Gàidhlig 199 bible

Leabhar nan Salm 44

¹Don àrd-fhear-ciùil, airson mic Chòrah. Maschil. A Dhè, le ar cluasan chuala sinn, dh’innis ar n‑athraichean dhuinn an obair a rinn thu nan làithean-san, anns na làithean o shean.

²Led làimh thilg thu a‑mach na cinnich, ach shuidhich thu iadsan; chlaoidh thu na slòigh, ach thug thu orrasan soirbheachadh.

³Oir chan ann len claidheamh fhèin a fhuair iad sealbh anns an tìr, agus chan e an gàirdean fhèin a shaor iad, ach do dheaslàmh agus do ghàirdean-sa agus solas do ghnùise, a chionn gu robh deagh-ghean agad dhaibh.

⁴Is tu fhèin mo Rìgh, a Dhè; àithn thusa saorsa do Iàcob.

⁵Tromhadsa buailidh sinn air naimhdean; trìd d’ainme-sa saltraidh sinn orrasan a dh’èireas nar naghaidh.

⁶Oir as mo bhogha chan earb mi, agus cha saor mo chlaidheamh mi.

⁷Ach shaor thusa sinn o ar naimhdean, agus nàraich thu iadsan aig an robh fuath dhuinn.

⁸A Dia nì sinne uaill air feadh an là, agus d’ainm-sa molaidh sinn gu sìorraidh. Selah.

⁹Ach a‑nis thilg thu uat sinn, agus nàraich thu sinn, agus chan eil thu a’ dol a‑mach le ar n‑armailtean.

¹⁰Thug thu oirnn tionndadh air ar n‑ais on nàmhaid, agus tha iadsan lem fuathach sinn gar creachadh.

¹¹Thug thu sinn mar chaoraich airson bìdh, agus am measg nan cinneach sgap thu sinn.

¹²Reic thu do shluagh gun fhiach, agus cha do mheudaich thu do mhaoin len luach.

¹³Rinn thu sinn nar masladh dar coimhearsnaich, nar ball-fanaid agus magaidh dhaibhsan a tha mun cuairt oirnn.

¹⁴Rinn thu gnàth-fhacal dhinn am measg nan cinneach, adhbhar crathadh cinn am measg an t‑sluaigh.

¹⁵Fad an là tha m’amhluadh am fhianais, agus chòmhdaich nàire mo ghnùise mi,

¹⁶Airson guth an fhir a bheir masladh agus toibheum, airson fianais an nàmhaid agus an dìoghaltaich.

¹⁷Thàinig seo uile oirnn; gidheadh, cha do dhìochuimhnich sinn thu, agus cha do rinn sinn cealg ann ad choicheangal.

¹⁸Cha do thionndaidh ar cridhe air ais, agus cha do chlaon ar cas od shlighe,

¹⁹Ged mhìn-phronn thu sinn ann an ionad dhràgon, agus ged chòmhdaich thu sinn le sgàil a’ bhàis.

²⁰Ma dhìochuimhnich sinn ainm ar Dè, no ma shìn sinn ar làmhan gu Dia coimheach,

²¹Nach rannsaich Dia seo a‑mach, oir tha fhios aigesan air nithean diamhair a’ chridhe?

²²Ach air do shonsa mharbhadh sinn rè an là gu lèir; mheasadh sinn mar chaoraich a‑chum casgraidh.

²³Mosgail! Carson a chaidleas tu, a Thighearna? Dùisg; na tilg sinn uat gu bràth.

²⁴Carson a dh’fhalaicheas tu do ghnùis, a dhìochuimhnicheas tu ar n‑àmhghar agus ar fòirneart?

²⁵Oir chromadh sìos ar n‑anam don ùir; dhlùth-lean ar com ris an talamh.

²⁶Eirich, cuidich leinn, agus saor sinn air sgàth do thròcair.