Read Scots Gaelic 1992 – Am Bìoball Gàidhlig 199 Leabhar nan Salm 72 Bible Online

Leabhar nan Salm 72 - Scots Gaelic 1992 – Am Bìoball Gàidhlig 199 bible

Leabhar nan Salm 72

¹Airson Sholaimh. A Dhè, thoir do bhreitheanais don rìgh, agus d’fhìreantachd do mhac an rìgh.

²Bheir esan breith air do shluagh le fìreantachd, agus air do bhochdan le ceartas.

³Bheir na beanntan sìth don t‑sluagh, agus na tulaichean.

⁴Le ceartas bheir e breith air bochdan an t‑sluaigh; saoraidh e clann nan ainnis, ach mion-bhrisidh e fear an fhòirneirt.

⁵Bidh d’eagal orra am feadh a mhaireas a’ ghrian agus a’ ghealach, o linn gu linn.

⁶Thig e a‑nuas mar uisge air an fhaiche bhuainte, mar fhrasan a dh’uisgicheas an talamh.

⁷Na làithean-san soirbhichidh leis an fhìrean, agus bidh pailteas sìth ann, gus nach bi a’ ghealach ann nas mò.

⁸Agus bidh uachdaranachd aige o fhairge gu fairge, agus on abhainn gu ruig crìochan na talmhainn.

⁹Na fhianais sleuchdaidh sìos luchd-còmhnaidh an fhàsaich, agus imlichidh a naimhdean an ùir.

¹⁰Bheir rìghrean Tharsis agus nan eilean tìodhlacan uapa; bheir rìghrean Shèba agus Shaba tabhartasan dha.

¹¹Agus sleuchdaidh na h‑uile rìghrean sìos dha; nì na cinnich uile seirbhis dha.

¹²Oir saoraidh e an t‑ainnis nuair a dh’èigheas e, agus an truaghan, aig nach eil fear-cuideachaidh.

¹³Caomhnaidh e am bochd agus am feumach, agus tèarnaidh e anaman nam feumach.

¹⁴O fhoill agus o fhòirneart saoraidh e an anam, agus bidh am fuil luachmhor na shùilean.

¹⁵Agus bidh e beò, agus bheirear dha de òr Shèba, agus nìthear ùrnaigh air a shon a‑ghnàth; gach là beannaichear e.

¹⁶Bidh dòrlach sìl anns an talamh air mullach nam beann; crathaidh mar Lebanon a thoradh; agus thig muinntir a’ bhaile fo bhlàth, mar luibh na talmhainn.

¹⁷Bidh a ainm-san buan gu sìorraidh; co‑mhaireann ris a’ ghrèin bidh a ainm-san; agus annsan beannaichear na slòigh uile, agus beannaichidh iadsan e.

¹⁸Beannaichte gu robh an Tighearna Dia, Dia Israeil, an tì a‑mhàin a nì nithean iongantach!

¹⁹Agus beannaichte gu robh a ainm glòrmhor-san gu sìorraidh, agus lìonar an talamh uile le a ghlòir! Amen agus Amen!

²⁰Chrìochnaicheadh ùrnaighean Dhaibhidh mhic Iese.