Read Scots Gaelic 1992 – Am Bìoball Gàidhlig 199 Leabhar nan Salm 79 Bible Online

Leabhar nan Salm 79 - Scots Gaelic 1992 – Am Bìoball Gàidhlig 199 bible

Leabhar nan Salm 79

¹Salm le Asaph. A Dhè, thàinig na cinnich a‑steach dod oighreachd; thruaill iad do theampall naomh; dh’fhàg iad Ierusalem na cùirn.

²Thug iad cuirp do sheirbhiseach mar bhiadh do eunlaith nan speur, feòil do naomh do fhiadh-bheathaichean na talmhainn.

³Dhòirt iad am fuil mar uisge timcheall Ierusaleim, agus cha robh neach gu an adhlacadh.

⁴Tha sinn nar masladh dar coimhearsnaich, nar n‑adhbhar fanaid agus magaidh dhaibhsan a tha mun cuairt oirnn.

⁵Cia fhad, a Thighearna, a bhios fearg ort? Gu bràth an las d’eud mar theine?

⁶Dòirt do chorraich air na cinnich aig nach eil eòlas ort, agus air na rìoghachdan nach gairm air d’ainm;

⁷Oir chuir iad as do Iàcob, agus rinn iad a àite-còmhnaidh na fhàsach.

⁸Na cuimhnich thusa nar n‑aghaidh ar n‑euceartan roimhe seo; gu luath gabhadh do thròcairean romhainn, oir thugadh gu ro‑ìosal sinn.

⁹Cuidich leinn, a Dhè ar slàinte, air sgàth glòir d’ainme, agus teasairg sinn, agus glan ar peacaidhean uainn airson d’ainme fhèin.

¹⁰Carson a theireadh na cinnich, Càit a bheil an Dia? Aithnichear am measg nan cinneach fa chomhair ar sùl dìoghaltas fuil do sheirbhiseach, a dhòirteadh!

¹¹Thigeadh osnaich a’ phrìosanaich ad làthair, a rèir meud do neirt; saor thusa iadsan a dh’òrdaicheadh a‑chum bàis.

¹²Agus ìoc dar coimhearsnaich a sheachd uiread nam broilleach, am masladh leis an do mhaslaich iad thusa, a Thighearna.

¹³Agus molaidh sinne, do shluagh agus caoraich d’ionaltraidh, thusa gu bràth; o linn gu linn cuiridh sinn an cèill do chliù.