Read Scots Gaelic 1992 – Am Bìoball Gàidhlig 199 Leabhar nan Salm 80 Bible Online

Leabhar nan Salm 80 - Scots Gaelic 1992 – Am Bìoball Gàidhlig 199 bible

Leabhar nan Salm 80

¹Don àrd-fhear-ciùil air Sosanim Edut. Salm le Asaph. O aodhair Israeil, èisd thusa a stiùras Iòseph mar threud; thusa a tha ad chòmhnaidh eadar na ceruban, dealraich a‑mach.

²An làthair Ephraim agus Bheniàmin agus Mhanaseh, dùisg do chumhachd agus thig gar saoradh.

³Till sinn, a Dhè, agus thoir air do ghnùis dealrachadh, agus saorar sinn.

⁴A Thighearna Dhè nan slògh, cia fhad a bhios fearg ort ri ùrnaigh do shluaigh?

⁵Thug thu dhaibh aran nan deur ri ithe, agus thug thu dhaibh deòir rin òl ann am pailteas.

⁶Rinn thu sinn nar n‑adhbhar strì dar coimhearsnaich, agus nì ar n‑eascairdean gàire fanaid umainn.

⁷A Dhè nan slògh, till sinn, agus thoir air do ghnùis dealrachadh, agus saorar sinn.

⁸Thug thu fìonan as an Eiphit; thilg thu a‑mach na cinnich, agus shuidhich thu i.

⁹Rèitich thu àite fa comhair, agus thug thu oirre freumhachadh gu daingeann, agus lìon i an tìr.

¹⁰Chòmhdaicheadh beanntan le a sgàil, agus le a geugan seudair àrda.

¹¹Chuir i a‑mach a meòir gu ruig a’ mhuir, agus a meanglain gu ruig an abhainn.

¹²Carson a bhris thu sìos a ballachan-dìonaidh, air chor is gu bheil uile luchd-gabhail na slighe ga spìonadh?

¹³Tha an torc as a’ choille ga fàsachadh, agus tha fiadh-bheathach na machrach ga h‑ithe suas.

¹⁴A Dhè nan slògh, till, guidheamaid ort; amhairc a‑nuas o nèamh, agus faic agus fiosraich an fhìonain seo;

¹⁵Agus am fìonlios a shuidhich do dheaslàmh, agus am meanglan a neartaich thu dhut fhèin.

¹⁶Loisgeadh i le teine, ghearradh sìos i; le achmhasan do ghnùise sgriosar iad.

¹⁷Biodh do làmh air fear do làimhe deise, air mac an duine a neartaich thu dhut fhèin.

¹⁸An sin cha till sinn air ar n‑ais uat; beòthaich sinn, agus gairmidh sinn air d’ainm.

¹⁹A Thighearna Dhè nan slògh, till sinn, thoir air do ghnùis dealrachadh, agus saorar sinn.