Read Scots Gaelic 1992 – Am Bìoball Gàidhlig 199 Leabhar nan Gnàth-fhacal 12 Bible Online

Leabhar nan Gnàth-fhacal 12 - Scots Gaelic 1992 – Am Bìoball Gàidhlig 199 bible

Leabhar nan Gnàth-fhacal 12

¹Esan a ghràdhaicheas fòghlam, gràdhaichidh e eòlas; ach esan a dh’fhuathaicheas achmhasan, tha e amaideach.

²Gheibh duine math deagh-ghean on Tighearna; ach dìtidh e fear nan droch innleachd.

³Cha daingnichear duine le aingidheachd; ach cha ghluaisear freumh nam fìrean.

⁴Tha bean mhath na crùn da fear; ach mar lobhadh na chnàmhan tha ise a nàraicheas e.

⁵Is ceartas smuaintean nam fìrean; ach is cealg comhairle nan aingidh.

⁶Is iad briathran nan aingidh feall-fheitheamh airson fala; ach tèarnaidh beul nan ionraic iadsan.

⁷Tilgear na h‑aingidh bun-os‑cionn, agus cha bhi iad ann; ach seasaidh taigh nam fìrean.

⁸A rèir a ghliocais molar duine; ach nìthear dìmeas air-san a tha fiar na chridhe.

⁹Is fheàrr esan air an dèanar tàir, agus a tha na sheirbhiseach dha fhèin, na esan a bheir urram dha fhèin, agus a bhios a dhìth arain.

¹⁰Bidh cùram aig an duine ionraic de bheatha a ainmhidh; ach is an‑iochdmhor truacantais nan aingidh.

¹¹Esan a threabhas a fhearann, sàsaichear le aran e; ach esan a leanas daoine dìomhain, tha e gun tuigse.

¹²Miannaichidh an t‑aingidh lìon dhroch dhaoine; ach bheir freumh nam fìrean toradh.

¹³Le peacadh a bhilean ribear an droch dhuine; ach thèid am fìrean as o airc.

¹⁴De thoradh a bheòil sàsaichear duine le math; agus ìocar luigheachd làmh duine dha fhèin.

¹⁵Tha slighe an amadain ceart na shùilean fhèin; ach tha esan a dh’èisdeas ri comhairle, glic.

¹⁶Aithnichear air ball fearg an amadain; ach ceilidh duine ciallach masladh.

¹⁷Esan a labhras an fhìrinn, foillsichidh e ceartas; ach foillsichidh fianais bhreugach cealg.

¹⁸Tha dream ann a labhras mar lotan claidheimh; ach is slàinte teanga nan daoine glice.

¹⁹Bidh bilean na fìrinn seasmhach gu bràth; ach cha bhi an teanga breugach ach car tiota.

²⁰Is cealg a bhios ann an cridhe luchd-deilbh an uilc; ach do chomhairlich na sìthe bidh gàirdeachas.

²¹Chan èirich aimhleas air bith don fhìrean; ach lìonar na h‑aingidh le olc.

²²Is gràinealachd don Tighearna bilean nam breug; ach is iad an dream a nì gu fìrinneach a thlachd.

²³Ceilidh duine ciallach eòlas; ach foillsichidh cridhe nan amadan amaideachd.

²⁴Riaghlaidh làmh nan dìcheallach; ach bidh làmh na leisge fo chìs.

²⁵Nì iomagain ann an cridhe duine a chromadh sìos; ach nì facal math sòlasach e.

²⁶Is fheàrr am fìrean na a choimhearsnach; ach cuiridh slighe nan aingidh air seachran iad fhèin.

²⁷Cha ròist an leisgean a shitheann; ach is luachmhor saoibhreas an duine dhìcheallaich.

²⁸Ann an slighe na fìreantachd tha beatha; agus na ceum chan eil bàs.