Read Scots Gaelic 1992 – Am Bìoball Gàidhlig 199 Leabhar nan Gnàth-fhacal 13 Bible Online

Leabhar nan Gnàth-fhacal 13 - Scots Gaelic 1992 – Am Bìoball Gàidhlig 199 bible

Leabhar nan Gnàth-fhacal 13

¹Eisdidh mac glic ri teagasg a athar; ach chan èisd fear na fochaid ri achmhasan.

²De thoradh a bheòil ithidh duine nì math; ach ithidh anam nan eucorach ainneart.

³Esan a choimheadeas a bheul, gleidhidh e a anam; ach esan a dh’fhosglas a bhilean, thig sgrios air.

⁴Miannaichidh anam an leisgein, agus cha bhi aige; ach nìthear anam nan dìcheallach sultmhor.

⁵Is beag air an fhìrean na breugan; ach fàsaidh an droch dhuine gràineil, agus nàraichear e.

⁶Gleidhidh fìreantachd esan a tha ionraic na shlighe; ach claoidhidh aingidheachd am peacach.

⁷Tha neach ann a leigeas air a bhith beartach, agus gun nì air bith aige; tha neach ann a leigeas air a bhith bochd, agus mòr shaoibhreas aige.

⁸Is e èirig anam duine a shaoibhreas; ach cha chluinn am bochd achmhasan.

⁹Nì solas nam fìrean aoibhneach; ach cuirear as lòchran nan aingidh.

¹⁰O uabhar a‑mhàin thig connsachadh; ach aig na daoine a ghabhas deagh chomhairle tha gliocas.

¹¹Lùghdaichear saoibhreas an dìomhanais; ach esan a chruinnicheas le saothair, meudaichidh e.

¹²Nì an dòchas anns an cuirear moille an cridhe tinn; ach is craobh beatha am miann nuair a thig e.

¹³Esan a nì tàir air facal, millear e; ach esan air am bi eagal ro àithne, gheibh e luigheachd.

¹⁴Is tobar beatha lagh an duine ghlic, a‑chum dol as o lìontan a’ bhàis.

¹⁵Bheir tuigse mhath deagh-ghean; ach is cruaidh slighe luchd-easaontais.

¹⁶Nì gach duine ciallach a ghnothach le eòlas; ach leigidh an t‑amadan ris a amaideachd.

¹⁷Tuitidh an droch theachdaire ann an olc; ach is slàinte an teachdaire dìleas.

¹⁸Bochdainn agus nàire bidh dhàsan a dhiùltas fòghlam; ach an tì aig am bi meas air achmhasan, gheibh e urram.

¹⁹Is milis don anam am miann a choileanar; ach is beag air amadain dealachadh ris an olc.

²⁰An tì a shiùbhlas le daoine glice, bidh e glic; ach sgriosar companach nan amadan.

²¹Leanaidh olc peacaich; ach do na fìreanan ìocar math.

²²Fàgaidh duine math oighreachd aig cloinn a chloinne; ach taisgear don fhìrean maoin a’ pheacaich.

²³Bidh mòran bìdh ann an treabhadh nam bochd; ach bidh neach ann a sgriosar a dhìth breitheanais.

²⁴An tì a chaoimhneas a shlat, is beag air a mhac; ach an tì leis an ionmhainn e, smachdaichidh e e na thràth.

²⁵Ithidh am fìrean gu sàsachadh a anama; ach bidh dìth air broinn nan aingidh.