Read Scots Gaelic 1992 – Am Bìoball Gàidhlig 199 Leabhar nan Gnàth-fhacal 19 Bible Online

Leabhar nan Gnàth-fhacal 19 - Scots Gaelic 1992 – Am Bìoball Gàidhlig 199 bible

Leabhar nan Gnàth-fhacal 19

¹Is fheàrr am bochd a ghluaiseas na ionracas, na esan a tha fiar na bhilean agus e na amadan.

²Mar an ceudna cha mhath don anam a bhith as eugmhais eòlais; agus an tì a nì cabhag le a chasan, tuislichidh e.

³Claonaidh amaideachd duine a shlighe, agus an aghaidh an Tighearna nì a chridhe gearan.

⁴Nì saoibhreas mòran chàirdean; ach sgarar am bochd o a charaid.

⁵Cha bhi fianais bhreugach gun pheanas; agus an tì a labhras breugan, cha tèid e as.

⁶Iarraidh mòran deagh-ghean an duine mhòir; agus bidh gach duine na charaid do fhear nan tìodhlac.

⁷Bheir uile bhràithrean an duine bhochd fuath dha: nach mò na sin a thèid a chàirdean am fad uaithe? Leanaidh e iad le briathran, ach tha iad a dhìth air.

⁸An tì a gheibh gliocas, gràdhaichidh e a anam fhèin; an tì a ghleidheas tuigse, gheibh e math.

⁹Cha bhi fianais bhreugach gun pheanas; agus sgriosar an tì a labhras breugan.

¹⁰Chan eil aoibhneas iomchaidh do amadan; is lugha na sin do sheirbhiseach riaghladh os cionn uachdaran.

¹¹Nì tuigse duine mall a‑chum feirge, agus is i a ghlòir amharc thairis air eucoir.

¹²Mar bheucaich leòmhainn tha fearg rìgh; ach mar dhrùchd air feur tha a dheagh-ghean.

¹³Is adhbhar doilgheis da athair mac amaideach; agus mar shìor-shileadh uisge tha aimhreitean mnà.

¹⁴Is iad oighreachd athraichean taigh agus saoibhreas; ach is ann on Tighearna a tha bean chiallach.

¹⁵Bheir leisg air duine tuiteam ann an trom chadal; agus fuilingidh an t‑anam dìomhanach acras.

¹⁶An tì a ghleidheas an àithne, gleidhidh e a anam fhèin; ach an tì a nì tàir air a shlighean gheibh e bàs.

¹⁷An tì a ghabhas truas den bhochd, bheir e air iasad don Tighearna; agus an nì a bheir e uaithe, ìocaidh e dha a‑rìs.

¹⁸Smachdaich do mhac am feadh a tha dòchas da thaobh, agus na caomhnadh d’anam airson a ghearain.

¹⁹Fuilingidh fear na feirge mòire peanas; oir ma shaoras tu e, feumaidh tu a dhèanamh a‑rìs.

²⁰Eisd ri comhairle, agus gabh fòghlam, a‑chum gum bi thu glic ann ad làithean deireannach.

²¹Is lìonmhor na smuaintean ann an cridhe duine; ach is i comhairle an Tighearna a sheasas.

²²Is e tlachd duine a choibhneas; agus is fheàrr duine bochd na breugaire.

²³Treòraichidh eagal an Tighearna gu beatha, agus gheibh esan a bhios air a lìonadh leis fois; chan fhiosraichear le olc e.

²⁴Falaichidh an leisgean a làmh na bhroilleach; uiread is a‑chum a bheòil cha tabhair e i a‑rìs.

²⁵Buail fear-fochaid, agus bidh an duine neo-gheur air a fhaicill; agus cronaich duine tuigseach, agus tuigidh e eòlas.

²⁶An tì a chreachas a athair, agus a dh’fhògras a mhàthair, is mac a bheir nàire agus masladh e.

²⁷Sguir, a mhic, a dh’èisdeachd ris an teagasg a chuireas air seachran o bhriathran an eòlais.

²⁸Nì fianais aingidh tarcais air breitheanas; agus sluigidh beul dhroch dhaoine euceart.

²⁹Dh’ullaicheadh breitheanais do luchd-fochaid, agus buillean do dhruim nan amadan.