Read Scots Gaelic 1992 – Am Bìoball Gàidhlig 199 Leabhar nan Gnàth-fhacal 2 Bible Online

Leabhar nan Gnàth-fhacal 2 - Scots Gaelic 1992 – Am Bìoball Gàidhlig 199 bible

Leabhar nan Gnàth-fhacal 2

¹A mhic, ma ghabhas tu mo bhriathran-sa, agus ma dh’fhalaicheas tu m’àitheantan maille riut;

²Air chor is gun aom thu do chluas ri gliocas, gun leag thu do chridhe air tuigse:

³Seadh, ri eòlas ma dh’èigheas tu, ri tuigse ma thogas tu suas do ghuth;

⁴Ma dh’iarras tu i mar airgead, agus ma rannsaicheas tu air a son, mar airson ionmhasan falaichte;

⁵An sin tuigidh tu eagal an Tighearna, agus gheibh thu eòlas Dhè:

⁶Oir bheir an Tighearna gliocas; as a bheul thig eòlas agus tuigse.

⁷Tha e a’ tasgadh suas gliocais fhallain airson nam fìrean: is sgiath e dhaibhsan a ghluaiseas gu h‑ionraic.

⁸Tha e a’ coimhead ceuman a’ bhreitheanais, agus a’ dìon slighe a naomh.

⁹An sin tuigidh tu fìreantachd, agus breitheanas, agus ceartas; seadh, gach uile dheagh shlighe.

¹⁰Nuair a thèid gliocas a‑steach ann ad chridhe, agus a bhios eòlas taitneach dod anam,

¹¹Nì ciall do dhìon, coimheadaidh tuigse thu:

¹²Gud shaoradh o shlighe an droch dhuine; on duine a labhras nithean fiara;

¹³A dh’fhàgas ceuman an ionracais, a dh’imeachd ann an slighean an dorchadais;

¹⁴Leis an aoibhinn an t‑olc a dhèanamh, agus a tha a’ gabhail tlachd ann an aingealtachd nan aingidh.

¹⁵Aig a bheil an slighean cam, agus iad a’ claonadh nan ceuman:

¹⁶A‑chum do shaoradh on mhnaoi choimhich, on bhanachoigrich a nì miodal le a briathran;

¹⁷A thrèigeas oide-ionnsachaidh a h‑òige, agus a dhìochuimhnicheas coicheangal a Dè:

¹⁸Oir tha a taigh a’ claonadh a‑chum bàis, agus a ceuman a‑chum nam marbh.

¹⁹Cha till duine sam bith a thèid da h‑ionnsaigh, agus a‑rìs chan fhaigh e slighean na beatha.

²⁰A‑chum gun imich thu ann an slighe dhaoine matha, agus gun glèidh thu ceuman nam fìrean.

²¹Oir gabhaidh na h‑ionracain còmhnaidh anns an tìr, agus fanaidh na daoine foirfe innte.

²²Ach gearrar na daoine aingidh bhàrr na talmhainn, agus spìonar luchd-easaontais as.