Read Scots Gaelic 1992 – Am Bìoball Gàidhlig 199 Leabhar nan Gnàth-fhacal 27 Bible Online

Leabhar nan Gnàth-fhacal 27 - Scots Gaelic 1992 – Am Bìoball Gàidhlig 199 bible

Leabhar nan Gnàth-fhacal 27

¹Na dèan uaill a‑thaobh an là màireach; oir chan eil fhios agad ciod a bheir là uaithe.

²Moladh neach eile thu, agus na b’e do bheul fhèin; coigreach, agus na b’iad do bhilean fhèin.

³Is trom clach, agus is cudthromach a’ ghaineamh; ach is truime corraich amadain na iad le chèile.

⁴Is an‑iochdmhor corraich, agus mar thuil tha fearg: ach cò as urrainn seasamh am fianais tnù?

⁵Is fheàrr achmhasan follaiseach na gràdh falaichte.

⁶Is dìleas lotan caraid; ach is cealgach pògan eascaraid.

⁷Gabhaidh an t‑anam làn gràin den chìr-mheala; ach don anam acrach is milis gach nì searbh.

⁸Mar eun air seachran o a nead, mar sin tha am fear a thèid air seachran o a àite fhèin.

⁹Nì ola-ungaidh agus boltrach an cridhe ait: mar sin nì mìlsead caraid duine le comhairle a chridhe.

¹⁰Na trèig do charaid fhèin, no caraid d’athar, agus na rach a‑steach do thaigh do bhràthar ann an là d’àmhghair: is fheàrr coimhearsnach am fagas na bràthair fad as.

¹¹Bi glic, a mhic, agus dèan mo chridhe ait, agus bidh freagradh agam dhàsan a bheir masladh dhomh.

¹²Chì an duine crìonna olc, agus falaichidh e e fhèin; ach gabhaidh na daoine baoghalta air an aghaidh, agus fuilingidh iad peanas.

¹³Gabh aodach an tì a chaidh an urras air coigreach, agus airson ban-choigrich gabh an geall uaithe.

¹⁴An tì a bheannaicheas a charaid le guth àrd, ag èirigh gu moch anns a’ mhadainn, measar e dha mar mhallachadh.

¹⁵Tha sìor-shileadh uisge ann an là frasach agus bean aimhreiteach cosmhail ri a chèile.

¹⁶Ge bè dh’fhalaicheas i, falaichidh e a’ ghaoth, agus ola-ungaidh a làimhe deise a bhrathas i fhèin.

¹⁷Geuraichear iarann air iarann, agus geuraichidh duine gnùis a charaid.

¹⁸Ge bè ghleidheas craobh-fhìge, ithidh e de a toradh; mar sin esan a dh’fheitheas air a mhaighistir, gheibh e urram.

¹⁹Mar ann an uisge fhreagras aghaidh do aghaidh, mar sin freagraidh cridhe duine do dhuine.

²⁰Cha sàsaichear ifrinn agus lèirsgrios, agus cha sàsaichear sùilean dhaoine.

²¹Mar a’ phoit-ghlanaidh airson an airgid, agus an àmhainn airson an òir, mar sin tha duine do bheul an tì a mholas e.

²²Ged phronn thu amadan ann an soitheach-pronnaidh am measg cruithneachd le bruthadair, cha dealaich a amaideachd ris.

²³Biodh aithne mhath agad air staid do chaorach; thoir an aire dod threudan:

²⁴Oir cha mhair beartas gu bràth: agus am mair an crùn o linn gu linn?

²⁵Nochdar am feur geàrrte, agus taisbeanaidh am feur maoth e fhèin, agus cruinnichear luibhean nam beann.

²⁶Bidh na h‑uain a‑chum d’aodaich; agus is iad na gobhair luach d’fhearainn.

²⁷Agus bidh nas leòr de bhainne ghobhar agad a‑chum bìdh, a‑chum biadh do theaghlaich, agus a‑chum beathachadh do mhaighdeannan.