Read Scots Gaelic 1992 – Am Bìoball Gàidhlig 199 Leabhar nan Gnàth-fhacal 3 Bible Online

Leabhar nan Gnàth-fhacal 3 - Scots Gaelic 1992 – Am Bìoball Gàidhlig 199 bible

Leabhar nan Gnàth-fhacal 3

¹A mhic, na dìochuimhnich mo lagh; ach gleidheadh do chridhe m’àitheantan:

²Oir làithean buan, agus saoghal fada, agus sìth bheir iad dhut.

³Na trèigeadh tròcair agus fìrinn thu: ceangail iad mud mhuineal; sgrìobh iad air clàr do chridhe.

⁴Agus gheibh thu deagh-ghean, agus tuigse mhath, ann an sealladh Dhè agus dhaoine.

⁵Earb as an Tighearna led uile chridhe; agus rid thuigse fhèin na biodh do thaic.

⁶Ann ad uile shlighean aidich e, agus seòlaidh esan do cheuman.

⁷Na bi glic ad shùilean fhèin; biodh eagal an Tighearna ort, agus trèig olc.

⁸Na shlàinte bidh e dod imleig, agus na smior dod chnàmhan.

⁹Thoir urram don Tighearna led mhaoin, agus le ciad-thoradh d’uile chinneis:

¹⁰Agus lìonar do shaibhlean le pailteas, agus le fìon nuadh ruithidh d’fhìon-amair thairis.

¹¹Air cronachadh an Tighearna, a mhic, na dèan-sa tàir, agus na sgìthich de a smachdachadh.

¹²Oir esan as toigh leis an Tighearna smachdaichidh e, mar a smachdaicheas athair am mac anns a bheil a thlachd.

¹³Is sona an duine a dh’amaiseas air gliocas, agus am fear a gheibh tuigse:

¹⁴Oir is fheàrr a ceannachd na ceannachd airgid, agus a buannachd na an t‑òr.

¹⁵Is luachmhoire i na na seudan, agus chan eil gach nì as urrainn thu a mhiannachadh rin coimeas rithe.

¹⁶Tha saoghal fada na làimh dheis; na làimh chlì saoibhreas agus urram.

¹⁷Is slighean subhachais a slighean, agus is sìth a ceuman uile.

¹⁸Is craobh beatha i dhaibhsan a nì greim oirre, agus is sona iadsan a ghleidheas i.

¹⁹Le gliocas shuidhich an Tighearna an talamh; le tuigse shònraich e na nèamhan.

²⁰Le a eòlas-san brisear suas na doimhneachdan, agus silidh na neòil a‑nuas an drùchd.

²¹A mhic, na dealaicheadh iad rid shùilean: coimhead gliocas fallain agus tuigse.

²²Agus bidh iad nam beatha dod anam, agus nam maise dod mhuineal.

²³An sin imichidh tu ad shlighe gu tèarainte, agus cha tuislich do chas.

²⁴Nuair a laigheas tu sìos, cha bhi eagal ort: seadh, laighidh tu sìos, agus bidh do chadal milis.

²⁵Na biodh sgàth ort ro eagal obann, no ro fhàsachadh nan aingidh nuair a thig e.

²⁶Oir bidh an Tighearna na thèarmann dhut, agus gleidhidh e do chas o bhith air a glacadh.

²⁷Na cùm math on dream don dlighear e, nuair a tha e an comas do làimh a dhèanamh.

²⁸Na abair rid choimhearsnach, Imich, agus thig a‑rìs, agus a‑màireach bheir mi dhut, nuair a tha e agad làimh riut.

²⁹Na dealbh olc an aghaidh do choimhearsnaich, agus e a’ gabhail còmhnaidh gu muinghinneach làimh riut.

³⁰Na dèan strì ri duine gun adhbhar, mura do rinn e cron ort.

³¹Na biodh farmad agad ri fear an fhòirneirt, agus na roghnaich a’ bheag de a shlighean.

³²Oir is gràinealachd don Tighearna an duine ceannairceach; ach tha a rùn aig an ionracan.

³³Tha mallachd an Tighearna ann an taigh an aingidh; ach beannaichidh e àite-còmhnaidh nam fìrean.

³⁴Gu cinnteach air luchd-fochaid nì e fochaid; ach don iriosal bheir e gràs.

³⁵Sealbhaichidh na daoine glice urram; ach is e nàire àrdachadh nan amadan.