Read Scots Gaelic 1992 – Am Bìoball Gàidhlig 199 Leabhar nan Gnàth-fhacal 7 Bible Online

Leabhar nan Gnàth-fhacal 7 - Scots Gaelic 1992 – Am Bìoball Gàidhlig 199 bible

Leabhar nan Gnàth-fhacal 7

¹A mhic, glèidh mo bhriathran, agus taisg m’àitheantan maille riut.

²Glèidh m’àitheantan, agus bi beò; agus mo lagh mar dhubhagan do shùl.

³Ceangail iad air do mheòir; sgrìobh iad air clàr do chridhe.

⁴Abair ri gliocas, Is tu mo phiuthar; agus goir do bhanacharaid de thuigse:

⁵A‑chum gun glèidh iad thu on mhnaoi choimhich, on bhan-choigrich a nì miodal le a briathran.

⁶Oir aig uinneig mo thaighe dh’amhairc mi tro mo chlèith,

⁷Agus sheall mi am measg nan daoine baoghalta; thug mi fa‑near am measg nan òganach, òigfhear gun chèill,

⁸A’ dol seachad air an t‑sràid fagas da h‑oisinn, agus ghabh e an t‑slighe a‑chum a taighe,

⁹Anns an dùbhradh anns an fheasgar, anns an oidhche dhuibh dhorcha:

¹⁰Agus, feuch, thachair bean air ann an culaidh strìopaich, agus cuilbheartach na cridhe.

¹¹(Tha i àrd-ghuthach agus ceann-làidir; chan fhan a casan na taigh.

¹²A‑nis tha i a‑mach, a‑nis anns na sràidean, agus a’ feitheamh nam fàth aig gach oisinn.)

¹³Agus rug i air, agus phòg i e, agus le aghaidh gun nàire thubhairt i ris,

¹⁴Tha tabhartasan-sìth agam; an‑diugh dh’ìoc mi mo bhòidean:

¹⁵Uime sin thàinig mi a‑mach ad choinneamh, a dh’iarraidh d’aghaidh gu dìcheallach, agus fhuair mi thu.

¹⁶Le còmhdaichean grinne sgeadaich mi mo leabaidh, le obraichean geàrrte, le lìon-aodach mìn on Eiphit.

¹⁷Rinn mi mo leabaidh cùbhraidh le mirr, alo, agus canal.

¹⁸Thig, gabhamaid ar sàth de ghaol gu madainn; dèanamaid co‑ghàirdeachas ann an gaol:

¹⁹Oir chan eil fear an taighe aig baile; chaidh e air turas fada:

²⁰Sporan airgid thug e leis; air an là shuidhichte thig e dhachaigh.

²¹Le mòran de a cainnt mhilis thug i air aontachadh; le miodal a bilean cho-èignich i e.

²²Tha e a’ dol na dèidh gun dàil, mar a thèid an damh a‑chum a chasgraidh, no an t‑amadan a‑chum peanas a’ chip;

²³Gus an tèid saighead tro a àinean, mar a ghreasas eun don ribe, gun fhios aige gur ann a‑chum a bhàis a tha e.

²⁴A‑nis uime sin èisdibh rium, a chlann, agus thugaibh aire do bhriathran mo bheòil:

²⁵Na claonadh do chridhe a‑chum a slighean, na rach air seachran na ceuman.

²⁶Oir lot agus leag i sìos mòran; seadh, chaidh mòran de dhaoine treuna a mharbhadh leatha.

²⁷Is e a taigh an t‑slighe gu ifrinn, a’ dol sìos gu seòmraichean a’ bhàis.