Read Scots Gaelic 1992 – Am Bìoball Gàidhlig 199 Dàn Sholaimh 2 Bible Online

Dàn Sholaimh 2 - Scots Gaelic 1992 – Am Bìoball Gàidhlig 199 bible

Dàn Sholaimh 2

¹Is ròs o Shàron mise, lilidh nan gleann.

²Mar lilidh am measg droighnich is amhail mo ghràdh-sa am measg nan nighean.

³Mar chrann-ubhall am measg croinn na coille, is amhail mo rùn-sa am measg nan òganach; fo a sgàile mhiannaich mi, agus shuidh mi sìos, agus bha a thoradh milis dom bhlas.

⁴Threòraich e mi do thaigh an fhìona, agus b’i a bhratach tharam an gràdh.

⁵Cumaibh suas mi le cùirn, sgapaibh ùbhlan mum thimcheall, oir tha mi tinn le gràdh.

⁶Tha a làmh chlì fom cheann, agus a làmh dheas timcheall orm.

⁷Cuiream mar fhiachaibh oirbh, a nigheanan Ierusaleim, air earban agus air èildean na machrach, nach cuir sibh dragh air, agus nach dùisg sibh mo ghràdh, gus an àill leis fhèin.

⁸Guth mo ghràidh! Feuch, tha e a’ teachd, a’ leumnaich air na beanntan, a’ toirt sithidh air na tulaichean.

⁹Is cosmhail mo ghràdh ri earba no ri laogh fèidh: feuch, tha e na sheasamh air cùl ar balla, a’ sealltainn a‑mach air na h‑uinneagan, ga nochdadh fhèin tron chlèith.

¹⁰Fhreagair mo ghràdh, agus thubhairt e rium, Eirich, a bhean mo ghaoil, m’aon sgiamhach, thig leam:

¹¹Oir feuch, tha an geamhradh seachad, tha an t‑uisge thairis, dh’imich e roimhe.

¹²Chìthear na blàthan air an talamh, tha àm seinn nan eun air teachd, agus cluinnear guth an turtair nar tìr.

¹³Tha an crann-fìge a’ cur a‑mach a fhìgean glasa, agus tha dearcan maotha a’ chroinn-fhìona a’ toirt fàile cùbhraidh uapa: èirich, a bhean mo ghaoil, m’aon sgiamhach, agus thig leam.

¹⁴Mo chalaman, a tha ann an sgoltaidhean na creige, ann an ionad-diamhair a’ bhruthaich, leig dhomh amharc ort, leig leam do ghuth a chluinntinn, oir tha do ghuth binn, agus d’aogas maiseach.

¹⁵Glacaibh dhuinn na sionnaich, na sionnaich bheaga, a mhilleas na croinn-fhìona, agus dearcan òga ar crann-fìona.

¹⁶Is leamsa mo ghràdh, agus is leis-san mise: tha e ag ionaltradh am measg nan lilidh.

¹⁷Gus am bris an là, agus an teich na sgàilean, till; bi cosmhail ri earb, a ghràidh, no ri laogh fèidh air beanntan Bheteir.