Read Scots Gaelic 1992 – Am Bìoball Gàidhlig 199 Dàn Sholaimh 5 Bible Online

Dàn Sholaimh 5 - Scots Gaelic 1992 – Am Bìoball Gàidhlig 199 bible

Dàn Sholaimh 5

¹Tha mi air teachd dom lios, a phiuthar, a chèile; thionail mi mo mhirr maille rim spìosraidh; dh’ith mi mo chìr-mheala maille rim mhil; dh’òl mi m’fhìon maille rim bhainne. Ithibh, a chàirdean, òlaibh, seadh, òlaibh gu pailt, a luchd mo ghràidh.

²Tha mi am chadal, ach tha mo chridhe na fhaireachadh. Guth fir mo ghràidh a’ bualadh! Fosgail dhomh, mo phiuthar, mo bhanacharaid, mo chalaman, mo bhean choileanta; oir tha mo cheann còmhdaichte le drùchd, mo chiabhan le braoin na h‑oidhche.

³Chuir mi dhìom mo thrusgan; cionnas a chuireas mi orm e? Dh’ionnlaid mi mo chasan; cionnas a shalaicheas mi iad?

⁴Chuir fear mo ghràidh a làmh tro tholl an dorais, agus ghluaiseadh m’innigh air a shon.

⁵Dh’èirich mi a dh’fhosgladh do fhear mo ghràidh; agus shil mo làmhan mirr, agus mo mheòir mirr ruithteach, air làmhan na glaise.

⁶Dh’fhosgail mi do fhear mo ghràidh; ach thionndaidh fear mo ghràidh, agus dh’imich e roimhe. Thrèig m’anam mi nuair a labhair e. Dh’iarr mi e, ach cha d’fhuair mi e; ghairm mi air, ach cha do fhreagair e mi.

⁷Fhuair an luchd-faire a bha a’ dol air an cuairtean anns a’ bhaile mi; bhuail iad mi, lot iad mi; thug luchd-coimhead nam balla m’fhallaing dhìom.

⁸Cuiream mar fhiachaibh oirbh, a nigheanan Ierusaleim, ma gheibh sibh fear mo ghràidh, gun innis sibh dha mar a tha mi tinn le gràdh.

⁹Ciod e fear do ghràidh-sa thar fear-ghràidh eile, O thusa as àillidh am measg bhan? Ciod e fear do ghràidh-sa thar fear-ghràidh eile, gun do chuir thu air an dòigh seo mar fhiachaibh oirnn?

¹⁰Tha fear mo ghràidh-sa geal agus dearg, sònraichte am measg deich mìle.

¹¹Tha a cheann mar an t‑òr as glaine; a chiabhan bachlagach, dubh mar am fitheach.

¹²Tha a shùilean mar shùilean chalaman làimh ri sruthan uisgeachan, a nigheas iad fhèin ann am bainne, air an suidheachadh gu ceart.

¹³Tha a ghruaidhean mar leabaidh spìosraidh, mar bhlàthan cùbhraidh; a bhilean mar lilidhean a’ sileadh mirr ruithtich.

¹⁴Tha a làmhan mar fhàinnean òir suidhichte le berilean; a chom mar fhiacail elephaint lìomhte, air a cur thairis le saphirean.

¹⁵Tha a chasan mar phuist marmoir, suidhichte air bonnan den òr as glaine; a choslas mar Lebanon, barraichte mar na seudair.

¹⁶Is ro‑mhilis a bheul; seadh, tha e gu lèir ionmhainn. Is e seo fear mo ghràidh-sa, agus is e seo mo charaid, a nigheanan Ierusaleim.