Read Scots Gaelic 1992 – Am Bìoball Gàidhlig 199 Dàn Sholaimh 6 Bible Online

Dàn Sholaimh 6 - Scots Gaelic 1992 – Am Bìoball Gàidhlig 199 bible

Dàn Sholaimh 6

¹Càit an deachaidh fear do ghràidh, O thusa as àillidh am measg bhan? Cia an taobh a thionndaidh fear do ghràidh? Agus iarraidh sinn e maille riut.

²Chaidh fear mo ghràidh-sa sìos da lios, gu leapaichean nan spìosraidh, a dh’ionaltradh anns na liosan, agus a thional lilidh.

³Is le fear mo ghràidh mise, agus is leamsa fear mo ghràidh: tha e ag ionaltradh am measg nan lilidh.

⁴Is àillidh thu, a bhean mo ghaoil, mar Thirsah, maiseach mar Ierusalem, uamhasach mar shluagh lem brataichean.

⁵Tionndaidh uam do shùilean, oir chlaoidh iad mi: tha d’fhalt mar threud ghobhar a nochdar o Ghilead.

⁶Tha do dheud mar threud chaorach, a thàinig a‑nìos on àite-nighidh, a bheireas gach aon dhiubh càraid, agus gun aon chaora sheasg nam measg.

⁷Mar mhìr de phomgranat tha do chamagan am meadhon do chiabh.

⁸Tha trì-fichead bànrighinn, agus ceithir-fichead leannan ann, agus òighean gun àireamh.

⁹Is ise na h‑aonar mo chalaman, mo bhean choileanta; is i aon nighean a màthar i, a seircean-se a rug i. Chunnaic na nigheanan i, agus bheannaich iad i; na bànrighnean agus na leannain, agus mhol iad i.

¹⁰Cò ise a chìthear mar a’ mhadainn, sgiamhach mar a’ ghealach, glan mar a’ ghrian, uamhasach mar shluagh lem brataichean?

¹¹Do lios nan cnò chaidh mi sìos, a ghabhail beachd air toradh a’ ghlinne, a dh’fhaicinn an robh an fhìonain fo bhlàth, an robh na pomgranatan a’ briseadh a‑mach.

¹²Mun tug mi an aire, ar leam gun do thàirngeadh a‑mach dhomh carbadan Aminadaib.

¹³Till, till, a bhan-Shulamach, till, till, agus amhairceamaid ort. Carson a dh’amhairceadh sibh air a’ bhan-Shulamaich mar bhuidheann dà fheachd?