Read Scots Gaelic 1992 – Am Bìoball Gàidhlig 199 Leabhar an Fhàidh Isaiah 19 Bible Online

Leabhar an Fhàidh Isaiah 19 - Scots Gaelic 1992 – Am Bìoball Gàidhlig 199 bible

Leabhar an Fhàidh Isaiah 19

¹Trom-eallach na h‑Eiphit. Feuch tha an Tighearna a’ marcachd air neul luath, agus a’ teachd don Eiphit; agus bidh iodhalan na h‑Eiphit air an gluasad na fhianais; agus leaghaidh cridhe na h‑Eiphit na meadhon.

²Agus cuiridh mise Eiphitich an aghaidh Eiphiteach; agus cogaidh iad gach fear an aghaidh a bhràthar, agus gach fear an aghaidh a choimhearsnaich; baile an aghaidh baile, agus rìoghachd an aghaidh rìoghachd.

³Agus fannaichidh spiorad na h‑Eiphit na meadhon; agus cuiridh mi ann an neo-bhrìgh a comhairle; agus iarraidh iad a‑chum nan iodhalan, agus a‑chum nan draoidhean, agus a‑chum na muinntir aig a bheil leannain-shìth, agus a‑chum an luchd-fiosachd.

⁴Agus bheir mi thairis na h‑Eiphitich do làimh tighearnan an‑iochdmhor; agus riaghlaidh rìgh borb os an cionn, deir an Tighearna, Tighearna nan sluagh.

⁵Agus fàilnichidh na h‑uisgeachan on fhairge, agus thèid an abhainn an deòthadh, agus tiormaichear suas i.

⁶Agus tionndaidhidh iad na h‑aibhnichean fad a lethtaobh, agus bidh na sruthan-dìonaidh air an dèanamh falamh agus tioram; seargaidh a’ chuilc agus an luachair.

⁷Na luibhean ùrar ri taobh nan sruth, aig beul nan sruth, agus gach nì a chuireadh an cois nan sruth, seargaidh, sguabar air falbh, agus cha bhi e ann nas mò.

⁸Agus nì na h‑iasgairean bròn, agus nì iadsan uile, a tha a’ tilgeadh dubhain anns an abhainn, caoidh; agus fannaichidh iadsan a tha a’ sgaoileadh lìon air aghaidh nan uisgeachan.

⁹Agus cuirear gu amhluadh iadsan a tha ag obrachadh an lìn ghrinn, agus iadsan a tha a’ fighe lìon-obrach.

¹⁰Agus sgaoilear as a chèile innleachdan gach uile neach a nì claisean agus linneachan airson èisg.

¹¹Gu cinnteach is amadain ceannardan Shòain; thug comhairlichean glice Phàraoh comhairle mhì-chèillidh; cionnas a their sibh ri Phàraoh, Is mise mac nan daoine glice, mac nan rìghrean a bha ann o chian?

¹²Càit a bheil iad? Cia iad do dhaoine glice? Innseadh iad dhut a‑nis, agus cuireadh iad an cèill, ciod i comhairle Tighearna nan sluagh a‑thaobh na h‑Eiphit.

¹³Dh’fhàs ceannardan Shòain nan amadain, tha ceannardan Noph air am mealladh; agus thug iad air an Eiphit dol air seachran, eadhon luchd-taice a treubhan.

¹⁴Mheasg an Tighearna nam meadhon spiorad seachrain; agus thug iad air an Eiphit dol air seachran na h‑uile obraichean, cosmhail ri misgear a’ tuisleachadh na sgeith.

¹⁵Cha mhò a bhios obair air bith anns an Eiphit, aig a’ cheann no aig an earball, aig a’ ghèig no aig an luachair, ra dhèanamh.

¹⁶Anns an là sin bidh an Eiphit cosmhail ri mnathan; agus bidh crith agus geilt oirre, ro chrathadh làmh Tighearna nan sluagh, a chrathas e os a cionn.

¹⁷Agus bidh tìr Iùdah na cùis-eagail don Eiphit; gach neach a nì luaidh oirre, gabhaidh e eagal ann fhèin; airson comhairle Tighearna nan sluagh, a ghabh e na h‑aghaidh.

¹⁸Anns an là sin, bidh còig bailtean ann an tìr na h‑Eiphit a’ labhairt cainnt Chanàain, agus a’ mionnachadh do Thighearna nan sluagh; goirear de aon dhiubh Baile an Sgrios.

¹⁹Anns an là sin bidh altair don Tighearna ann am meadhon tìr na h‑Eiphit; agus carragh aig a crìch don Tighearna.

²⁰Agus bidh e mar chomharradh agus mar fhianais do Thighearna nan sluagh ann an tìr na h‑Eiphit; oir glaodhaidh iad ris an Tighearna airson an luchd-sàrachaidh, agus cuiridh e dan ionnsaigh fear-saoraidh, eadhon fear treun, agus fuasglaidh e iad.

²¹Agus bidh an Tighearna aithnichte don Eiphit, agus aithnichidh na h‑Eiphitich an Tighearna anns an là sin; agus bheir iad ìobairt agus tabhartas uapa; agus geallaidh iad gealladh don Tighearna, agus coileanaidh iad e.

²²Agus buailidh an Tighearna an Eiphit, a’ bualadh agus a’ leigheas; agus tillidh iad a dh’ionnsaigh an Tighearna, agus èisdidh esan rin guidhe, agus lèighsidh e iad.

²³Anns an là sin bidh rathad mòr on Eiphit gu Asiria; agus thig an t‑Asirianach don Eiphit, agus an t‑Eiphiteach gu Asiria; agus nì an t‑Eiphiteach adhradh maille ris an Asirianach.

²⁴Anns an là sin measar Israel an treas aon, maille ris an Eiphit agus ri Asiria, na bheannachadh ann am meadhon na tìre,

²⁵A bheannaicheas Tighearna nan sluagh, ag ràdh, Beannaichte gu robh an Eiphit, mo shluagh-sa, agus Asiria, obair mo làmh, agus Israel, m’oighreachd.