Read Scots Gaelic 1992 – Am Bìoball Gàidhlig 199 Leabhar an Fhàidh Isaiah 38 Bible Online

Leabhar an Fhàidh Isaiah 38 - Scots Gaelic 1992 – Am Bìoball Gàidhlig 199 bible

Leabhar an Fhàidh Isaiah 38

¹Anns na làithean sin bha Heseciah tinn gu bàs; agus thàinig Isaiah am fàidh, mac Amois, da ionnsaigh, agus thubhairt e ris, Mar seo tha an Tighearna ag ràdh, Cuir do thaigh an òrdagh; oir gheibh thu bàs, agus cha mhair thu beò.

²An sin thionndaidh Heseciah a aghaidh ris a’ bhalla, agus rinn e ùrnaigh ris an Tighearna;

³Agus thubhairt e, Guidheam ort, O Thighearna, cuimhnich a‑nis cionnas a ghluais mi ad làthair ann am fìrinn, agus le cridhe iomlan, agus a rinn mi an nì a tha math ad shùilean. Agus ghuil Heseciah gu goirt.

⁴An sin thàinig facal an Tighearna a dh’ionnsaigh Isaiah, ag ràdh,

⁵Falbh agus abair ri Heseciah, Mar seo deir an Tighearna, Dia Dhaibhidh d’athair, Chuala mise d’ùrnaigh, chunnaic mi do dheòir; feuch, cuiridh mi rid làithean còig-bliadhna-deug;

⁶Agus saoraidh mi thusa agus am baile seo à làimh rìgh Asiria; agus dìonaidh mi am baile seo.

⁷Agus thubhairt Isaiah, Is e seo as comharradh dhut gun dèan an Tighearna an nì a labhair e:

⁸Feuch, bheir mi air ais dubhar nan ceum, a tha air dol leis a’ ghrèin air ceuman Ahais, deich ceuman air ais. Agus thill a’ ghrian air a h‑ais deich ceuman air na ceuman air an deachaidh i sìos.

⁹Sgrìobhadh Heseciah rìgh Iùdah, nuair a bha e tinn, agus a shlànaicheadh e o a thinneas:

¹⁰Thubhairt mi, ann an giorrachadh mo làithean, Thèid mi a‑steach air dorsan na h‑uaighe: chaill mi fuidheall mo bhliadhnachan.

¹¹Thubhairt mi, Chan fhaic mi nas mò an Tighearna, eadhon an Tighearna, ann an tìr nam beò; cha seall mi air duine nas mò, maille ri luchd-àiteachaidh an t‑saoghail.

¹²Tha m’aois air dealachadh rium, agus dh’atharraicheadh i air falbh mar phàillean buachaille; ghearradh as mo bheatha mar gum b’ann leis an fhigheadair; tha e gam chlaoidh le tinneas caithteach; o là eadhon gu oidhche tha thu a’ cur as dhomh.

¹³Shaoil mi, gus a’ mhadainn, gum briseadh e, mar leòmhann, mo chnàmhan uile; o là eadhon gu oidhche tha thu a’ cur as dhomh.

¹⁴Mar ghòbhlan-gaoithe no mar chòrr, rinn mi cànran; rinn mi caoidh mar chalaman: tha mo shùilean air fàilneachadh le sealltainn suas. O Thighearna, tha mi air mo shàrachadh; bi thusa ad urras dhomh.

¹⁵Ciod a their mi? Labhair e rium, agus fòs choilean e. Gluaisidh mi gu fòil uile bhliadhnachan mo bheatha airson àmhghar m’anama.

¹⁶O Thighearna, tro na nithean sin bidh iad beò, agus anns na nithean sin tha beatha mo spioraid: mar sin shlànaich agus bheothaich thu mi.

¹⁷Feuch, tha m’àmhghar air a chaochladh gu fois; theasairg thu gu caomh m’anam o shloc millteach; seadh, thilg thu air do chùlaibh m’uile lochdan.

¹⁸Gu deimhinn cha dèan an uaigh luaidh ort; cha toir am bàs cliù dhut; cha chuir iadsan a thèid sìos don t‑sloc an dòigh ann ad fhìrinn.

¹⁹Am beò, am beò, molaidh esan thu, mar a nì mise air an là‑an‑diugh; foillsichidh an t‑athair don chloinn do thairisneachd.

²⁰Bha an Tighearna leam gum thèarnadh; air an adhbhar sin seinnidh sinn mo dhàin air na h‑innealan-ciùil, uile làithean ar beatha, ann an taigh an Tighearna.

²¹Agus thubhairt Isaiah, Gabhadh iad meall fhìgean, agus sgaoileadh iad air an neasgaid iad, agus slànaichear e.

²²Agus thubhairt Heseciah, Ciod e an comharradh gun tèid mi suas do thaigh an Tighearna?