Read Scots Gaelic 1992 – Am Bìoball Gàidhlig 199 Treas Leabhar Mhaois Don Ainm Lebhiticus 13 Bible Online

Treas Leabhar Mhaois Don Ainm Lebhiticus 13 - Scots Gaelic 1992 – Am Bìoball Gàidhlig 199 bible

Treas Leabhar Mhaois Don Ainm Lebhiticus 13

¹Agus labhair an Tighearna ri Maois agus ri Aaron, ag ràdh,

²Nuair a bhios aig duine ann an craiceann a fheòla at, no guirean, no ball soilleir, agus gum bi e ann an craiceann a fheòla cosmhail ri plàigh luibhre, an sin bheirear e gu Aaron an sagart, no gu aon de a mhic, na sagartan.

³Agus amhaircidh an sagart air a’ phlàigh ann an craiceann a fheòla; agus nuair a bhios am fionnadh anns a’ phlàigh air tionndadh gu bàn, agus a bhios a’ phlàigh ra faicinn nas doimhne na craiceann a fheòla, is plàigh luibhre a tha ann; agus amhaircidh an sagart air, agus gairmidh e neòghlan e.

⁴Ach ma tha am ball soilleir ann an craiceann a fheòla bàn, agus gun e a bhith ra fhaicinn nas doimhne na an craiceann, agus gun a fhionnadh a bhith air tionndadh gu bàn, an sin druididh an sagart a‑staigh esan air a bheil a’ phlàigh seachd làithean.

⁵Agus amhaircidh an sagart air, air an t‑seachdamh là; agus, feuch, ma tha a’ phlàigh na shealladh air stad, agus gun a’ phlàigh a bhith a’ sgaoileadh anns a’ chraiceann; an sin druididh an sagart a‑staigh e seachd làithean eile.

⁶Agus amhaircidh an sagart air a‑rìs air an t‑seachdamh là, agus, feuch, ma bhios a’ phlàigh càil-eigin dorcha, agus nach eil a’ phlàigh air sgaoileadh anns a’ chraiceann, gairmidh an sagart glan e: chan eil ann ach guirean; agus nighidh e a aodach, agus bidh e glan.

⁷Ach ma sgaoil an guirean gu mòr a‑mach anns a’ chraiceann, an dèidh dha a bhith air fhaicinn leis an t‑sagart a‑chum a ghlanaidh, chìthear e a‑rìs leis an t‑sagart.

⁸Agus amhaircidh an sagart air, agus, feuch, ma tha an guirean air sgaoileadh anns a’ chraiceann, an sin gairmidh an sagart e neòghlan: is luibhre a tha ann.

⁹Nuair a bhios plàigh luibhre air duine, an sin bheirear e a‑chum an t‑sagairt:

¹⁰Agus amhaircidh an sagart air: agus, feuch, ma tha at bàn anns a’ chraiceann, agus gun do thionndaidh e am fionnadh gu bàn, agus gu bheil feòil bheò dhearg anns an at,

¹¹Is seann luibhre a tha ann, ann an craiceann a fheòla; agus gairmidh an sagart e neòghlan, agus cha druid e a‑staigh e, oir tha e neòghlan.

¹²Agus ma bhriseas luibhre gu mòr a‑mach anns a’ chraiceann, agus gun còmhdaich an luibhre craiceann an neach air a bheil a’ phlàigh uile o a cheann gu a throigh, ge bè ball air an amhairc an sagart:

¹³An sin bheir an sagart fa‑near: agus, feuch, ma chòmhdaich an luibhre a fheòil uile, gairmidh e esan glan air a bheil a’ phlàigh: thionndaidheadh e uile gu bàn; tha e glan.

¹⁴Ach nuair a bhios feòil dhearg ra faicinn air, bidh e neòghlan.

¹⁵Agus amhaircidh an sagart air an fheòil dheirg, agus gairmidh e neòghlan e; oir tha an fheòil dhearg neòghlan: is luibhre a tha ann.

¹⁶Ach ma thig an fheòil dhearg air a h‑ais a‑rìs, agus gun tionndaidhear gu bàn i, thig e a‑chum an t‑sagairt,

¹⁷Agus amhaircidh an sagart air: agus, feuch, ma tha a’ phlàigh air tionndadh gu bàn, an sin gairmidh an sagart esan glan air a bheil a’ phlàigh: tha e glan.

¹⁸An fheòil mar an ceudna anns an robh, eadhon na craiceann, neasgaid, agus a lèighseadh,

¹⁹Agus aig a bheil ann an àite na neasgaid at bàn, no ball soilleir bàn, càil-eigin dearg, nochdar don t‑sagart e;

²⁰Agus mas e nuair a chì an sagart e, feuch, gu bheil e ra fhaicinn nas doimhne na an craiceann, agus a fhionnadh air a thionndadh gu bàn, gairmidh an sagart neòghlan e: is plàigh luibhre a tha ann air briseadh a‑mach anns an neasgaid.

²¹Ach ma dh’amhairceas an sagart air, agus, feuch, nach eil fionnadh bàn air bith ann, agus gun e nas doimhne na an craiceann, ach càil-eigin dorcha, an sin druididh an sagart a‑staigh e seachd làithean.

²²Agus ma tha e air sgaoileadh a‑mach gu mòr anns a’ chraiceann, an sin gairmidh an sagart e neòghlan; is plàigh a tha ann.

²³Ach ma tha am ball soilleir air stad na àite, gun e air sgaoileadh, is neasgaid loisgeach a tha ann; agus gairmidh an sagart glan e.

²⁴No ma bhios feòil air bith ann, aig a bheil na craiceann losgadh teth, agus gum bi, anns an fheòil bheò a tha a’ losgadh, ball bàn soilleir, càil-eigin dearg, no bàn;

²⁵An sin amhaircidh an sagart air, agus, feuch, ma tha am fionnadh anns a’ bhall shoilleir air tionndadh gu bàn, agus e ra fhaicinn nas doimhne na an craiceann, is luibhre a tha ann air briseadh a‑mach anns an losgadh: uime sin gairmidh an sagart neòghlan e; is plàigh luibhre a tha ann.

²⁶Ach ma dh’amhairceas an sagart air, agus, feuch, nach eil fionnadh bàn air bith air a’ bhall shoilleir, agus nach eil e nas doimhne na an craiceann eile, ach gu bheil e càil-eigin dorcha, an sin druididh an sagart a‑staigh e seachd làithean.

²⁷Agus amhaircidh an sagart air, air an t‑seachdamh là, agus ma tha e air sgaoileadh a‑mach gu mòr anns a’ chraiceann, an sin gairmidh an sagart neòghlan e; is plàigh luibhre a tha ann.

²⁸Agus ma tha am ball soilleir air stad na àite, gun e air sgaoileadh anns a’ chraiceann, ach e càil-eigin dorcha; is at on losgadh a tha ann, agus gairmidh an sagart glan e; oir is leannachadh a tha ann on losgadh.

²⁹Ma tha aig duine no mnaoi plàigh air a’ cheann, no air an fheusaig;

³⁰An sin amhaircidh an sagart air a’ phlàigh: agus, feuch, ma tha i ra faicinn nas doimhne na an craiceann, agus fionnadh tana buidhe innte; an sin gairmidh an sagart neòghlan e: is càrr tioram a tha ann, eadhon luibhre air a’ cheann, no air an fheusaig.

³¹Agus ma dh’amhairceas an sagart air plàigh a’ charra, agus, feuch, nach eil i ra faicinn nas doimhne na an craiceann, agus nach eil fionnadh dubh sam bith innte, an sin druididh an sagart a‑staigh esan air a bheil plàigh a’ charra, seachd làithean.

³²Agus amhaircidh an sagart air a’ phlàigh air an t‑seachdamh là, agus, feuch, mura eil an càrr air sgaoileadh, agus nach eil fionnadh buidhe sam bith ann, agus nach eil an càrr ra fhaicinn nas doimhne na an craiceann;

³³An sin bearrar e, ach an càrr cha bheàrr e; agus druididh an sagart a‑staigh esan air a bheil an càrr, seachd làithean eile.

³⁴Agus air an t‑seachdamh là, amhaircidh an sagart air a’ chàrr: agus, feuch, mura eil an càrr air sgaoileadh anns a’ chraiceann, no ra fhaicinn nas doimhne na an craiceann; an sin gairmidh an sagart glan e: agus nighidh e a aodach, agus bidh e glan.

³⁵Ach ma tha an càrr air sgaoileadh gu mòr anns a’ chraiceann an dèidh a ghlanaidh;

³⁶An sin amhaircidh an sagart air, agus, feuch, ma tha an càrr air sgaoileadh anns a’ chraiceann, chan iarr an sagart fionnadh buidhe: tha e neòghlan.

³⁷Ach ma tha an càrr na shealladh air stad, agus ma tha fionnadh dubh air fàs suas ann, lèighseadh an càrr, tha e glan: agus gairmidh an sagart glan e.

³⁸Ma bhios, mar an ceudna, aig duine no aig mnaoi, ann an craiceann am feòla, buill shoilleir, eadhon buill bhàna shoilleir;

³⁹An sin amhaircidh an sagart: agus, feuch, ma tha na buill shoilleir ann an craiceann am feòla odhar-bhàn, is leus teas e air fàs anns a’ chraiceann: tha e glan.

⁴⁰Agus an duine aig a bheil a cheann air faileadh, tha e maol: gidheadh tha e glan.

⁴¹Agus esan aig a bheil a fhalt air faileadh den chuid sin de a cheann a tha leth ra aodann, tha e maol-bhathaiseach: gidheadh tha e glan.

⁴²Agus ma tha na cheann maol, no na bhathais mhaoil, creuchd bhàn càil-eigin dearg, is luibhre a tha ann air fàs suas na cheann maol, no na bhathais mhaoil.

⁴³An sin amhaircidh an sagart air; agus, feuch, ma tha at na creuchda bàn-dhearg na mhaol-cheann, no na mhaol-bhathais, mar a nochdar an luibhre ann an craiceann na feòla;

⁴⁴Is duine lobhrach e, tha e neòghlan: gairmidh an sagart e neòghlan gu h‑iomlan; tha a’ phlàigh na cheann.

⁴⁵Agus an lobhar air a bheil a’ phlàigh, reubar a aodach, agus bidh a cheann lomnochd, agus cuiridh e falach air a bhil uachdaraich, agus glaodhaidh e, Neòghlan, neòghlan.

⁴⁶Rè nan uile làithean a bhios a’ phlàigh air, bidh e salach; tha e neòghlan: gabhaidh e còmhnaidh na aonar; an taobh a‑muigh den champ bidh a ionad-tàimh.

⁴⁷An t‑aodach mar an ceudna anns a bheil plàigh na luibhre, mas aodach olla e no mas aodach lìn e;

⁴⁸Mas ann a tha i anns an dlùth, no anns an inneach, de lìon no de olainn, mas ann an craiceann, no ann an nì sam bith dèante de chraiceann;

⁴⁹Agus ma tha a’ phlàigh uaine no dearg anns an aodach, no anns a’ chraiceann, aon chuid anns an dlùth no anns an inneach, no ann an nì sam bith dèante de chraiceann, is plàigh luibhre a tha ann, agus feuchar i don t‑sagart.

⁵⁰Agus amhaircidh an sagart air a’ phlàigh, agus druididh e a‑staigh an nì anns a bheil a’ phlàigh, seachd làithean.

⁵¹Agus amhaircidh e air a’ phlàigh air an t‑seachdamh là: ma tha a’ phlàigh air sgaoileadh anns an aodach, aon chuid anns an dlùth no anns an inneach, no ann an craiceann, no ann an obair sam bith dèante de chraiceann, is luibhre chnàmhanach a’ phlàigh: tha e neòghlan.

⁵²Loisgidh e uime sin an t‑aodach, mas dlùth no inneach, ann an olainn no ann an lìon, no nì air bith dèante de chraiceann, anns a bheil a’ phlàigh, oir is luibhre chnàmhanach a tha ann; loisgear e anns an teine.

⁵³Agus ma dh’amhairceas an sagart, agus, feuch, nach eil a’ phlàigh air sgaoileadh anns an aodach, aon chuid anns an dlùth, no anns an inneach, no ann an nì sam bith dèante de chraiceann;

⁵⁴An sin àithnidh an sagart dhaibh an nì anns a bheil a’ phlàigh a nighe, agus druididh e a‑staigh e seachd làithean eile.

⁵⁵Agus amhaircidh an sagart air a’ phlàigh an dèidh a nighe: agus, feuch, mura do mhùth a’ phlàigh a dath, agus mura do sgaoil a’ phlàigh, tha e neòghlan; loisgidh tu anns an teine e: is cnàmhan an leth a‑staigh e, mas lom a‑staigh no a‑muigh e.

⁵⁶Agus ma dh’amhairceas an sagart, agus, feuch, gu bheil a’ phlàigh càil-eigin dorcha an dèidh a nighe; an sin reubaidh e as an aodach i, no as a’ chraiceann, no as an dlùth, no as an inneach.

⁵⁷Agus ma tha i ra faicinn fhathast anns an aodach, aon chuid anns an dlùth, no anns an inneach, no ann an nì air bith dèante de chraiceann, is plàigh sgaoilteach a tha ann: loisgidh tu le teine an nì anns a bheil a’ phlàigh.

⁵⁸Agus an t‑aodach, mas dlùth, no inneach e, no nì air bith dèante de chraiceann, a nigheas tu, ma chaidh a’ phlàigh asda, an sin nighear e an dara uair, agus bidh e glan.

⁵⁹Is e seo lagh plàigh na luibhre ann an aodach ola no lìn, anns an dlùth, no anns an inneach, no ann an nì sam bith dèante de chraiceann, a‑chum a ghairm glan, no a ghairm neòghlan.