Read Scots Gaelic 1992 – Am Bìoball Gàidhlig 199 Treas Leabhar Mhaois Don Ainm Lebhiticus 19 Bible Online

Treas Leabhar Mhaois Don Ainm Lebhiticus 19 - Scots Gaelic 1992 – Am Bìoball Gàidhlig 199 bible

Treas Leabhar Mhaois Don Ainm Lebhiticus 19

¹Agus labhair an Tighearna ri Maois, ag ràdh,

²Labhair ri coitheanal chloinn Israeil uile, agus abair riu, Bithibh naomh: oir tha mise an Tighearna ur Dia naomh.

³Biodh eagal ur màthar agus ur n‑athar air gach duine agaibh, agus gleidhibh mo shàbaidean: Is mise an Tighearna ur Dia.

⁴Na rachaibh a thaobh gu iodhalan, agus na dèanaibh diathan leaghte dhuibh fhèin: Is mise an Tighearna ur Dia.

⁵Agus ma dh’ìobras sibh ìobairt thabhartas-sìthe don Tighearna, ìobraidh sibh e de ur toil fhèin.

⁶Anns an là sin fhèin anns an ìobair sibh i ithear i, agus air an là màireach: agus ma mhaireas a’ bheag dhith gus an treas là, loisgear anns an teine e;

⁷Agus ma dh’ithear e idir air an treas là, is gràineil e; cha ghabhar e.

⁸Uime sin gach neach a dh’itheas e, giùlainidh e a aingidheachd, a chionn gun do mhì-naomhaich e nì coisrigte an Tighearna: agus gearrar an t‑anam sin as o a shluagh.

⁹Agus nuair a bhuaineas sibh foghar ur fearainn, cha bhuain thu gu buileach oisnean d’achaidh, cha mhò a chruinnicheas tu dìoghlaim d’fhogharaidh.

¹⁰Agus cha tur-lom thu d’fhìonlios, cha mhò a chruinnicheas tu uile fhìon-dhearcan d’fhìonlios; don bhochd agus don choigreach fàgaidh tu iad: Is mise an Tighearna ur Dia.

¹¹Cha ghoid sibh, cha mhò a nì sibh breug, no a mheallas aon agaibh a chèile.

¹²Agus cha mhionnaich sibh air m’ainm-sa gu breugach, cha mhò a mhì-naomhaicheas tu ainm do Dhè: Is mise an Tighearna.

¹³Cha dèan thu fòirneart air do choimhearsnach, cha mhò a nì thu reubainn air; chan fhan duais an fhir-thuarasdail maille riut rè na h‑oidhche gu madainn.

¹⁴Cha mhallaich thu am bodhar, agus ron dall cha chuir thu ceap-tuislidh, ach bidh eagal do Dhè ort; Is mise an Tighearna.

¹⁵Cha dèan sibh eucoir sam bith ann am breitheanas; cha bhi suim agad do ghnùis an duine bhochd, cha mhò a bheir thu urram do ghnùis an duine chumhachdaich; ann an ceartas bheir thu breith air do choimhearsnach.

¹⁶Cha tèid thu mun cuairt mar fhear-tuaileis am measg do shluaigh; cha mhò a sheasas tu an aghaidh fuil do choimhearsnaich: Is mise an Tighearna.

¹⁷Cha bhi fuath agad dod bhràthair ann ad cridhe: air gach aon chor cronaichidh tu do choimhearsnach, agus chan fhuiling thu peacadh air.

¹⁸Cha dèan thu dìoghaltas, cha mhò a bhios falachd agad ri cloinn do shluaigh, ach gràdhaichidh tu do choimhearsnach mar thu fhèin: Is mise an Tighearna.

¹⁹Gleidhidh sibh mo reachdan: Cha leig thu led sprèidh sìolachadh le gnè eile; cha chuir thu d’fhearann le sìol measgte: cha mhò a chuirear umad aodach measgte de olainn agus de lìon.

²⁰Agus ge bè neach a laigheas gu collaidh le mnaoi a tha na ban-tràill fo cheangal-pòsaidh aig fear, agus nach d’fhuasgladh idir, cha mhò a thugadh saorsa dhi, sgiùrsar i: cha chuirear gu bàs iad, a chionn nach robh i saor.

²¹Agus bheir e a ìobairt-easaontais don Tighearna, gu doras pàillean a’ choitheanail, eadhon reithe mar ìobairt-easaontais.

²²Agus nì an sagart rèite air a shon le reithe na h‑ìobairt-easaontais an làthair an Tighearna, airson a pheacaidh a rinn e: agus maithear dha a pheacadh a rinn e.

²³Agus nuair a thig sibh don fhearann, agus a shuidhicheas sibh gach gnè chraobh airson bìdh, an sin measaidh sibh an toradh mar nì neo-thimcheall-gheàrrte: trì bliadhna bidh e dhuibh mar nì neo-thimcheall-gheàrrte: chan ithear dheth.

²⁴Ach air a’ cheathramh bliadhna bidh a thoradh uile naomh, a‑chum cliù don Tighearna.

²⁵Agus air a’ chòigeamh bliadhna ithidh sibh de a thoradh, a‑chum gun toir e a chinneas dhuibh: Is mise an Tighearna ur Dia.

²⁶Chan ith sibh nì sam bith leis an fhuil: cha mhò a ghnàthaicheas sibh draoidheachd, no a nì sibh fiosachd.

²⁷Cha bheàrr sibh mun cuairt oisnean ur ceann, cha mhò a mhilleas tu oisnean d’fheusaig.

²⁸Cha dèan sibh gearradh sam bith nur feòil airson nam marbh, cha mhò a chuireas sibh comharradh sam bith oirbh: Is mise an Tighearna.

²⁹Na truaill do nighean, a thoirt oirre a bhith na strìopaich; a‑chum nach toirear am fearann gu strìopachas, agus nach lìonar an dùthaich le aingidheachd.

³⁰Gleidhidh sibh mo shàbaidean agus bheir sibh urram dom ionad naomh: Is mise an Tighearna.

³¹Na biodh suim agaibh dhiùbhsan aig a bheil leannain-shìdh, agus na iarraibh a dh’ionnsaigh luchd-fiosachd, gu bhith air ur truailleadh leo: Is mise an Tighearna ur Dia.

³²An làthair a’ chinn lèith èiridh tu suas, agus bheir thu urram do ghnùis an duine aosda, agus bidh eagal do Dhè ort: Is mise an Tighearna.

³³Agus ma bhios coigreach air chuairt maille riut nur tìr, cha bhuin sibh gu cruaidh ris.

³⁴Mar neach a rugadh nur measg bidh dhuibhse an coigreach a tha air chuairt maille ribh, agus gràdhaichidh tu e mar thu fhèin; oir bha sibh fhèin nur coigrich ann an tìr na h‑Eiphit: Is mise an Tighearna ur Dia.

³⁵Cha dèan sibh eucoir sam bith ann am breitheanas, ann an slait-thomhais, ann an cudthrom, no ann an tomhas.

³⁶Meidhean cearta, clachan-tomhais cearta, ephah cheart, agus hin cheart bidh agaibh: Is mise an Tighearna ur Dia, a thug sibhse a‑mach à tìr na h‑Eiphit.

³⁷Uime sin gleidhidh sibh mo reachdan uile, agus mo bhreitheanais uile, agus nì sibh iad: Is mise an Tighearna.