Read Scots Gaelic 1992 – Am Bìoball Gàidhlig 199 Treas Leabhar Mhaois Don Ainm Lebhiticus 23 Bible Online

Treas Leabhar Mhaois Don Ainm Lebhiticus 23 - Scots Gaelic 1992 – Am Bìoball Gàidhlig 199 bible

Treas Leabhar Mhaois Don Ainm Lebhiticus 23

¹Agus labhair an Tighearna ri Maois, ag ràdh,

²Labhair ri cloinn Israeil, agus abair riu, A‑thaobh fèillean an Tighearna, a ghairmeas sibh gu bhith nan co‑ghairmean naomha, is iad eadhon sin m’fhèillean-sa.

³Sia làithean nìthear obair, ach anns an t‑seachdamh là bidh sàbaid foise, co‑ghairm naomh: obair sam bith cha dèan sibh air: is e sàbaid an Tighearna e nur n‑àiteachan-còmhnaidh uile.

⁴Is iad sin fèillean an Tighearna, eadhon co‑ghairmean naomha, a ghairmeas sibh nan àmannan fhèin:

⁵Anns a’ chiad mhìos, air a’ cheathramh-là‑deug den mhìos air feasgar, bidh càisg an Tighearna.

⁶Agus air a’ chòigeamh-là‑deug den mhìos sin fhèin bidh fèill an arain neo-ghortaichte don Tighearna: seachd làithean ithidh sibh aran neo-ghortaichte.

⁷Air a’ chiad là bidh co‑ghairm naomh agaibh: obair thràilleil sam bith cha dèan sibh air.

⁸Ach bheir sibh seachad tabhartas a bheirear suas le teine don Tighearna seachd làithean: air an t‑seachdamh là bidh co‑ghairm naomh; obair thràilleil sam bith cha dèan sibh air.

⁹Agus labhair an Tighearna ri Maois, ag ràdh,

¹⁰Labhair ri cloinn Israeil, agus abair riu, Nuair a thig sibh a dh’ionnsaigh an fhearainn a bheir mise dhuibh, agus a bhuaineas sibh a fhoghar, an sin bheir sibh sguab de chiad-thoradh ur fogharaidh a dh’ionnsaigh an t‑sagairt:

¹¹Agus luaisgidh e an sguab an làthair an Tighearna, a‑chum gun gabhar rithe air ur son: air an là màireach an dèidh na sàbaid luaisgidh an sagart i.

¹²Agus ìobraidh sibh air an là sin, nuair a luaisgeas sibh an sguab, uan fireann gun ghaoid, den chiad bhliadhna, mar ìobairt-loisgte don Tighearna.

¹³Agus is e a thabhartas-bìdh dà dheicheamh earrainn de fhlùr mìn measgte le ola, tabhartas a bheirear suas le teine don Tighearna, a‑chum fàile chùbhraidh: agus bidh a thabhartas-dibhe de fhìon, an ceathramh cuid de hin.

¹⁴Agus chan ith sibh aran, no gràn cruadhaichte, no diasan glasa, gus an là sin fhèin anns an toir sibh tabhartas a‑chum ur Dè: bidh e na reachd bithbhuan air feadh ur ginealaichean, nur n‑àiteachan-còmhnaidh uile:

¹⁵Agus àirmhidh sibh dhuibh fhèin on là màireach an dèidh na sàbaid, on là anns an tug sibh leibh sguab an tabhartas-luaisgte: bidh seachd sàbaidean iomlan ann:

¹⁶Eadhon gus an là màireach an dèidh na seachdamh sàbaid, àirmhidh sibh lethcheud là, agus bheir sibh seachad nuadh thabhartas-bìdh don Tighearna.

¹⁷Bheir sibh leibh as ur n‑àiteachan-còmhnaidh dà bhuilinn luaisgte, de dhà dheicheamh earrainn; bidh iad de fhlùr mìn; fuinear iad le taois ghoirt; bidh iad nan ciad-thoradh don Tighearna.

¹⁸Agus bheir sibh seachad maille ris an aran seachd uain gun ghaoid, den chiad bhliadhna, agus aon tarbh òg, agus dà reithe: bidh iad nan ìobairt-loisgte don Tighearna, maille rin tabhartas-bìdh, agus an tabhartasan-dibhe, eadhon tabhartas a bheirear suas le teine, de fhàile cùbhraidh don Tighearna.

¹⁹An sin ìobraidh sibh aon mheann de na gobhair mar ìobairt-pheacaidh, agus dà uan den chiad bhliadhna mar ìobairt-thabhartas-sìthe.

²⁰Agus luaisgidh an sagart iad maille ri aran a’ chiad toraidh, mar thabhartas-luaisgte an làthair an Tighearna, maille ris an dà uan: bidh iad naomh don Tighearna a‑chum an t‑sagairt.

²¹Agus gairmidh sibh air an là sin fhèin, a‑chum is gum bi e na cho-ghairm naomh dhuibh: obair thràilleil sam bith cha dèan sibh air; bidh e na reachd sìorraidh nur n‑àiteachan-còmhnaidh uile air feadh ur ginealaichean.

²²Agus nuair a bhuaineas sibh foghar ur fearainn, cha gheàrr thu gu buileach oisnean d’achaidh nuair a bhuaineas tu, cha mhò a thionaileas tu dìoghlaim d’fhogharaidh: fàgaidh tu iad don bhochd agus don choigreach; Is mise an Tighearna ur Dia.

²³Agus labhair an Tighearna ri Maois, ag ràdh,

²⁴Labhair ri cloinn Israeil ag ràdh, Anns an t‑seachdamh mìos, air a’ chiad là den mhìos, bidh sàbaid agaibh, cuimhneachan sèideadh thrompaidean, co‑ghairm naomh.

²⁵Obair thràilleil sam bith cha dèan sibh air; ach bheir sibh seachad tabhartas a bheirear suas le teine don Tighearna.

²⁶Agus labhair an Tighearna ri Maois, ag ràdh,

²⁷Mar an ceudna air an deicheamh là den t‑seachdamh mìos seo bidh là rèite; bidh e na cho-ghairm naomh dhuibh, agus cràidhidh sibh ur n‑anaman, agus bheir sibh seachad tabhartas a bheirear suas le teine don Tighearna.

²⁸Agus obair sam bith cha dèan sibh air an là cheudna; oir is là rèite e, a dhèanamh rèite air ur son an làthair an Tighearna ur Dia.

²⁹Oir ge bè anam nach bi fo chràdh anns an là sin fhèin, gearrar as e o mheasg a shluaigh.

³⁰Agus gach anam a nì obair sam bith air an là cheudna, an t‑anam sin fhèin sgriosaidh mise o mheasg a shluaigh.

³¹Obair sam bith cha dèan sibh; bidh e na reachd sìorraidh air feadh ur ginealaichean, nur n‑àiteachan-còmhnaidh uile.

³²Bidh e dhuibh na shàbaid foise, agus cràidhidh sibh ur n‑anaman air an naoidheamh là den mhìos air feasgar: o fheasgar gu feasgar cumaidh sibh ur sàbaid.

³³Agus labhair an Tighearna ri Maois, ag ràdh,

³⁴Labhair ri cloinn Israeil, ag ràdh, Air a’ chòigeamh-là‑deug den t‑seachdamh mìos seo bidh fèill nam pàillean rè seachd làithean don Tighearna.

³⁵Air a’ chiad là bidh co‑ghairm naomh: obair thràilleil sam bith cha dèan sibh air.

³⁶Seachd làithean bheir sibh seachad tabhartas a bheirear suas le teine don Tighearna: air an ochdamh là bidh co‑ghairm naomh agaibh, agus bheir sibh seachad tabhartas a bheirear suas le teine don Tighearna; is àrd-choitheanal e; obair thràilleil sam bith cha dèan sibh air.

³⁷Is iad sin fèillean an Tighearna, a ghairmeas sibh gu bhith nan co‑ghairmean naomha, a thoirt seachad tabhartais a bheirear suas le teine don Tighearna, tabhartas-loisgte, agus tabhartas-bìdh, ìobairt, agus tabhartasan-dibhe, gach nì air a là fhèin;

³⁸A thuilleadh air sàbaidean an Tighearna, agus a thuilleadh air ur tìodhlacan, agus a thuilleadh air ur bòidean uile, agus a thuilleadh air ur saor-thabhartasan uile, a bheir sibh don Tighearna.

³⁹Mar an ceudna air a’ chòigeamh-là‑deug den t‑seachdamh mìos, nuair a chruinnicheas sibh a‑steach toradh an fhearainn, cumaidh sibh fèill don Tighearna seachd làithean: air a’ chiad là bidh sàbaid, agus air an ochdamh là bidh sàbaid.

⁴⁰Agus gabhaidh sibh dhuibh fhèin air a’ chiad là meas chraobhan àlainn, geugan chrann-pailme, agus geugan chraobhan tiugha, agus seileach an t‑srutha; agus nì sibh gàirdeachas an làthair an Tighearna ur Dia seachd làithean.

⁴¹Agus cumaidh sibh e na fhèill don Tighearna seachd làithean anns a’ bhliadhna: bidh e na reachd sìorraidh air feadh ur ginealaichean; cumaidh sibh e anns an t‑seachdamh mìos.

⁴²Ann am pàilleanan gabhaidh sibh còmhnaidh seachd làithean; gabhaidh gach aon a rugadh na Israeleach còmhnaidh ann am pàilleanan;

⁴³A‑chum gum bi fhios aig ur ginealaichean gun tug mise air cloinn Israeil còmhnaidh a ghabhail ann am pàilleanan, nuair a thug mi a‑mach iad à tìr na h‑Eiphit: Is mise an Tighearna ur Dia.

⁴⁴Agus chuir Maois an cèill do chloinn Israeil fèillean an Tighearna.