Read Scots Gaelic 1992 – Am Bìoball Gàidhlig 199 Leabhar an Fhàidh Ieremiah 46 Bible Online

Leabhar an Fhàidh Ieremiah 46 - Scots Gaelic 1992 – Am Bìoball Gàidhlig 199 bible

Leabhar an Fhàidh Ieremiah 46

¹Facal an Tighearna a thàinig gu Ieremiah am fàidh, mu thimcheall nan cinneach;

²Mu thimcheall na h‑Eiphit. A‑thaobh feachd Phàraoh-necho rìgh na h-Èiphit, a bha ri taobh na h-aibhne Euphràteis ann an Carchemis, a bhuail Nebuchadnesar rìgh Bhàbiloin, ann an ceathramh bliadhna Iehoiacim, mhic Iosiah, rìgh Iùdah.

³Ullaichibh an targaid agus an sgiath, agus dlùthaichibh a‑chum a’ chatha.

⁴Uidhimichibh na h‑eich, agus rachaibh air am muin, a mharc-shluaigh; agus seasaibh a‑mach le ceann-bheartan; lìomhaibh na sleaghan, cuiribh oirbh na lùirichean.

⁵Cuime am faca mi iad seo fo gheilt, agus a’ gabhail na ruaige? Tha eadhon an daoine cumhachdach air an claoidh; seadh a’ teicheadh gu luath, agus gun iad a’ sealltainn nan dèidh. Tha eagal air gach làimh, deir an Tighearna.

⁶Na teicheadh am fear luath, agus na rachadh am fear làidir as; a làimh na h‑àird a tuath, ri taobh na h‑aibhne Euphrateis, thuislich, agus fhuair iad leagadh.

⁷Cò seo a’ teachd a‑nìos mar abhainn, agus a h‑uisgeachan ag atadh mar thuiltean?

⁸Dh’èirich an Eiphit mar abhainn, tha a h‑uisgeachan ag atadh mar thuiltean, agus tha i ag ràdh, Thèid mi suas, còmhdaichidh mi am fearann, sgriosaidh mi a’ chathair agus iadsan a tha ga h‑àiteachadh.

⁹Rachaibh air ur n‑eich, agus bithibh air mhire-chatha; air na carbadan, agus rachadh na fir-chogaidh a‑mach: na h‑Etiopaich, agus na Libianaich a ghlacas an sgiath, agus na Lidianaich a ghlacas agus a chuireas air lagh am bogha.

¹⁰Oir is e seo là Tighearna nan sluagh, là dìoghaltais, a‑chum e fhèin a dhìoladh air a naimhdean; agus sluigidh an claidheamh, agus bidh e sàthach, agus cuirear air mhisg e lem fuil: oir tha ìobairt aig Tighearna nan sluagh anns an tìr mu thuath, làimh ri abhainn Euphràteis.

¹¹Theirig suas gu Gilead, agus gabh ìocshlaint, O òg‑bhean, a nighean na h‑Eiphit; is dìomhain dhut mòran chùngaidhean-leighis a ghnàthachadh; air do leigheas cha bhi thu.

¹²Chuala na cinnich do mhasladh, agus lìon do ghaoir an talamh: oir thuislich iad, an laoch an aghaidh an laoich; thuit iad araon le chèile.

¹³Am facal a labhair an Tighearna ri Ieremiah am fàidh, mu theachd Nebuchadnesair rìgh Bhàbiloin, a bhualadh tìr na h‑Eiphit.

¹⁴Foillsichibh anns an Eiphit, agus cuiribh an cèill ann am Migdol; innsibh fòs ann an Noph, agus ann an Tahpanes abraibh: Seas daingeann, agus deasaich thu fhèin; oir shluig an claidheamh a’ mhuinntir a tha mun cuairt dhut.

¹⁵Cuime a bheil do chumhachdaich air an leagail? Cha do sheas iad a chionn gun do thilg an Tighearna sìos iad.

¹⁶Thug e air mòran tuisleachadh, seadh, tuiteam air muin a chèile: thubhairt iad uime sin, Thigibh, agus tilleamaid gu ar sluagh fhèin, agus gu tìr ar dùthchais, o chlaidheamh a’ mhillteir.

¹⁷Dh’èigh iad an sin, O Phàraoh, a rìgh na h‑Eiphit, chuir ioma-luasgadh bacadh air a’ choinneamh a shuidhicheadh.

¹⁸Mar as beò mise, deir an Rìgh, don ainm Iehòbhah, Dia nan sluagh, gu deimhinn mar Thabor am measg nam beann, agus mar Charmel ri taobh na fairge, thig e.

¹⁹Cuir d’àirneis an uidheam airson dol air ghluasad, O nighean a tha a chòmhnaidh anns an Eiphit; oir bidh Noph na fhàsach, bidh e fòs na làraich sgaoilte, gun aon ga àiteachadh.

²⁰Is agh air a bheil aogas àlainn an Eiphit; tha milleadh on àird a tuath a’ teachd na h‑aghaidh.

²¹Tha a fir-thuarasdail fòs na meadhon mar dhaimh bhiadhte; gidheadh thionndaidh eadhon iadsan an cùlaibh, theich iad le chèile, cha do sheas iad; a chionn gun tàinig orra là an aimhleis, aimsir an smachdachaidh.

²²Thèid a ghuth a‑mach mar ghuth nathrach; oir gluaisidh iad mar armailt, agus thig iad na h‑aghaidh le tuaghan, mar luchd-gearradh chraobh.

²³Gearraibh sìos a coillteach, tha an Tighearna ag ràdh, air chor is nach bi i ra faotainn le iarraidh; ged is lìonmhoire iad na lòcaist, agus ged nach faodar an àireamh.

²⁴Tha amhluadh air nighinn na h‑Eiphit; thugadh thairis i do làimh sluagh na h‑àird a tuath.

²⁵Thubhairt Tighearna nan sluagh, Dia Israeil, Feuch, smachdaichidh mise Amon, No, agus Phàraoh, agus an Eiphit, agus a diathan, agus a rìghrean; eadhon Phàraoh agus iadsan a tha a’ cur an dòchais ann.

²⁶Agus bheir mi thairis iad do làimh na muinntir a tha ag iarraidh an anama, eadhon do làimh Nebuchadnesair rìgh Bhàbiloin, agus do làimh a sheirbhiseach: agus na dhèidh sin àitichear i, mar anns na làithean o shean, deir an Tighearna.

²⁷Ach na biodh eagal ortsa, O Iàcoib, m’òglach, agus na biodh geilt ort, O Israeil; oir, feuch, bheir mise tèarainte thu o chèin, agus do shliochd o thìr an daorsa; agus tillidh Iàcob, agus gheibh e fois agus sìth; agus cha bhi aon neach ann a chur eagail air.

²⁸Na biodh eagal ort, O Iàcoib, m’òglach, deir an Tighearna, oir tha mise maille riut; ged bheir mi crìoch iomlan air na h‑uile chinnich gus an d’fhògair mi thu, gidheadh cha toir mi crìoch iomlan ortsa: ach smachdaichidh mi thu ann an tomhas, agus chan fhuiling mi dhut dol as gu h‑iomlan saor.